Magnús Stefánsson (andsvar):
Virðulegur forseti. Hvað varðar vinnubrögð í nefndum þá tók ég fram að ég treysti mjög vel þeim fulltrúum sem sitja í allshn. til að vinna málið eins og vera ber og ég tel að svo sé. Ég hef ekki verið að lýsa neinni atburðarás í allshn., ég tók fram að ég á ekki sæti þar og legg ekki mat á það sem þar hefur farið fram.
En hinu sem varðar ákvarðanir einstakra flokka í málinu lýsti ég í ræðu minni hvernig ég upplifði það hér hvernig afstaða í Samf. breyttist eftir því sem leið á tímann og ég lýsti því hvernig ég upplifði það og lagði mat á það hvaða aðilar höfðu helst áhrif á hvaða afstöðu Samf. tekur í þessu máli. Það var bara eins og ég upplifði það og ég hef lýst því.