um breytingar á ýmsum lögum vegna endurskoðunar á undanþágum
frá I. kafla I. viðauka við EES-samninginn og innleiðingar á
reglugerð Evrópuþingsins og ráðsins (EB) nr. 178/2002
frá 28. janúar 2002 auk afleiddra gerða.
(Lagt fyrir Alþingi á 135. löggjafarþingi 2007–2008.)
I. KAFLI Breytingar á lögum um matvæli, nr. 93/1995, með síðari breytingum.
1. gr.
Síðasti málsliður 1. gr. laganna orðast svo: Þessu skal ná með eftirliti, rekjanleika afurða
og vara, varúðaraðgerðum, fræðslu, upplýsingamiðlun, rannsóknum og neytendavernd.
2. gr.
Eftirfarandi breytingar verða á 2. gr. laganna:
a.
1. mgr. orðast svo:
Lög þessi taka til framleiðslu og dreifingar matvæla á öllum stigum. Þau taka ekki
til frumframleiðslu til einkanota eða til vinnslu, meðferðar eða geymslu á matvælum til
einkaneyslu. Lögin ná þó til allra efna og hluta sem ætlað er að koma í snertingu við
matvæli á einkaheimilum. Jafnframt ná lögin til fæðubótarefna enda innihaldi þau ekki
lyf samkvæmt lyfjalögum.
b.
Síðari málsliður 2. mgr. orðast svo: Það sama gildir um plöntur, fyrir uppskeru, sbr. lög
um varnir gegn sjúkdómum og meindýrum á plöntum, fóður, sbr. lög um eftirlit með
fóðri, áburði og sáðvöru, og lifandi dýr nema þau séu alin til markaðssetningar til manneldis.
3. gr.
Skilgreining á hugtakinu „matvæli“ í 4. gr. laganna fellur brott en jafnframt bætast við
eftirfarandi skilgreiningar í viðeigandi stafrófsröð:
1.
Eftirlitsaðilar eru Matvælastofnun eða heilbrigðisnefndir sveitarfélaga í samræmi við
6. og 20. gr.
2.
Frumframleiðsla er framleiðsla, eldi eða ræktun undirstöðuafurða ásamt uppskeru,
mjöltum og eldi dýra fram að slátrun. Frumframleiðsla tekur einnig til dýra- og fiskveiða
og nýtingar villigróðurs.
3.
Fæðubótarefni eru matvæli sem eru ætluð sem viðbót við venjulegt fæði og eru með hátt
hlutfall af vítamínum, steinefnum eða annars konar efnum sem hafa næringar- eða lífeðlisfræðileg áhrif. Fæðubótarefni mega ekki innihalda lyf samkvæmt lyfjalögum.
4.
Markaðssetning er að hafa umráð yfir matvælum með sölu fyrir augum, þ.m.t. að bjóða
þau til sölu eða afhendingar í öðru formi, gegn gjaldi eða endurgjaldslaust, og sjálf salan, dreifingin eða önnur form afhendingar.
5.
Matvæli eru hvers konar efni eða vörur, hvort sem þau eru fullunnin, unnin að hluta eða
óunnin, sem fólki er ætlað að neyta eða sem eðlilegt er að vænta að fólk neyti. Hugtakið
„matvæli“ tekur einnig til drykkja, tyggigúmmís og hvers kyns efna, þ.m.t. neysluvatns,
sem bætt er af ásettu ráði í matvæli við framleiðslu þeirra, vinnslu eða meðferð, svo og
fæðubótarefna.
6.
Matvælafyrirtæki er fyrirtæki eða einstaklingur sem rekur starfsemi í tengslum við framleiðslu, vinnslu eða dreifingu matvæla á einhverju stigi, hvort sem það starfar í ágóðaskyni eður ei, og hvort sem það er einkarekið eða opinbert fyrirtæki.
7.
Neysluvatn er vatn í upphaflegu ástandi eða eftir meðhöndlun, án tillits til uppruna þess
og hvort sem það kemur úr dreifikerfi, tönkum, flöskum eða öðrum ílátum og ætlað er
til neyslu eða matargerðar, einnig allt vatn sem notað er í matvælafyrirtækjum, nema
unnt sé að sýna fram á að gæði þess vatns sem notað er hafi ekki áhrif á heilnæmi framleiðslunnar.
8.
Neytandi er sá sem notar matvæli ekki sem lið í rekstri eða starfsemi matvælafyrirtækis.
9.
Rekjanleiki er sá möguleiki að rekja uppruna og feril matvæla, dýra sem gefa af sér
afurðir til manneldis og efna sem nota á eða vænst er að verði notuð í eða í snertingu við
matvæli í gegnum öll stig framleiðslu, vinnslu og dreifingar.
10.
