[prenta uppsett í dálka] 23. fundur, 130. lþ.
Frsm. meiri hluta landbn. (Drífa Hjartardóttir) (andsvar):
Hæstv. forseti. Mér þykir afskaplega ómerkilegt þegar þingmenn niðurlægja aðra þingmenn með því að tala um það að þeir taki ekki þátt í umræðunni. Ég veit ekki betur en að við 2. umr. hafi allmargir stjórnarliðar tekið þátt í umræðunni. Það er því mjög ómaklegt að halda þessu fram.
Ég vil líka taka fram að 5. gr. laga um innflutning dýra, sem ég las upp fyrr í máli mínu í dag en ég ætla að endurtaka það, er svohljóðandi:
,,Áður en leyfi er veitt til innflutnings á nýjum dýrategundum eða erlendum stofnum tegunda sem hér eru fyrir skal landbúnaðarráðherra afla umsagnar Umhverfisstofnunar, Náttúrufræðistofnunar Íslands og sérfræðinganefndar samkvæmt lögum um náttúruvernd.``
Við þessa umsagnaraðila hefur meiri hlutinn í landbn. bætt erfðanefnd landbúnaðarins.
