Jóhann Ársælsson (andsvar):
Hæstv. forseti. Mér sýnist menn hafa tekið ýmsar skynsamlegar ákvarðanir í nefndinni um breytingar á frv. sem hér er til staðar. Mér finnst samt enn vanta afar þýðingarmikinn þátt í þetta mál sem helst megi lýsa þannig að menn hafi ákveðið að byggja hús og séu búnir með kjallarann og þá halda þeir reisugildi. Því að á meðan ekki verður tekið á eignarhaldi og því skipt hvað varðar þessi málefni þá verður náttúrlega engin alvörusamkeppni í gangi og það sem snýr að gjaldskrám og samkeppni verður ótrúverðugt. Ég hefði viljað sjá að tekið hefði verið á og sett fram með einhverjum skýrum, beinum hætti hvernig eignarhaldið á að vera á Landsvirkjun í framtíðinni. Þetta er ótækt eins og nú þar sem helmingurinn er í eigu ríkisins og hinn helmingurinn í eigu tveggja sveitarfélaga, og í Landsvirkjun hafa náttúrlega orðið til mikil verðmæti.
Ég spyr þess vegna: Hefði ekki verið nær að menn hefðu stefnt að því strax að sveitarfélögin í landinu hefðu eignast Landsnetið og að þeim sveitarfélögum sem eru inni í Landsvirkjun hefði verið gert kleift að losa sinn hlut þaðan út? Þá hefðu komið upp möguleikar á því að trúverðug samskipti yrðu milli aðalorkuframleiðendanna og þeirra sem flytja og selja raforkuna í gegnum Landsnetið.