Stjórnandi matvælafyrirtækis er einstaklingur eða lögaðili sem er ábyrgur fyrir því að
farið sé að kröfum samkvæmt lögum og stjórnvaldsfyrirmælum um matvæli í matvælafyrirtækjum undir hans stjórn.
11.
Smásala er meðhöndlun og/eða vinnsla matvæla og geymsla þeirra á staðnum þar sem
þau eru seld eða afhent neytanda, þ.m.t. dreifingarstöðvar, matsölufyrirtæki, mötuneyti
starfsfólks, veitingahús og önnur samsvarandi matarþjónusta ásamt verslunum og dreifingarstöðvum stórmarkaða og heildsölumarkaðir.
4. gr.
Eftirfarandi breytingar verða á 6. gr. laganna:
a.
A-liður orðast svo: frumframleiðslu.
b.
Á eftir a-lið kemur nýr stafliður, svohljóðandi: innflutningi og útflutningi búfjárafurða.
c.
Við bætist ný málsgrein, svohljóðandi:
Matvælastofnun hefur yfirumsjón með matvælaeftirliti og skal sjá um að vöktun og
rannsóknir vegna þessa eftirlits séu framkvæmdar. Í yfirumsjón felst samræming matvælaeftirlits þannig að framkvæmdin sé með sama hætti á landinu öllu. Í samræmi við
þetta gefur stofnunin út leiðbeiningar og viðmiðunarreglur um framkvæmdina sem heilbrigðisnefndum ber að fylgja.
5. gr.
Við IV. kafla laganna bætast þrjár nýjar greinar, 8. gr. a – 8. gr. c, svohljóðandi:
a. (8. gr. a.)
Matvæli sem eru ekki örugg, þ.e. heilsuspillandi eða óhæf til neyslu, er óheimilt að markaðssetja.
Við ákvörðun um hvort matvæli séu örugg skal hafa hliðsjón í fyrsta lagi af því hvernig
neytendur nota matvælin venjulega á hverju stigi framleiðslu og dreifingar og í öðru lagi
upplýsingum sem neytendum eru veittar, þ.m.t. upplýsingar á merkimiða, eða öðrum upplýsingum sem neytendur hafa almennt aðgang að og þar sem fram kemur hvernig þeir geti
forðast tiltekin matvæli eða tiltekinn matvælaflokk sem getur haft skaðleg áhrif á heilsuna.
Við ákvörðun um hvort matvæli séu heilsuspillandi skal hafa hliðsjón í fyrsta lagi af líklegum, bráðum áhrifum og/eða skammtímaáhrifum og/eða langtímaáhrifum þessara matvæla
á heilsu þeirra sem neyta þeirra og einnig á næstu kynslóðir, í öðru lagi líklegum, uppsöfnuðum eituráhrifum og í þriðja lagi sérstöku næmi ákveðins hóps neytenda fyrir tilteknum
matvælum ef matvælin eru ætluð þeim hópi.
Við ákvörðun um hvort matvæli séu óhæf til neyslu skal hafa hliðsjón af því hvort matvælin séu óviðunandi til neyslu með tilliti til fyrirhugaðrar notkunar eða vegna mengunar eða
vegna þess að þau eru rotin, spillt eða skemmd.
b. (8. gr. b.)
Stjórnandi matvælafyrirtækis ber ábyrgð á að uppfylltar séu kröfur laga og stjórnvaldsreglna sem gilda um starfsemi þess á hverjum tíma. Stjórnandi ber ábyrgð á öllum stigum
framleiðslu og dreifingar í fyrirtækjum undir hans stjórn og skal sannprófa að þessum kröfum sé fullnægt.
c. (8. gr. c.)
Ef stjórnandi matvælafyrirtækis álítur eða hefur ástæðu til að álíta að matvæli, sem hann
hefur flutt inn, framleitt eða dreift, séu ekki í samræmi við kröfur um öryggi matvæla og
hann hefur ekki lengur beint forræði yfir þeim skal hann tafarlaust gera ráðstafanir til að taka
umrædd matvæli af markaðnum og tilkynna það hlutaðeigandi eftirlitsaðila. Ef varan er
komin í hendur neytenda skal stjórnandinn upplýsa þá á skilvirkan og nákvæman hátt um
ástæðurnar fyrir því að varan var tekin af markaðnum og, ef nauðsyn krefur, innkalla vörur
sem neytendum hafa þegar verið afhentar ef aðrar ráðstafanir nægja ekki til þess að tryggja
víðtæka heilsuvernd.
Álíti stjórnandi matvælafyrirtækis eða hafi hann ástæðu til að álíta að tiltekin matvæli,
sem hann hefur markaðssett geti verið heilsuspillandi skal hann þegar í stað tilkynna það
hlutaðeigandi eftirlitsaðila. Stjórnendur skulu tilkynna yfirvöldum um aðgerðir til að fyrirbyggja hættu fyrir neytandann og jafnframt eiga allt það samstarf við yfirvöld sem dregið
getur úr eða eytt áhættu vegna viðkomandi matvæla.
