Kristinn H. Gunnarsson (andsvar):
Herra forseti. Ég er á mælendaskrá og mun fara yfir málið af minni hálfu á eftir, þannig að ég þarf ekki að rekja afstöðu mína eða hvernig ég komst að henni í þessu andsvari. En ég vildi aðeins nefna tvennt sem mér finnst ástæða til að reifa í framhaldi af ræðu hv. þm.
Í fyrsta lagi þá er það ekki þannig að allir í stjórnarandstöðunni séu á einu máli um sóknardagakerfið. Í Samfylkingunni er t.d. er ekki einhuga stuðningur við það að hafa sóknardagakerfi. Það eru þingmenn sem eru mjög ákveðnir í því að það eigi alltaf að vera aflamarkið. Ég vil benda á þetta til þess að mönnum sé ljóst að í þeim flokkum stjórnarandstöðunnar eins og í stjórnarflokkunum eru mjög skiptar skoðanir um þetta. Það er kannski eðlilegt að hv. þm. reyni að láta líta svo út að allir séu á hans máli í hans flokki varðandi þetta efni, en það er ekki svo.
Í öðru lagi þá held ég að menn megi ekki gefa sér að breytt verði um kerfi í handfærunum úr dagakerfi í aflamarkskerfi, það leiði sjálfkrafa af sér svo og svo mikinn tilflutning eða breytingu á veiðimunstri. Ég vil minna á að krókaaflamarkið er algjört kvótakerfi núorðið eins og allar fisktegundir eru komnar í kvóta á þeim veiðum. Hæsta löndunarstöð á síðasta fiskveiðiári í krókaaflamarki er í Bolungarvík. Fjórar af átta hæstu löndunarhöfnum í krókaaflamarki eru á Vestfjörðum. Þannig að ég vil ekki halda því fram og held að hægt sé að rökstyðja það, að bara við það að fara úr sóknarkerfi yfir í krókaaflamark þýði að svona mikil breyting verði á veiðimynstri sem hv. þm. vildi vera láta.