Guðjón Ólafur Jónsson (andsvar):
Hæstv. forseti. Hv. þm. fer ansi frjálslega með staðreyndir í þessu máli. Það sem skiptir máli í þessu sambandi er að við erum að ræða um stærsta skref í réttindabaráttu öryrkja hér á landi sem stigið hefur verið árum saman. (Gripið fram í: Heyr, heyr.) Og heyr, heyr. Það liggur fyrir að á næsta ári munu heildargreiðslur almannatrygginga til einhleyps öryrkja hækka um 30 þús. kr. á mánuði.
Ég fór um í kosningabaráttunni og talaði um að við mundum verja 1 milljarði til öryrkja, til að bæta stöðu yngstu öryrkjanna, þeirra sem verða öryrkjar snemma á lífsleiðinni. Það erum við að gera. Við sögðum að þetta yrði gert 1. janúar 2004 og það er ekkert sem getur komið í veg fyrir það nema ólund stjórnarandstæðinga á þingi.