Umhverfisráðherra (Siv Friðleifsdóttir) (andsvar):
Virðulegur forseti. Hér er látið í það skína að þetta mál sé með óeðlilegum hætti til komið. Vegna þeirra spurninga sem hér hafa verið bornar upp vil ég taka fram að við erum að vinna í reglugerðinni sem hér er spurt um. Það er búið að vinna mest í gróðurhluta hennar, ekki dýrahlutanum. Það er svokölluð sérfræðinganefnd sem vinnur það en það er einmitt sama nefnd og gefur umsagnir til landbrh. þegar til innflutnings á dýrum kemur.
Ég beitti mér ekki fyrir þeirri niðurstöðu sem hér er orðin. Hún er unnin í landbn. Ég tel hins vegar að niðurstaðan sé mjög góð vegna þess að þrátt fyrir þau verndarákvæði sem við höfum í lögum er landbrh. veitt heimild til að banna innflutning á laxi telji hann vísindaleg rök fyrir því. Þau vísindalegu rök eiga að koma fram hjá Veiðimálastofnun, þeirri stofnun í stjórnkerfi okkar sem hefur mesta fagþekkingu á málinu. Ég tel að hér sé um nýja vernd að ræða miðað við þá vernd sem við höfum þegar í dag. Mér finnst þetta ágæt niðurstaða og tel að Veiðimálastofnun og landbrh., sem ber ábyrgð á lögunum um lax og silung, hafi öll tök á að banna innflutning á laxi ef það þarf. Hér er ekki um neitt óeðlilegt að ræða. Allar heimildir eru fyrir hendi til að banna innflutninginn.