Magnús Þór Hafsteinsson:
Hæstv. forseti. Við í Frjálslynda flokknum fögnuðum því mjög í fyrra þegar hvalveiðar hófust að nýju eftir langt árabil með vísindaveiðum. Við verkefnið sem hæstv. sjútvrh. hefur sett af stað með því að stunda vísindaveiðar á hrefnu á Íslandi. Það er mikilvægt að við öflum okkur t.d. vitneskju um hvað þessir hvalir éta og aðrar upplýsingar sem ég ætla ekki að fara út í hér og nú. Við vonum að sjálfsögðu að þessi rannsóknaáætlun haldi áfram í sumar eins og ráð var gert fyrir.
Það er hins vegar áhyggjuefni, og það kom mér mjög á óvart að sjá það í svarinu við fyrirspurn hv. þm. Jóhanns Ársælssonar, að svo mikið af kjöti frá því í fyrra væri enn þá óselt. Mér finnst sæta furðu að þetta kjöt skuli ekki hafa gengið út. Það er mikið áhyggjuefni og í raun stórhættulegt fyrir trúverðugleika hvalveiðanna ef svo má segja, þ.e. ef við ætlum að stunda hvalveiðar áfram, að þetta kjöt skuli ekki fara í neyslu.
Það er ekki nóg að réttlæta þessar veiðar bara með vísindaveiðum. Við verðum að geta sannað og sýnt fram á að afurðir af þessum skepnum séu nýttar á skikkanlegan hátt. Ég hvet sjútvrh. til að búa þannig um hnútana að kjötið sem til fellur á þessum veiðum verði nýtt. Það er mjög mikilvægt. Þar fyrir utan hvet ég hæstv. sjútvrh. til að lýsa því yfir að þessari rannsóknaráætlun verði haldið áfram.