Fjármálaráðherra (Geir H. Haarde) (andsvar):
Herra forseti. Út af fyrri spurningu þingmannsins um lækkun raunútgjalda og aðhald í rekstri vil ég vekja sérstaka athygli á því að í þeim áformum sem fyrir liggja um 3,7 milljarða kr. sparnað eru alveg niðurnegldar tillögur, sem sumpart liggja hér á borðum þingmanna í dag, sem er alveg ljóst að munu skila þeim árangri sem ætlast er til ef frumvörpin verða samþykkt. Hálfur milljarður vegna breytingar á tryggingagjaldslögum, 600 milljónir vegna vaxtabóta, 1.500 milljónir vegna sparnaðar í framkvæmdum o.s.frv. Þetta hafa menn í hendi sér ef þeir fallast á annað borð á þá stefnu sem hér er boðuð.
Varðandi almenn rekstrarútgjöld er náttúrlega líka ljóst að fylgja þarf eftir útgjaldaáformum ráðuneytanna með því að fylgja eftir t.d. reglugerð um framkvæmd fjárlaga sem nú liggur fyrir.
Varðandi seinna málið sem hv. þm. spyr um, skattalækkanir og skattahækkanir, þá vil ég í fyrsta lagi benda á að í kosningunum var af hálfu okkar stjórnarsinna ekki talað um það að allar skattalækkanir sem við gáfum fyrirheit um ættu að koma til framkvæmda á árinu 2004. Þvert á móti, við höfum alltaf talað um það mjög skýrt að skattalækkunaráform okkar næðu út kjörtímabilið, og það gera þau samkvæmt þessari áætlun.
Hvað varðar hækkun á bensíngjaldi, þá er það þess eðlis að bensíngjaldið hefur ekki verið hækkað hér frá því í október árið 1999 og þetta er einn af grundvallartekjustofnum ríkissjóðs sem er ekkert óeðlilegt að haldi í við vísitöluna almennt talað. Nú erum við að tala um að hækka þennan skatt um helminginn af því sem verðlag hefur hækkað á þessu tímabili og það er nákvæmlega ekkert óeðlilegt við það, herra forseti.