[prenta uppsett í dálka] 41. fundur, 130. lþ.
Þuríður Backman:
Herra forseti. Heilsuverndarstöðin í Reykjavík hefur sterka ímynd heilsuverndar eða heilbrigðisþjónustu af ýmsu tagi í hugum allra landsmanna, ekki bara Reykvíkinga. Mér finnst að þessi bygging eigi í framtíðinni að hýsa slíka þjónustu áfram. Eins og komið hefur fram er uppistaðan í þeirri starfsemi sem nú fer þar fram á vegum ríkisins.
Það er ljóst að nýstofnuð Lýðheilsustöð er í húsnæðishraki og það er líka ljóst að efsta hæðin í Heilsuverndarstöðinni er nær ónothæf eins og hún er í dag. Þar þarf að taka til hendi og fara í viðgerðir og endurbyggingu og það er trúa mín að ef það verður gert megi starfsemi Lýðheilsustöðvarinnar vel rúmast innan Heilsuverndarstöðvarinnar í því húsnæði sem hún er í.
