[prenta uppsett í dálka] 0. fundur, 130. lþ.
Aldursforseti (Halldór Ásgrímsson):
Borist hafa þrjú bréf um forföll þingmanna. Hið fyrsta er svohljóðandi:
,,Þar sem Árni R. Árnason, 2. þm. Suðurk., getur ekki sótt þingfundi á næstunni vegna veikinda óska ég eftir því með vísan til 2. mgr. 53. gr. þingskapa að 1. varamaður á lista Sjálfstfl. í kjördæminu, Kjartan Ólafsson, taki sæti hans á Alþingi á meðan.
Virðingarfyllst,
Einar K. Guðfinnsson,
formaður þingflokks sjálfstæðismanna.``
Kjartan Ólafsson hefur áður tekið sæti á Alþingi og er hann boðinn velkominn til starfa á ný.
Annað bréfið hljóðar svo:
,,Þar sem ég er í fæðingarorlofi og sæki því ekki þingfundi á næstunni óska ég eftir því með vísan til 2. mgr. 53. gr. þingskapa að 1. varamaður á lista Sjálfstfl. í Suðvesturkjördæmi, Sigurrós Þorgrímsdóttir stjórnmálafræðingur, Kópavogi, taki sæti mitt á Alþingi á meðan.
Virðingarfyllst,
Þorgerður K. Gunnarsdóttir, 8. þm. Suðvest.``
Hið síðasta hljóðar svo:
,,Þar sem ég afplána nú refsidóm og mun því ekki sækja þingfundi á næstunni óska ég eftir því með vísan til 2. mgr. 53. gr. þingskapa að varamaður minn, Sigurlín Margrét Sigurðardóttir, taki sæti mitt á Alþingi á meðan.
Jafnframt vísa ég til bréfs formanns þingflokks frjálslyndra, Guðjóns A. Kristjánssonar, til forseta Alþingis, Halldórs Blöndals, dagsett 25. ágúst sl.
Virðingarfyllst,
Gunnar Örlygsson, 10. þm. Suðvest.``
Kjörbréf Sigurlínar Margrétar Sigurðardóttur og Sigurrósar Þorgrímsdóttur hafa þegar verið rannsökuð og samþykkt en þær hafa ekki áður tekið sæti á Alþingi og ber því að undirskrifa drengskaparheit að stjórnaskránni.
Ég vil biðja skrifstofustjóra að færa þingmönnum heitstafinn til undirritunar.
