Pétur H. Blöndal (andsvar):
Herra forseti. Tillagan gengur út á það að við lögin bætist ákveðin grein. Hér verða lögin samþykkt væntanlega með tilstuðlan flutningsmanns sem mun samþykkja sína eigin tillögu, nema hvað, en í greininni stendur: ,,Lög þessi koma þó eigi til framkvæmda fyrr en nefnd sem Alþingi kýs með fulltrúum allra þingflokka hefur farið yfir ákvæði þeirra í því skyni að ná sátt um þau, skilað Alþingi tillögum og þingið tekið afstöðu til þeirra.``
Það á að samþykkja frv. aftur eftir að það er orðið að lögum, landslögum í landinu. Hvað á þetta að þýða?