Tekjuskattur og eignarskattur.
Helgi Hjörvar (Sf) (andsvar):
Virðulegur forseti. Ég harma að hv. þingmaður skuli hafa flúið spurningar mínar alla leið suður í Garðabæ. Hingað til hefur hann ekki skirrst við að gangast við því að vera á Alþingi talsmaður hátekjufólks, eignafólks og fjármagnseigenda og berjast fyrir hagsmunum þeirra fyrst og fremst.
Ég spurði hv. þingmann tveggja spurninga. Annars vegar: Telur hann það vera forgangsverkefni í skattamálum að lækka skatta á hátekjufólk, fjármagnstekjueigendur og stóreignafólk? Hins vegar: Telur hann það vera eðlilega og viðeigandi þróun að yfir 20 þúsund af fátækustu Íslendingunum, þeir sem eru á strípuðum bótunum, hafa á síðustu árum farið að borga skatta sem nú nema á annan milljarð kr. á ári hverju? Vill hv. þingmaður vera svo vænn að svara þeim spurningum sem fyrir hann eru lagðar?