6. gr.
9. gr. laganna orðast svo:
Matvælafyrirtæki skulu hafa starfsleyfi frá viðkomandi eftirlitsaðila, sbr. 20. gr., og skulu
þau sækja um starfsleyfi áður en starfsemi hefst. Matvælafyrirtæki sem annast frumframleiðslu matjurta þurfa ekki starfsleyfi en þurfa að tilkynna eftirlitsaðila um starfsemi sína
áður en starfsemin hefst. Heimilt er að binda starfsleyfi tilteknum skilyrðum.
Gefa skal út starfsleyfi til tiltekins tíma enda uppfylli starfsemin skilyrði laga og stjórnvaldsreglna sem um hana gilda. Óheimilt er að hefja starfsleyfisskylda starfsemi hafi starfsleyfi fyrir hana ekki verið gefið út. Stjórnanda ber að veita eftirlitsaðila upplýsingar um fyrirhugaðar breytingar á starfsemi sem varðað geta ákvæði starfsleyfis með hæfilegum fyrirvara.
Eftirlitsaðila er heimilt að endurskoða starfsleyfi áður en gildistími þess er liðinn vegna breyttra forsendna, svo sem ef breytingar verða á rekstrinum, vegna tækniþróunar eða breytinga á reglum um öryggi matvæla eða framkvæmd matvælaeftirlits.
Þrátt fyrir 2. mgr. er heimilt að gefa út starfsleyfi til bráðabirgða þannig að matvælafyrirtæki gefist ráðrúm til nauðsynlegra úrbóta á starfsemi sinni enda sé um smávægilegar
athugasemdir eftirlitsaðila að ræða.
Í starfsleyfi skal tilgreina stjórnanda og staðsetningu starfsemi, tegund hennar, skilyrði,
gildistíma og endurskoðun starfsleyfis, auk ákvæða um eftirlit, umgengni, hreinlæti og innra
eftirlit eftir því sem við á hverju sinni.
Þrátt fyrir skilgreiningu á matvælafyrirtæki í 4. gr. er ráðherra heimilt að undanskilja frá
starfsleyfisskyldu aðila sem ekki stunda starfsemi í ágóðaskyni en þeir skulu þó uppfylla
önnur skilyrði þessara laga og stjórnvaldsreglna sem settar eru með heimild í þeim.
Í sérlögum er heimilt að kveða á um sérstök skilyrði fyrir útgáfu starfsleyfis fyrir starfsemi einstakra matvælafyrirtækja.
Ef einnig er kveðið á um starfs- eða vinnsluleyfisskyldu í sérlögum fyrir starfsemi sem
fellur undir ákvæði þessara laga er eftirlitsaðila heimilt að gefa út eitt starfsleyfi á grundvelli
hvorra tveggja laganna.
7. gr.
1. og 2. mgr. 10. gr. laganna orðast svo:
Matvælafyrirtæki skulu haga starfsemi sinni í samræmi við reglur um almenna hollustuhætti og tryggja að matvæli óhreinkist ekki eða spillist á annan hátt.
Stjórnendur matvælafyrirtækja bera ábyrgð á því að sett sé á fót og starfrækt innra eftirlit
með starfseminni til þess að tryggja að hún sé í samræmi við ákvæði laga þessara og reglugerða settra samkvæmt þeim. Innra eftirlit fyrirtækisins skal miðast við eðli og umfang starfseminnar og byggjast á reglum sem ráðherra ákveður í reglugerð. Starfsfólk, sem starfar við
framleiðslu matvæla eða dreifir þeim, skal gæta hreinlætis við störf sín. Það skal hafa þekkingu á meðferð matvæla. Stjórnendur matvælafyrirtækja bera ábyrgð á að fræðsla fari fram
fyrir starfsfólkið. Ráðherra er heimilt að setja reglur um að þeir sem starfa við framleiðslu
og dreifingu matvæla skuli sækja námskeið um meðferð matvæla þar sem sérstök áhersla er
lögð á innra eftirlit og öryggi matvæla. Ef opinberir aðilar annast námskeiðahald er heimilt
að taka gjald sem nemur raunkostnaði við það.
8. gr.
Á eftir 13. gr. laganna kemur ný grein sem verður 13. gr. a, svohljóðandi:
Á öllum stigum framleiðslu og dreifingar skal vera fyrir hendi möguleiki á að rekja feril
matvæla, dýra sem gefa af sér afurðir til manneldis og hvers kyns efna sem nota á eða vænst
er að verði notuð í matvæli.
