Birkir J. Jónsson (andsvar):
Hæstv. forseti. Ég lýsti því yfir í ræðu minni áðan að ég styddi það frv. sem hér liggur fyrir. Ég bið hv. þm. um að lesa frv. og þá veit hann skoðun mína í því máli.
En hvað um það. Ég reyndi áðan að fá hv. þm. Kristján Lúðvík Möller til að segja mér frá stefnu Samf. í sjávarútvegsmálum. Ég vil þakka Merði Árnasyni fyrir að koma hreint og beint fram og segja að Samf. vilji skerða aflaheimildir sjávarútvegsfyrirtækja í landinu.
Þær eru hlýlegar kveðjurnar sem starfsfólk t.d. Samherja á Akureyri eða Útgerðarfélags Akureyrar fá frá hv. þingmönnum Samfylkingarinnar, sem er tíðrætt um byggðastefnu. Ég vil spyrja: Hvaða áhrif halda hv. þm. Samf. að þær tillögur, sem þeir leggja til hvað varðar skerðingu á aflahlutdeild fyrirtækja í landinu, hafi t.d. á íbúaþróun í Fjarðabyggð, á Akureyri eða fleiri stöðum? (GMJ: Þú gleymir Raufarhöfn.) (Forseti hringir.) Halda hv. þm. að þetta verði þeim byggðarlögum til góðs? Ég segi enn og aftur: Ég óska eftir því að Samf. tali skýrt í málefnum sjávarútvegsins. Það á hreinu að hún ætlar að fara fyrningarleiðina líkt og þau sögðu í kosningunum í vor (Gripið fram í.) og ég fagna því að sú stefna liggur hér fyrir.