Þuríður Backman:
Hæstv. forseti. Við munum auðvitað ræða þetta frekar þegar málið kemur á dagskrá en ástæðan fyrir því að ég set þetta upp hérna er eingöngu í sambandi við samráð hæstv. fjmrh. við aðildarfélögin. Það er vísað til þess að það þurfi meiri sveigjanleika. Ég vil benda hæstv. fjmrh. og hv. þm. á að eins og nú háttar til í opinberri stjórnsýslu er vald forstöðumanna orðið ærið mikið. Miðað við þær kröfur sem gerðar eru til þeirra um að halda sig innan ramma fjárlaga og miðað við það að 70--80% af rekstrarkostnaði margra stofnana eru launagreiðslur, mun þetta auka óöryggi starfsmanna og hugsanlegt að uppsagnir verði notaðar eingöngu í því skyni að halda sig innan ramma fjárlaga.