Stjórnendur matvælafyrirtækja skulu geta tilgreint alla einstaklinga og lögaðila sem hafa
afhent þeim matvæli, dýr sem gefa af sér afurðir til manneldis eða hvers kyns efni sem nota
á eða vænst er að verði notuð í matvæli. Einnig skulu stjórnendur geta tilgreint fyrirtæki sem
þeir hafa afhent vörur sínar. Í þessu skyni skulu umræddir stjórnendur hafa yfir að ráða kerfum og verklagsreglum til að gera framangreindar upplýsingar aðgengilegar eftirlitsaðilum
að beiðni þeirra. Þá skulu matvæli vera merkt og auðkennd á viðeigandi hátt til að auðveldara
verði að rekja feril þeirra með aðstoð viðeigandi skjala eða upplýsinga í samræmi við
framangreindar kröfur.
9. gr.
Heiti IV. kafla laganna verður: Matvælaöryggi, framleiðsla, markaðssetning og rekjanleiki.
10. gr.
Á eftir 18. gr. laganna kemur ný grein sem verður 18. gr. a, svohljóðandi:
Leitast skal við að vernda hagsmuni neytenda og gefa neytendum kost á upplýstu vali með
tilliti til matvælanna sem þeir neyta. Þannig skal leitast við að fyrirbyggja framleiðslu og
markaðssetningu svikinna matvæla, sviksamlegar eða villandi starfsvenjur og aðrar starfsvenjur sem gætu villt um fyrir neytendum.
Óheimilt er að villa um fyrir neytendum með merkingu, auglýsingu og framsetningu matvæla, þ.m.t. lögun þeirra, útliti eða umbúðum og umbúðaefni, hvernig þeim er fyrir komið
og í hvaða umhverfi þau eru sýnd, sem og upplýsingum sem eru veittar um þau.
11. gr.
Heiti VII. kafla laganna verður: Framkvæmd, neytendavernd og fræðslustarfsemi.
12. gr.
1. mgr. 20. gr. laganna orðast svo:
Framleiðsla og dreifing matvæla er háð leyfi heilbrigðisnefndar skv. 9. gr. Þegar ákvæði
þessi eiga við um starfsemi sem er undir opinberu eftirliti Matvælastofnunar skv. 6. gr. er
leyfisveiting í höndum þeirrar stofnunar.
13. gr.
23. gr. laganna orðast svo:
Matvælastofnun er heimilt að fela aðilum sem hlotið hafa faggildingu samkvæmt lögum
um faggildingu o.fl. að annast tiltekin verkefni við framkvæmd eftirlits samkvæmt lögum
þessum og skal gerður um það sérstakur samningur í hverju tilviki. Þeir skulu bundnir þagnarskyldu um það sem þeir fá vitneskju um við framkvæmd eftirlitsins og leynt á að fara.
Þá er ráðherra heimilt að ákveða að tilteknar rannsóknastofur skuli vera tilvísunarrannsóknastofur.
14. gr.
Eftirfarandi breytingar verða á 24. gr. laganna:
a.
Í stað orðanna „Matvælaframleiðendum og dreifendum“ í 1. mgr. kemur: Matvælafyrirtækjum.
b.
Í stað orðanna „Eftirlitsaðilar og þeir sem framleiða matvæli eða dreifa þeim“ í 3. mgr.
kemur: Heilbrigðisnefnd og matvælafyrirtæki.
15. gr.
25. gr. laganna orðast svo:
Fyrir eftirlit samkvæmt lögum þessum skulu matvælafyrirtæki greiða eftirlitsgjald sem
ekki er hærra en raunkostnaður við eftirlitið til að standa straum af eftirtöldum kostnaðarþáttum við matvælaeftirlitið:
a.
launum starfsfólks sem sinnir störfum vegna eftirlits,
b.
öðrum kostnaði vegna starfsfólks, þ.m.t. vegna aðstöðu, áhalda, búnaðar, þjálfunar,
ferðalaga og tengds kostnaðar, svo sem af bókhalds- og verkskráningarkerfi,
c.
kostnaði við greiningu á rannsóknastofu og sýnatöku.
Eftirlitsaðili framkvæmir viðbótareftirlit, þar á meðal rannsóknir, með matvælum þegar
tiltekin starfsemi matvælafyrirtækis eða matvæli eru ekki talin uppfylla þær almennu og eðlilegu kröfur sem gerðar eru til meðferðar eða heilbrigðis matvæla vegna vísbendinga um smitefni, mengun eða brot gegn heilbrigðis- eða starfsreglum eða skyldra atvika. Raunkostnað
af viðbótareftirliti ber matvælafyrirtæki. Framkvæma má viðbótareftirlit þrátt fyrir að afurðir
eða vara hafi þegar hlotið heilbrigðisvottun.
