Arnbjörg Sveinsdóttir (andsvar):
Hæstv. forseti. Eigum við ekki að halda því til haga að stjórnarmeirihlutinn á Alþingi kláraði þetta mál á Alþingi. (Gripið fram í.) Það var ekki nokkur ástæða til, frekar en varðandi önnur mál sem menn takast á um og taka afstöðu til, að ætla annað en að þar með væri það ferli búið. Ég get ekki sagt að ég sjái eftir því að hafa lagt í þá vegferð.
Ég held að þrátt fyrir allt hafi ýmislegt komið á daginn. Það er þó búið að hafa það út úr stjórnarandstöðunni á endanum að hún er tilbúin að koma til samstarfs um reglur sem væntanlega yrði meiri sátt um í þjóðfélaginu þegar á það reynir. Augljóst er að nú verður að fara í að endurskoða stjórnarskrána.