Fjármálaráðherra (Geir H. Haarde) (andsvar):
Herra forseti. Það er reynt að hafa sem nýjastar og bestar áætlanir í hvert sinn til grundvallar tillögum og útreikningum í fjárlögum, hvort sem það er tekjuáætlun eða sá þjóðhagslegi grunnur sem tekjuáætlunin byggir á. En auðvitað er það þekkt staðreynd að menn vita ekki allt í þeim efnum. Framtíðin, bæði á næsta ári og lengra fram í tímann, er auðvitað óviss. Ég held þó að mönnum hafi miðað verulega áfram við gerð áætlana og spádóma um efnahagsmálin. Það er að sjálfsögðu ánægjulegt hve miklar framfarir hafa orðið í því efni hér á landi. Hins vegar er enginn að gera því skóna að við munum einhvern tíma ná fullkomnun í því efni. En allar upplýsingar, nýjustu upplýsingar, verður að sjálfsögðu að taka til greina í þessum efnum.