Ráðherra er heimilt að setja reglugerð um framkvæmd og inntak eftirlits og gefa út gjaldskrá fyrir eftirlitið að fengnum tillögum Matvælastofnunar. Sveitarfélögum er heimilt að gefa
út gjaldskrá fyrir eftirlitsskylda starfsemi heilbrigðisnefnda vegna matvælaeftirlits skv. 12.
gr. laga um hollustuhætti og mengunarvarnir. Gjald fyrir eftirlit skal ekki nema lægri fjárhæðum en fram koma í reglugerð Evrópuþingsins og ráðsins (EB) 882/2004, um opinbert
eftirlit til að tryggja sannprófun þess að lög um fóður og matvæli og reglur um dýraheilbrigði
og velferð dýra séu virtar. Ráðherra skal afla umsagnar hagsmunaaðila og kynna þeim efni
og forsendur reglugerðar og/eða gjaldskrár með a.m.k. eins mánaðar fyrirvara. Hafi umsagnir
þeirra ekki borist ráðherra að mánuði liðnum er honum þó heimilt að setja reglugerð og
gjaldskrá án umsagna þeirra.
Við gerð reglugerðar og gjaldskrár er ráðherra heimilt að taka tillit til eftirfarandi atriða:
a.
hvers konar framleiðslu um er að ræða og viðkomandi áhættuþátta,
b.
hagsmuna framleiðanda með litla framleiðslu,
c.
hefðbundinna aðferða við framleiðslu, vinnslu og dreifingu,
d.
þarfa framleiðenda á svæðum sem líða fyrir tilteknar landfræðilegar takmarkanir.
Eftirlitsgjald skal greiða samkvæmt framlögðum reikningi eftirlitsaðila.
Innheimta má eftirlitsgjaldið með fjárnámi án undanfarins dóms eða sáttar. Eftirlitsaðilum
er heimilt að krefjast dráttarvaxta af ógreiddri fjárkröfu vegna eftirlits frá og með gjalddaga
fram að greiðsludegi.
Þá getur eftirlitsaðili afturkallað starfsleyfi matvælafyrirtækis skv. 9. gr. hafi fyrirtækið
verulega vanefnt greiðslu eftirlitsgjalds eða ef fyrirtækið er ekki greiðslufært.
Ákvæði þessarar greinar gilda eftir því sem við á um innheimtu gjalds fyrir eftirlit á landamærastöðvum með innflutningi frá ríkjum utan Evrópska efnahagssvæðisins.
16. gr.
27. gr. laganna fellur brott.
17. gr.
Við lögin bætast tvær nýjar greinar sem verða 27. gr. a og 27. gr. b, svohljóðandi:
a. (27. gr. a.)
Matvælastofnun er heimil skyndiskoðun og sýnataka til rannsókna á búfjár- og sjávarafurðum sem fluttar eru til Íslands frá ríkjum innan Evrópska efnahagssvæðisins enda sé um
að ræða rökstuddan grun um að matvælin séu heilsuspillandi, óhæf til neyslu eða geti valdið
dýrasjúkdómum.
Viðtakandi slíkra afurða skal halda dagbók yfir mótteknar sendingar og ganga úr skugga
um að samræmi sé milli þeirra og meðfylgjandi skjala. Varðveita skal vottorð og önnur skilríki þeim viðkomandi í eitt ár svo að unnt sé að framvísa þeim að kröfu eftirlitsaðila.
b. (27. gr. b.)
Allur innflutningur búfjárafurða, sjávarafurða og lifandi ferskvatns- eða sjávardýra frá
ríkjum utan Evrópska efnahagssvæðisins skal fara um landamærastöðvar.
Tilkynna skal Matvælastofnun fyrir fram um slíkan innflutning þar sem getið er um magn,
tegund, áfangastað og hvenær áætlað er að sending berist.
Á landamærastöðvum eða í þeim höfnum sem heimild hafa fengið fyrir innflutningi skal
fara fram athugun á skjölum og samanburður á þeim og sendingu til að sannreyna uppruna
hennar og ákvörðunarstað.
Matvælastofnun skal kanna ástand afurðanna og taka sýni til rannsókna á rannsóknastofu.
Skal Matvælastofnun í þeim efnum fylgja gildandi reglum um tíðni skoðana og um sýnatökur. Komi í ljós við skynmat eða rannsókn að þær séu óhæfar til manneldis skal eyða þeim.
Heimilt er þó að endursenda afurðina að fengnu leyfi yfirvalda í framleiðslulandi eða að nýta
hana í mjöl enda sé hún laus við eiturefni.
Innflytjandi er ábyrgur fyrir þeim kostnaði sem getur fallið til við að endursenda vöru,
geyma hana, taka til annarra nota eða eyða henni.
Um innflutning sjávarafurða og lifandi sjávardýra vísast að öðru leyti til 22.–23. gr. og
25.–27. gr. laga nr. 55/1998, um meðferð, dreifingu og vinnslu sjávarafurða. Vegna innflutnings framangreindra afurða gildir að öðru leyti reglugerð (EB) nr. 882/2004 frá 29. apríl
2004.
18. gr.
