[prenta uppsett í dálka] 50. fundur, 130. lþ.
Sigurrós Þorgrímsdóttir (andsvar):
Virðulegi forseti. Ég stend upp vegna þess að mér finnst mjög ómaklega vegið að formanni nefndarinnar. Ég sat í nefndinni þegar þetta var til umræðu og eins og þeim er kunnugt sem þar sátu var farið yfir hverja einustu grein og það var hlustað á alla í nefndinni, hvað við vildum gera og hverju við vildum breyta.
Auðvitað kom formaðurinn með tillögu í nefndina. Mér hefði þótt mjög einkennilegt ef formaður nefndar hefði ekki lagt fram tillögur í nefnd eins og hann gerði.
Varðandi þessa einu grein sem hv. þm. og flutningsmaður frv., Sigurjón Þórðarson, leggur til að verði breytt kom hann með það á síðustu stund málsins og vildi láta flytja þetta niður í núll. Þá var honum boðið að koma bara með brtt. eða setja það inn í álit. Hann þáði það ekki og ákvað að vera ekki með á þessu nál.
Að gagnrýna formanninn eins og hér hefur verið gert finnst mér ómaklegt því að hann fór svo vel í gegnum málið og stóð sig með prýði.
