Fjármálaráðherra (Geir H. Haarde) (andsvar):
Herra forseti. Við hv. þm. höfum nú aldrei átt í hrossaviðskiptum en það skapast verðmæti við slík viðskipti og þau eru fólgin í þjónustu þess aðila sem hefur milligöngu um þau og það er hluti af þjóðarframleiðslunni eins og kunnugt er, eins og önnur þjónusta, fasteignaviðskipti og annað.
Varðandi Norðurál, þá er ekki kominn bindandi samningur þar á og þess vegna höfum við ekki tekið það með í okkar útreikninga. Hins vegar gerum við okkur, flest hver, vonir um að sú framkvæmd komi, í hana verði ráðist, og má segja að við eigum allt það jákvæða sem því fylgir uppi í erminni á næsta ári og næstu árum. Og hagvöxturinn sem liggur fyrir í þessum spám spáaðila, bæði fjmrn. og annarra, sem sumir hverjir eru með hærri spár en ráðuneytið, byggir í aðalatriðum á því að stóriðjuframkvæmdirnar muni drífa áfram hagvöxtinn og svo einkaneyslu sem skapast í kjölfarið á því. Fylgifiskurinn af aukinni einkaneyslu getur verið aukinn viðskiptahalli en ef hann er til kominn vegna innflutnings í tengslum við framkvæmdir sem síðan munu skapa útflutning þá er það ekki sambærilegt vandamál og hv. þm. nefndi. En það er alveg rétt að ef hann byggist fyrst og fremst á neyslu þá getur það verið alvarlegra mál. En það er kannski of langt mál að fara út í það hér í stuttu andsvari og munum við kannski geta gert það seinna, en auðvitað eru þessar spár alltaf til endurskoðunar eftir því sem nýrri og betri upplýsingar koma fram.