Jóhann Ársælsson:
Hæstv. forseti. Ég sé ástæðu til að fagna því að hæstv. forsrh. lýsi því yfir að hann vilji leita samstarfs við flokkana á þinginu um endurskoðun á stjórnarskrá. Það er ástæða til að við samfylkingarmenn fögnum því vegna þess að við fluttum þáltill. sem liggur fyrir þinginu og búið er að ræða varðandi endurskoðun á stjórnarskránni.
Ég tel ástæðu til að hvetja menn til þess að vinna hratt og örugglega í þessu máli. Það hafa reyndar legið fyrir fleiri en ein og fleiri en tvær yfirlýsingar frá hæstv. forsrh., t.d. um að endurskoða stjórnarskrána gagnvart ákvæðum um sameign þjóðarinnar á auðlindum í kringum landið. Ekki hefur orðið af því enn en það er ástæða til að taka eftir því að hann hafði það síðast í upptalningu sinni núna á verkefnum sem vert væri að skoða.
En það er gott að heyra að hæstv. forsrh. er til í samstarf um þetta.