28. gr. laganna orðast svo:
Í sérstökum tilvikum þar sem mat á fyrirliggjandi upplýsingum leiðir í ljós möguleika á
heilsuspillandi áhrifum en vísindaleg óvissa ríkir áfram er ráðherra heimilt að samþykkja
nauðsynlegar bráðabirgðaráðstafanir til að tryggja heilsu almennings vegna hugsanlegra
heilsuspillandi áhrifa.
Ráðstafanir, sem eru samþykktar á grundvelli 1. mgr., skulu vera í réttu hlutfalli við markmið þeirra og ekki hamla viðskiptum meira en nauðsynlegt er. Ráðstafanirnar skulu endurskoðaðar innan eðlilegs tíma miðað við eðli þeirrar áhættu fyrir líf eða heilsu manna sem
greind hefur verið og þá tegund vísindalegra upplýsinga sem þarf til að eyða vísindalegri
óvissu og til að framkvæma umfangsmeira áhættumat.
Varúðar- og varnaraðgerðir skv. 1. mgr. geta náð til alls landsins eða hluta þess. Skal
ráðherra, eftir því sem við á, hafa samráð við Matvælastofnun áður en til slíkra aðgerða er
gripið.
19. gr.
Við lögin bætist ný grein sem verður 28. gr. a, svohljóðandi:
Leiki rökstuddur grunur á um að tiltekin matvæli hafi í för með sér áhættu fyrir heilbrigði
manna skulu hlutaðeigandi eftirlitsaðilar upplýsa almenning um eðli áhættunnar fyrir heilsu
manna. Slíkar ráðstafanir eftirlitsaðila skulu miðast við eðli, alvarleika og umfang þeirrar
áhættu sem um er að ræða. Tilgreina skal eins nákvæmlega og unnt er matvælin sem um er
að ræða, tegund matvæla, þá áhættu sem kann að vera á ferðum og ráðstafanir sem hafa verið
gerðar eða verða gerðar á næstunni til að fyrirbyggja, draga úr eða eyða þessari áhættu.
Ráðherra er heimilt að setja reglugerð um opinbera birtingu niðurstaðna vegna eftirlits sem fram fer skv. 1. mgr.
Jafnframt er ráðherra heimilt að setja með reglugerð reglur um birtingu niðurstaðna almenns matvælaeftirlits eða upplýsinga sem falla undir 18. gr. a. Ráðherra getur m.a. ákveðið
að kæra fresti ekki réttaráhrifum opinberrar birtingar og jafnframt ákveðið að vissum upplýsingum sé haldið leyndum. Slíkar reglur skulu kveða á um framsetningu og inntak birtingarinnar, m.a. að birtingin sé rafræn og á hvaða tímamarki skuli birta slíkar upplýsingar.
Heimilt er að birta niðurstöður eftirlits er varða eitt matvælafyrirtæki eða fleiri eftir atvikum.
20. gr.
29. gr. laganna fellur brott.
21. gr.
Í stað 30. gr. laganna koma fimm nýjar greinar, sem verða 30. gr. og 30. gr. a – 30. gr. d,
svohljóðandi:
a. (30. gr.)
Eftirlitsaðila er heimilt að stöðva starfsemi að hluta eða í heild ef rökstuddur grunur er um
að matvæli séu heilsuspillandi, óhæf til neyslu eða valdi tjóni á öðrum hagsmunum.
Sama gildir ef um er að ræða starfsemi sem starfar án tilskilins leyfis.
Einnig er eftirlitsaðila heimilt að gefa fyrirmæli um afmengun matvæla, stöðva eða takmarka framleiðslu og markaðssetningu matvæla og leggja hald á þau þegar rökstuddur grunur
er um að matvælin uppfylli ekki ákvæði laga þessara eða stjórnvaldsreglna settra samkvæmt
þeim. Þegar eftirlitsaðilar leggja hald á matvæli er þeim heimil förgun þeirra sé það talið
nauðsynlegt.
Þá getur eftirlitsaðili jafnframt til að knýja á um aðgerðir samkvæmt lögum þessum,
stjórnvaldsreglum eða eigin fyrirmælum samkvæmt þessum ákvæðum beitt eftirfarandi aðgerðum:
a.
veitt áminningu,
b.
veitt áminningu og tilhlýðilegan frest til úrbóta.
Stöðvun starfsemi og förgun á vörum skal því aðeins beitt að um alvarlegt tilvik eða ítrekað brot sé að ræða eða ef aðilar sinna ekki úrbótum innan tiltekins frests og er heimilt að leita
aðstoðar lögreglu ef með þarf. Sé um slík brot að ræða getur eftirlitsaðili afturkallað leyfi
viðkomandi matvælafyrirtækis til reksturs skv. 9. gr., sbr. 20. gr.
b. (30. gr. a.)
