Fjármálaráðherra (Geir H. Haarde):
Herra forseti. Ég mæli fyrir frv. til laga um breyting á lögum nr. 90/2003, um tekjuskatt og eignarskatt. Frv. þetta er sumpart, eins og hið fyrra mál á þessum fundi, nátengt fjárlagafrv. næsta árs þó að þar sé einnig að finna önnur og almennari atriði.
Ég vil byrja á því, herra forseti, að vekja athygli þingheims á því að lögin um tekjuskatt og eignarskatt hafa nú verið endurútgefin með nýju númeri og er nú að finna í sérprentun sem lög nr. 90/2003. Eins og þingreyndir menn muna var jafnan talað um þau sem lög nr. 75/1981, sem síðan hafði verið þráfaldlega breytt, jafnvel oft á ári, og orðið löngu tímabært að grisja og laga til með endurútgáfu þeirri sem heimiluð var í lögum í fyrra og nú er orðin að veruleika. Fyrir þá sem eru vanir að vinna með þessi lög er rétt að vekja athygli á því að röð greina hefur sumpart breyst en að öðru leyti er hið mesta þjóðþrifamál að gefa út lögin með nýju númeri eins og hér hefur verið gert. Það breytir þó ekki því að eflaust þarf að halda áfram að breyta skattalögum með nýjum frv. og frv. sem hér er lagt fram í dag á þskj. 88, herra forseti., er það fyrsta sem kemur til skoðunar á Alþingi og varðar breytingar á þessum nýútgefnu lögum.
Þeim breytingum sem lagt er til að gerðar verði með þessu frv. má í meginatriðum skipta í fjóra þætti. Í fyrsta lagi er um að ræða breytingar á hinum ýmsu viðmiðunarfjárhæðum laganna, svo sem persónuafslætti, sjómannaafslætti og viðmiðunum tengdum bótum og skerðingarmörkum, barnabótum, vaxtabótum o.s.frv. Lagt er til að viðmiðunarmörkin hækki í samræmi við verðlagsforsendur fjárlagafrv. fyrir árið 2004 eða um 2,5%.
Í öðru lagi er lögð til breyting á útreikningi vaxtabóta, nánar tiltekið hámarkshlutfalli vaxtagjalda af heildarskuldum. Með gildistöku núverandi reglna voru raunvextir af húsbréfum 6% og af lánum lífeyrissjóða 7%. Frá þeim tíma hafa vextir lækkað umtalsvert. Í dag eru húsbréfavextirnir 5% og vextir af lánum lífeyrissjóða á bilinu 5,5--6%. Í ljósi þessarar þróunar er talið eðlilegt að ofangreint hlutfall breytist í samræmi við langtímavexti af íbúðalánum. Með því verður jafnframt dregið úr hvata til frekari skuldsetningar hjá þeim sem eru að fjárfesta í eigin húsnæði en sú skuldsetning hefur óneitanlega verið mönnum visst áhyggjuefni og þráfaldlega komið til umræðu í þingsölum.
Í þriðja lagi er lagt til að ákvæði laganna um alþjóðleg viðskiptafélög verði felld brott. Frá því að lög nr. 31/1999, um alþjóðleg viðskiptafélög, voru sett hafa aðeins 14 fyrirtæki fengið leyfi til að starfa sem alþjóðleg viðskiptafélög. Þar af eru einungis 5--6 með einhverja starfsemi í dag. Yfirlýstur tilgangur umræddra laga var að efla erlenda fjárfestingu hér á landi en af þeim tölum sem ég hef rakið má ráða að áhrif umræddra laga á íslenskt atvinnulíf hafi ekki orðið þau sem vænst var.
Jafnframt hefur það gerst í millitíðinni að skattalegu umhverfi íslenskra fyrirtækja hefur verið gerbreytt, m.a. með þeirri miklu lækkun sem samþykkt var árið 2001 á tekju- og eignarsköttum fyrirtækja. Raunar má halda því fram að með þeim breytingum hafi verið stigið stórt skref í þá átt að gera lögin um alþjóðlegu viðskiptafélögin óþörf.
Í því frv. sem nú liggur fyrir af minni hálfu er því mælt fyrir um brottfall þeirra ákvæða sem sett voru í tengslum við setningu laga nr. 31/1999, um alþjóðleg viðskiptafélög. Þau eru sem kunnugt er á forræði viðskrh. Nauðsynlegt þykir þó að veita þeim fyrirtækjum sem þegar eru starfandi sem alþjóðleg viðskiptafélög ákveðinn aðlögunartíma til að breyta rekstri sínum. Því er lagt til að sú breyting sem hér um ræðir komi ekki til framkvæmda fyrr en í ársbyrjun 2008. Jafnframt mun viðskrh. leggja fram frv. um afnám laganna um alþjóðleg viðskiptafélög þar sem lagt er til að nýjum fyrirtækjum verði ekki veitt leyfi til að starfa sem slík frá og með næstu áramótum.
Í fjórða lagi, herra forseti, er í frv. mælt fyrir um niðurfellingu hins sérstaka 5% tekjuskatts, hátekjuskattsins, í árslok 2005. Fram að þeim tíma er lagt til að hann verði lækkaður í tveimur áföngum. Samkvæmt gildandi lögum verður sérstakur tekjuskattur 5% við álagningu á árinu 2004 vegna tekna ársins 2003. Hér er lagt til að við álagningu á árinu 2005 verði skatturinn 4% vegna tekna ársins 2004 og lækki síðan í 2% við álagningu á árinu 2006 vegna tekna ársins 2005. Viðmiðunarfjárhæð þessa skatts eins og aðrar viðmiðunarfjárhæðir eru samkvæmt frv. hækkaðar um 2,5% frá gildandi lögum. Ég tek fram að um þessa framlengingu er gott samkomulag milli stjórnarflokkanna.
Auk þess eru í frv. lagðar til nokkrar minni háttar breytingar er varða framkvæmd laganna. Til dæmis er lagt til að heimilt verði að víkja frá meginreglunni um framtals- og skattlagningarstað þegar um það er að ræða að örðugleikar geti skapast þegar tveir skattstjórar hvor í sínu skattumdæminu koma að einu og sama málinu. Tilgangur breytinganna er að draga úr slíkum örðugleikum sem skapast kunna við álagningu, skattendurskoðun og skatteftirlit, t.d. ef fyrirtæki er staðsett í einu skattumdæmi en eigandi þess eða eigendur í öðru. Einnig er lagt til að heimilað verði að senda úrskurði skattstjóra í almennum pósti eða rafrænt í þeim tilvikum þar sem alfarið er fallist á kröfur kæranda. Tilgangur þeirrar breytingar er að draga úr þeim kostnaði sem leiðir af ábyrgðarsendingum skattyfirvalda en einnig að heimila og gera ráð fyrir þeim möguleika að kærendum verði sendir úrskurðir rafrænt eftir nánari reglum sem ríkisskattstjóri mun setja.
Þetta eru meginatriði frv., herra forseti, og legg ég til að því verði að lokinni umræðu vísað til 2. umr. og hv. efh.- og viðskn. þingsins.