Pétur H. Blöndal (andsvar):
Frú forseti. Eftir að stjórnarskránni var breytt í þá veru að ekki mætti fela opinberum aðilum álagningu skatts eða ákvörðun um skatt þarf að taka allar krónutölubreytingar í skattalögum til umræðu á Alþingi. Það er rétt og þetta er gert, og ætti í rauninni að gera á hverju ári, því annars hverfur viðkomandi skattur með tímanum ef hann fylgir ekki verðlagi.
Það hefur gerst á þessum fjórum árum, að verðlagið hefur hækkað um 20%, líka úti á landi, sem þýðir það að hlutfall þungaskattsins hefur lækkað vegna þess að hann hefur ekki hækkað neitt. Þannig að landsbyggðarfólkið er að borga hlutfallslega minna núna í þungaskatt af vöruverði, sem hefur hækkað um 20%, en það gerði fyrir fjórum árum. Þannig að svokölluð ,,mistök`` hæstv. fjmrh., sem talað hefur verið um, hafa komið landsbyggðinni aldeilis til góða á undanförnum fjórum árum. Nú á að hækka þetta um helminginn af því sem verðlag hefur hækkað. Þannig að landsbyggðin nýtur þess ef eitthvað er.