Magnús Þór Hafsteinsson (andsvar):
Hæstv. forseti. Það var athyglisvert að heyra þetta svar hjá þingmanni í stuðningsliði ríkisstjórnar sem fyrir ári gerði stjórnarsáttmála þar sem fram kemur að leitast verði við að styrkja hagsmuni sjávarbyggða. Það stendur í stjórnarsáttmálanum en eftir því á ekki að fara í kvöld.
Varðandi alla þessa sjómenn þá hafa sjómenn komið á fund sjútvn. en þeir höfðu allir beina hagsmuni af því að fara inn í kvóta. Þetta voru menn sem áttu von á að fá tugi milljóna í kvóta. Ég tel að þessir menn hafi ekki verið marktækir. Þeir voru ekki marktækir.
Margir sjómenn, víða að af landinu, smábátasjómenn, hafa haft samband við mig og sagt: Þið verðið að reyna að hindra að kvótasetningin verði látin á okkur dynja. Við viljum ekki fara í kvóta. Það er örlítill þrýstihópur sem er að reyna að koma þessu í gegn.