[prenta uppsett í dálka] 131. fundur, 130. lþ.
Mörður Árnason:
Forseti. Við erum nú á síðasta degi þessa þinghalds ef að líkum lætur. Ég kem í ræðustól til að segja frá því að hinn 16. október í fyrra lagði ég ásamt átta félögum mínum fram beiðni um skýrslu frá samgrh. um áhrif hvalveiða á ímynd Íslands sem ferðamannalands. Ég tel að það væri þáttur í að meta árangur veiðanna að slík skýrsla sé gerð og rædd á þinginu og í samfélaginu. Hæstv. samgrh. brást vel við og að liðnum þeim fresti sem áskilinn er í þingsköpum gerði ráðherra grein fyrir því að hann og hans menn litu svo á að skýrslan þyrfti að vera það ítarleg að hann þyrfti lengri tíma til að búa hana til.
Nú er alllangur tími liðinn og skýrslan ekki komin. Við ráðherrann áttum þó samtal um að staða hennar yrði ljós áður en þinginu lyki. Ég er ekki með neins konar ásakanir á hendur ráðherra í því máli en hann er því miður ekki hér til að svara. Það er hins vegar ákaflega mikilvægt að áður en ákvörðun er tekin um framhald á veiðunum þá liggi fyrir mat á þessu. Það er alveg ljóst að í þessu máli er m.a. um að ræða mikla hagsmuni tveggja útflutningsgreina og gjaldeyrisgreina, annars vegar sjávarútvegsins, sölu á afurðum í útlöndum, og hins vegar ferðaþjónustuna.
Ég vil vekja athygli á því að þessi skýrsla er ekki komin. Ég vona að hennar sé að vænta í sumar eða eins fljótt og hægt er. Ég vil spyrja sjútvrh. hvort hann sé ekki alveg örugglega sammála mér um að áður en hann taki ákvörðun fyrir hönd ríkisstjórnarinnar og þjóðarinnar um það hvort þessar veiðar eigi að halda áfram eða ekki þá verði skýrsla um áhrif veiðanna á ímynd Íslands sem ferðamannalands komin fram og rædd meðal þjóðarinnar og helst á þinginu.
