Herra forseti. Markmiðið með þessu frumvarpi er göfugt, hagræðing og nýsköpun og allt til að efla þjóðarhag, en það sem mig langaði að spyrja hæstv. forsætisráðherra út í er eftirfarandi: Hvað er öðruvísi núna? Nú er verið að slá þessum stofnunum saman í eina stóra en á undanförnum árum höfum við farið í svona framkvæmdir, að slá saman stofnunum, t.d. Ríkisspítulunum. Það var gerð ein stór stofnun, Landspítali – háskólasjúkrahús, og það skilaði fyrst bæði færri aðgerðum og hærri kostnaði. Það var m.a. vegna þess að málið var ekki nægjanlega undirbúið.

Fleiri mál má nefna í þessum geira, svo sem að þegar Umhverfisstofnun var sett á laggirnar skilaði það eingöngu hærri kostnaði og sáralitlu öðru, einni stórri stofnun og miklu meiri kostnaði. Þess vegna væri fróðlegt að fá svar við þessu hjá hæstv. forsætisráðherra: Hvað er öðruvísi í undirbúningnum núna sem verður til þess að við getum vænst þess að árangurinn verði betri en á undangengnum árum þegar ríkisstofnanir hafa verið settar saman?