Þegar stjórnandi sinnir ekki fyrirmælum innan tiltekins frests getur eftirlitsaðili ákveðið
matvælafyrirtæki dagsektir þar til úrbætur hafa verið framkvæmdar. Dagsektir renna í ríkissjóð og skal hámark þeirra ákveðið í reglugerð sem ráðherra setur. Jafnframt er eftirlitsaðila
heimilt að láta vinna verk á kostnað hins vinnuskylda ef fyrirmæli um framkvæmd eru vanrækt og skal kostnaður þá greiddur til bráðabirgða af viðkomandi eftirlitsaðila en innheimtast
síðar hjá hlutaðeigandi matvælafyrirtæki. Kostnað og dagsektir má innheimta með fjárnámi
án undanfarandi dóms eða sáttar.
c. (30. gr. b.)
Eftirlitsaðila skal heimill aðgangur til skoðunar og eftirlits, þar á meðal töku sýna og
myndatöku, að öllum þeim stöðum sem lög þessi og stjórnvaldsreglur ná yfir og er heimilt að leita aðstoðar lögreglu ef með þarf.
Einnig er eftirlitsaðila heimilt að taka sýni þar sem starfsemi fer fram og lög þessi og
stjórnvaldsreglur settar samkvæmt þeim ná til.
Stjórnendum er skylt að veita aðstoð við framkvæmd eftirlitsins og veita allar upplýsingar
sem nauðsynlegar eru vegna eftirlits með framkvæmd laganna og ber þeim endurgjaldslaust
að afhenda sýni sem talin eru nauðsynleg vegna eftirlits. Þá getur eftirlitsaðili ákveðið að
matvælafyrirtæki skuli greiða allan kostnað vegna þvingunarrúræða sem framkvæmd eru
samkvæmt lögum þessum og má innheimta slíkan kostnað með fjárnámi án dóms eða sáttar.
d. (30. gr. c.)
Telji Matvælastofnun svo alvarlega hættu stafa af tiltekinni starfrækslu eða notkun að aðgerð þoli enga bið er henni heimilt til bráðabirgða að stöðva starfsemi eða notkun þegar í
stað, með aðstoð lögreglu ef þurfa þykir, en tilkynna skal það hlutaðeigandi heilbrigðisnefnd.
Matvælastofnun skal sjá um samhæfingu aðgerða þegar upp koma bráðar eða alvarlegar
matarsýkingar, matareitranir eða önnur vá svipaðs eðlis. Heilbrigðisnefndir sveitarfélaga
skulu þegar í stað tilkynna Matvælastofnun um slík mál og skal stofnunin að höfðu samráði
við viðkomandi heilbrigðisnefnd taka ákvörðun um nauðsynlegar ráðstafanir. Starfsmenn
Matvælastofnunar og heilbrigðisnefndir skulu jafnframt tilkynna um slík mál til yfirlæknis
viðkomandi heilsugæslu eða sóttvarnalæknis, sbr. 4. og 5. mgr. 4. gr. og 1. mgr. 11. gr. sóttvarnalaga, nr. 19/1997.
e. (30. gr. d.)
Við meðferð mála skv. 30. gr., 30. gr. a, 30. gr. b og 30. gr. c skal fara eftir ákvæðum
stjórnsýslulaga og öðrum reglum stjórnsýsluréttar.
22. gr.
30. gr. a laganna verður 30. gr. e.
23. gr.
Heiti XI. kafla laganna verður: Varúðarráðstafanir, þvingunarúrræði og valdsvið.
24. gr.
31. gr. laganna orðast svo:
Brot gegn ákvæðum þessara laga og stjórnvaldsreglum settum samkvæmt þeim varða sektum hvort sem þau eru framin af ásetningi eða stórfelldu gáleysi. Sé um stórfelld eða ítrekuð
ásetningsbrot að ræða skulu þau að auki varða fangelsi allt að fjórum árum.
Sektir má ákvarða lögaðila þó að sök verði ekki sönnuð á stjórnanda eða starfsmenn hans
eða aðra þá einstaklinga sem í þágu hans starfa, enda hafi brotið orðið eða getað orðið til
hagsbóta fyrir lögaðilann. Þó skal lögaðili ekki sæta refsingu ef um óhapp er að ræða. Einnig
má, með sömu skilyrðum, gera lögaðila sekt ef stjórnandi eða starfsmenn hans eða aðrir einstaklingar sem í þágu hans starfa gerast sekir um brot.
Mál út af brotum skv. 1. og 2. mgr. skulu sæta meðferð opinberra mála.
25. gr.
Heiti XII. kafla laganna verður: Viðurlög.
26. gr.
