Birkir J. Jónsson (andsvar):
Hæstv. forseti. Ég þakka ábendingar hv. þm. Steingríms J. Sigfússonar um fáfræði mína. En tæpir 6 milljarðar í útgjaldaaukningu hjá ríkissjóði eru þensluhvetjandi. Svo er mér alveg sama hvernig menn ætla að mæta því. (SJS: Nú, er það alveg sama?) Þið leggið það til að hækka skatta á fólkið í landinu (Gripið fram í: Nei, nei.) um á þriðja milljarð. Þannig eru nú hlutirnir. Og sú hagfræði kennir mér að 6 milljarðar í aukin ríkisútgjöld, þótt við mínusum þessa 3 frá, þýða aukin umsvif í efnahagskerfinu og aukna þenslu og setur þjóðhagskerfið okkar landsmanna í mikið ójafnvægi. (Gripið fram í: Þess vegna verðum við að hætta við Siglufjarðargöngin?) (Gripið fram í: Meðal annars.)