Félagsmálaráðherra (Árni Magnússon) (andsvar):
Hæstv. forseti. Ég get út fyrir sig alveg tekið undir það sjónarmið hv. þm. að æskilegast væri að um fullkomið samræmi væri að ræða í þessum efnum milli atvinnugreina. Í frv. sem hér er lagt fram er gert ráð fyrir að hægt verði að skilgreina í reglugerð hvernig og við hvaða aðstæður ástæða er til að grípa inn í gagnvart fyrirtækjum í fiskvinnslu. Við eigum eftir að fara yfir það mál og vinna það verkefni. Ég vona að það takist sátt við aðila vinnumarkaðarins um þá reglugerðarsmíð.