Lúðvík Bergvinsson (andsvar):
Virðulegi forseti. Hér er komin ný skilgreining á orðinu stjórnskipunarkreppa. Væntanlega yrði hún skýrð þannig að valdhafar ríkisvaldsins rækjust á en ekki það að forseti neitaði að undirrita.
Það sem vantar í þessa greiningu er hvað felst í orðinu stjórnskipunarkreppa. Hvert er vandamálið? Allt og sumt sem spurt hefur verið um og allt og sumt sem þetta mál hefur snúist um er það hvort þjóðin fái að greiða um það atkvæði. Það er kjarni þessa máls.
Steingrímur J. Sigfússon fór mjög vandlega yfir það í ræðu sinni hér hvað í þessu ákvæði felst og hvað menn töldu að í því fælist þegar það var sett á sínum tíma. Hér er sífellt talað um stjórnskipunarkreppu en enginn getur sagt okkur í hverju þessi kreppa felist. Í hverju felst hún? Hvert er vandamálið? Hvert er vandamálið við það að vísa máli til þjóðarinnar? (HBl: Það er nú erfitt ...)
Þessu verða menn að svara, hv. þm. Halldór Blöndal, og ég er viss um að þú færð tækifæri til þess að tala síðar í þessu máli. Þetta verða menn að skýra. Menn geta ekki komið hér upp með dylgjur um einhverja slíka hluti án þess að færa nokkur rök að máli sínu.