Frú forseti. Ég er afskaplega ánægður með þetta svar. Hv. þingmaður segir að það sem skipti máli sé það sem fólkið fær útborgað í dag. Ef ríkið kæmi að kjarasamningunum með þeim hætti sem ég hef lagt til, að það greiddi mismuninn á því sem sveitarfélögin hafa boðið 15% og 35% sem kennarar hafa krafist og þurfa að fá, þá væru það launin sem fólkið fengi útborguð í dag. Það væri þá lausn og ég legg til að menn skoði hana í alvöru, að greiða kennurum 35% launahækkun eins og þeir hafa krafist, að ríkið borgi mismuninn á 15% sem sveitarfélögin greiða og 35%, en þeir kennarar sem veldu þetta féllu frá sérstökum lífeyrisrétti og yrðu tryggðir hjá lífeyrissjóði án ábyrgðar ríkissjóðs, t.d. Lífeyrissjóði verkfræðinga.