[prenta uppsett í dálka] 33. fundur, 130. lþ.
Guðmundur Árni Stefánsson (andsvar):
Herra forseti. Já, ég hældi hv. þm. fyrir að hafa brugðist ókvæða við ásökunum í þá veru að hann hefði hugsað og horft þröngt í fjárlagavinnu sinni. Ég þekki hann af allt, allt öðru.
En einu verðum við að halda ákveðið til haga. Það dugir náttúrlega ekki að segja einfaldlega að einhverjir samningar séu í gildi sem skekki myndina því að veruleikinn er sá að einhver gerir þessa samninga. Þeir verða ekki til af engu og það eru pólitíkusar sem gera þá. Jafnvel þessi maður hérna, sem berst fyrir kjördæmi sitt. (Gripið fram í: Hver er þetta?) Hæstv. menntmrh. (Gripið fram í: Já, hann.) Það skyldi þó aldrei vera að hann hafi komið að gerð þeirra samninga sem hv. þm. er núna benda á að hann þurfi að uppfylla í fjárlagavinnu sinni?
Það eru auðvitað pólitískar ákvarðanir sem liggja að baki öllu þessu. Að því leytinu til tala tölurnar sínu máli og það þýðir ekkert að berja höfðinu við steininn í þeim efnum.
Hv. þm. Helgi Hjörvar sagði bara það sem á blaðinu stendur en vissulega eru skýringar á þessu og jafnvel er hægt að taka mark á sumum þeirra.
