Hæstv. forseti. Ég mæli fyrir nefndaráliti frá landbúnaðarnefnd um frumvarp til laga um breytingu á lögum nr. 55/2002, um útflutning hrossa.

Nefndin hefur fjallað um málið og fengið á sinn fund Guðmund B. Helgason og Hákon Sigurgrímsson frá landbúnaðarráðuneyti og Halldór Runólfsson frá embætti yfirdýralæknis.

Þá bárust umsagnir frá embætti yfirdýralæknis, Bændasamtökum Íslands, héraðsdýralækni A-Skaftafellsumdæmis, héraðsdýralækni Suðurlandsumdæmis, héraðsdýralækni Austurlandsumdæmis, héraðsdýralækni Dalaumdæmis, Sigríði Björnsdóttur, dýralækni hrossasjúkdóma, Búnaðarsambandi Skagfirðinga, Búnaðarsambandi Eyjafjarðar og Hagþjónustu landbúnaðarins.

Með frumvarpinu er lagt til að felld verði niður ákvæði um hámarksaldur hrossa sem leyfilegt er að flytja úr landi. Ákvæðið þykir ekki hafa neina þýðingu lengur þar sem ítarleg skoðun fer fram á öllum hrossum fyrir útflutning sem framkvæmd er af eftirlitsdýralækni.

Samkvæmt gildandi lögum er óheimilt að flytja út hross nema embættisdýralæknir meti það hæft til útflutnings m.a. með tilliti til dýraverndar og smitsjúkdóma. Nefndin telur með vísan til umsagna sem borist hafa að nauðsynlegt sé að sjónarmið dýraverndar séu tryggð og leggur því til þá breytingu að héraðsdýralækni verði falið að meta sérstaklega ástand útflutningshrossa þegar um eldri hross er að ræða.

Nefndin leggur til að frumvarpið verði samþykkt með svofelldri breytingu:

Við frumvarpið bætist ný grein er verði 2. gr. og orðist svo: Á eftir orðunum „hæft til útflutnings með tilliti til“ í 1. málsl. 2. gr. laganna kemur: aldurs.

Hv. landbúnaðarnefnd leggur þetta til eftir að hafa fengið ágætar ábendingar frá dýralæknum bæði frá Suðurlandi og Norðurlandi. Það er vegna þess að vitað er að flutningur hefur mikil áhrif á hross þó að þau séu flutt með flugvélum eins og gert er í dag en ekki með skipum eins og gert var áður fyrr, en þau eru líka flutt lengra nú en áður. Það má leiða líkur að því að eldri hross séu að jafnaði verr í stakk búin til að þola mikla flutninga og hafi minni aðlögunarhæfni gagnvart nýjum umhverfisaðstæðum en yngri hross. Einnig er hætta á sumarexemi mikil og hætta á alvarlegum smitsjúkdómum þó að ekki hafi verið hægt að sýna fram á að aldur við útflutning sé þar beinn orsakavaldur, en það er almennt svo að aðlögunarhæfni ónæmiskerfisins minnkar með aldrinum. Þessir flutningar eru því erfiðari fyrir eldri hross. Eins óttast dýralæknarnir að stressáhrif, bæði vegna flutnings og umhverfisbreytinga, hafi áhrif á óeðlilegan blóðstatus í hrossum. Því leggur hv. landbúnaðarnefnd til þessa breytingu.

Einar Oddur Kristjánsson, Lúðvík Bergvinsson og Þórunn Sveinbjarnardóttir voru fjarverandi við afgreiðslu málsins.

Undir nefndarálitið rita Drífa Hjartardóttir, Anna Kristín Gunnarsdóttir, Birkir J. Jónsson, Jón Bjarnason, Guðmundur Hallvarðsson og Dagný Jónsdóttir.