[prenta uppsett í dálka] 33. fundur, 130. lþ.
Sigurjón Þórðarson (andsvar):
Frú forseti. Ég er ekki sammála hv. þm. Birki Jóni Jónssyni að velferðarmálum sé gert sérstaklega hátt undir höfði í þessu fjárlagafrv. Einu sparnaðartillögurnar sem fram koma eru þær að skerða kjör atvinnulausra, um það er ekki deilt, að taka af þeim þrjá fyrstu dagana. Síðan á að hækka álögur á sjúklinga um 740 millj., það er önnur tillagan, og svo á að skerða vaxtabætur. Það átti einmitt að gera vel við þennan hóp, íbúðakaupendur, en Framsfl. gengur nú fram fyrir skjöldu, skömmu eftir kosningar, og ræðst að þessu fólki, skerðir vaxtabæturnar. Og að vera að tala um og guma af því að það eigi að veita 15 millj. í atvinnuþróunarfélög. Ég gat ekki heyrt betur en hv. þm. minntist á það. Hvað er verið að gera í þessu frv.? Er ekki verið að hækka þungaskatt, auka hann um heil 8% og leggja álögur á landsbyggðina, hækka matvælaverð á Siglufirði þaðan sem hv. þm. kemur? Og hvað með kosningasvik? Hann ætti nú að vita það manna best sjálfur. Hvað með Héðinsfjarðargöngin sem Framsfl. og Sjálfstfl. lofuðu skömmu fyrir kosningar?
