Pétur H. Blöndal (andsvar):
Frú forseti. Ég vil endurtaka: Alþingi er kosið sem fulltrúi þjóðarinnar á fjögurra ára fresti minnst. Á bak við Alþingi Íslendinga er mjög sterkur meiri hluti. Þátttaka í alþingiskosningum er mjög sterk. Það eru um 88% sem taka þátt þannig að við getum sagt að þegar Alþingi samþykkir lög séu a.m.k. fulltrúar 44% þjóðarinnar sem hafa samþykkt þau lög á Alþingi. Og ég segi að ef fella eigi þessi lög sem fulltrúar þjóðarinnar settu á Alþingi þurfi sami meiri hluti að koma fram til að fella þau, þ.e. 44%. Ef þátttaka í kosningum til Alþingis yrði lítil eins og hjá sumum þjóðum þar sem þátttakan fer niður í 50% mundi ekki þurfa nema 25% enda er þá valdið sem Alþingi tekur frá þjóðinni veikara en þegar 88% taka þátt í alþingiskosningum.