[prenta uppsett í dálka] 31. fundur, 130. lþ.
Álfheiður Ingadóttir:
Virðulegur forseti. Ég þakka hv. þm. Margréti Frímannsdóttur kærlega fyrir að vekja máls á þessum vanda þeirra kvenna sem hún lýsti hér. Það er því miður greinilegt af svörum ráðherra að það ríkir nokkur forræðishyggja þegar tekin er afstaða til þess hvað hver á að fá. Það er mjög mikilvægt að sjúklingar sem eiga rétt á tiltekinni aðstoð hafi ekki bara nokkuð heldur mjög mikið um það að segja í hverju sú aðstoð er fólgin. Það er mikið áfall að greinast með banvænan sjúkdóm og þurfa að ganga í gegnum erfiðar aðgerðir og meðferðir þótt ekki bætist á sú þrautaganga að berjast við tryggingakerfið.
Ég vil sérstaklega í þessu sambandi nefna baráttu nokkurra kvenna sem hafa farið í brjóstnám og enduruppbyggingu en ekki fengið þeirri aðgerð lokið þar sem ekki var hægt á þeim tíma að ljúka við gerð geirvörtu á brjóst með tattóveringu inni á sjúkrastofnunum. Ég vil biðja ráðherra að líta sérstaklega til þess hóps.
