Þuríður Backman:
Frú forseti. Ekki er nokkrum vafa undirorpið að það er mikil þörf fyrir lokaða öryggisdeild fyrir fullorðna geðsjúka og í dag er tilhneiging til þess að dæma geðsjúka eða geðfatlaða einstaklinga ósakhæfa eingöngu til þess að fá afplánun á öruggum stað og í faglegri meðferð og úr þessu þarf auðvitað að bæta. Ég tel að eins og verið er að styrkja Landspítala -- háskólasjúkrahús og þá sérhæfingu sem þar er, þá megi einnig tala um sérhæfingu á Heilbrigðisstofnun Suðurlands hvað varðar geðheilbrigðisþjónustu við sakhæfa og ósakhæfa geðsjúka einstaklinga og þar eigum við því að halda áfram að styrkja það svið geðheilbrigðisþjónustunnar, á Sogni, í Gunnarsholti, við Heilbrigðisstofnunina á Selfossi og á Litla-Hrauni. Þetta er sérhæfing og við eigum ekki í þessu tilfelli að vera að dreifa henni og setja hana í Arnarholt undir geðsvið LSH. Þar er ástæða til að koma annarri þjónustu fyrir.