Kolbrún Halldórsdóttir (andsvar):
Virðulegi forseti. Varðandi nefndina sem starfaði á síðasta kjörtímabili sem fjallaði um þetta mál, þá er það alveg rétt sem hæstv. ráðherra bendir á að hún hefði auðvitað getað óskað eftir því að sett yrði á innflutningsbann. Þessi nefnd hafði ekki trú á því að það yrði vel liðið. Það var bara þannig. Við töldum okkur ekki stætt á því að fara fram með tillögu um innflutningsbann samhliða sölubanni.
Það var alveg ljóst að nefndin sem starfaði í fyrra var ekki hlynnt því að taka jafnstór skref og Náttúrufræðistofnun Íslands hafði lagt til í málinu. Það var hins vegar ekki nein sérstök atkvæðagreiðsla í því máli. Það var bara þannig að nefndin taldi hæstv. ráðherra hafa í höndunum það öflug úrræði til þess að takmarka veiðitímann, auka eftirlit og gera aðrar ráðstafanir til þess að tryggja vernd rjúpnastofnsins. En það sem er svo erfitt í þessu máli er nákvæmlega þetta: Að ætla sér að vernda um leið og maður nýtir. Það kemur að því að það getur verið orðið of seint.