Á undan 32. gr. laganna kemur ný grein sem verður 31. gr. a, svohljóðandi:
Ráðherra setur nánari ákvæði um framkvæmd þessara laga með reglugerðum. Þar skal
m.a. kveðið nánar á um framleiðslu og markaðssetningu matvæla, hollustuhætti í matvælaiðnaði, rekjanleika matvæla og umbúða, merkingar matvæla, notkun fullyrðinga í merkingum
matvæla, efnainnihald matvæla, viðmiðunarmörk fyrir örverufræðilega þætti og aðskotaefni,
neysluvatn, umbúðir og pökkun, tilkynningarskyldu þeirra sem framleiða eða flytja inn umbúðir fyrir matvæli og efni eða efnablöndur sem nota á við framleiðslu og dreifingu matvæla,
matvælaeftirlit, innra eftirlit matvælafyrirtækja, um sölu framleiðanda af eigin framleiðslu
beint til neytenda, um innflutning dýraafurða frá þriðju ríkjum og starfsemi landamærastöðva, hraðviðvörunarkerfi og stjórnun vegna neyðartilvika og skipun ráðgefandi nefndar
sem veitir vísindalega ráðgjöf um áhættumat.
Einnig er ráðherra heimilt að innleiða með reglugerð reglugerð Evrópuþingsins og ráðsins
(EB) nr. 178/2002, frá 28. janúar 2002, um almennar meginreglur og kröfur um matvæli, um
stofnun Matvælaöryggisstofnunar Evrópu og um málsmeðferð vegna öryggis matvæla, sbr.
ákvörðun sameiginlegu EES-nefndarinnar frá 27. október 2007 nr. 134/2007. Reglugerðir
EB sem teknar verða upp í samninginn um Evrópska efnahagssvæðið og fela í sér breytingar
eða viðbætur við reglugerð Evrópuþingsins og ráðsins (EB) nr. 178/2002, frá 28. janúar
2002, er einnig heimilt að innleiða með reglugerð. Sama gildir um reglugerðir sem settar eru
með tilvísun í reglugerðina.
Þá er ráðherra heimilt að innleiða með reglugerð reglugerð Evrópuþingsins og ráðsins
(EB) nr. 852/2004, frá 29. apríl 2004, um hollustuhætti í matvælaiðnaði, reglugerð Evrópuþingsins og ráðsins (EB) nr. 853/2004, frá 29. apríl 2004, um sérstakar reglur um hollustuhætti sem varða matvæli úr dýraríkinu, reglugerð Evrópuþingsins og ráðsins (EB) nr. 854/
2004, frá 29. apríl 2004, um sértækar reglur um skipulag opinbers eftirlits með afurðum úr
dýraríkinu, reglugerð Evrópuþingsins og ráðsins (EB) nr. 882/2004, frá 29. apríl 2004, um
opinbert eftirlit til að tryggja sannprófun þess að lög um fóður og matvæli og reglur um dýraheilbrigði og velferð dýra séu virtar, sbr. ákvörðun sameiginlegu EES-nefndarinnar frá 27.
október 2007 nr. 137/2007. Reglugerðir EB sem teknar verða upp í samninginn um Evrópska
efnahagssvæðið og fela í sér breytingar eða viðbætur við framangreindar reglugerðir Evrópuþingsins og ráðsins (EB) er einnig heimilt að innleiða með reglugerð. Sama gildir um reglugerðir sem settar eru með tilvísun í þessar reglugerðir EB.
Ráðherra er jafnframt heimilt að innleiða með reglugerð tilskipun Evrópuþingsins og
ráðsins (EB) nr. 2005/41/EB frá 21. apríl 2004, um niðurfellingu tiltekinna tilskipana sem
varða hollustuhætti í tengslum við matvælaiðnað og heilbrigðisskilyrði við framleiðslu og
markaðssetningu tiltekinna afurða úr dýraríkinu sem eru ætlaðar til manneldis og um breytingu á tilskipunum ráðsins 89/662/EBE og 92/118/EBE og ákvörðun ráðsins 95/408/EB, sbr.
ákvörðun sameiginlegu EES-nefndarinnar frá 27. október 2007 nr. 137/2007.
27. gr.
Heiti XIII. kafla laganna verður: Reglugerðarheimild, gildistaka o.fl.
28. gr.
Við lögin bætist ákvæði til bráðabirgða, svohljóðandi:
Ráðherra er heimilt að fresta innleiðingu efnisákvæða reglugerða sem getið er í 3. mgr.
31. gr. a sem varða kjöt, mjólk og egg til 27. október 2009. Sama gildir um hráar afurðir úr
þessum matvælategundum og aðrar unnar afurðir úr mjólk.
II. KAFLI Breytingar á lögum um dýrasjúkdóma og varnir gegn þeim,
nr. 25/1993, með síðari breytingum.
29. gr.
Við 4. gr. laganna bætist eftirfarandi skilgreining, í stafrófsröð: Aukaafurðir úr dýrum:
Heil hræ, skrokkar, skrokkhlutar, líffæri eða aðrar afurðir af dýrum sem ekki eru hæfar eða
ætlaðar til manneldis.
30. gr.
10. gr. laganna orðast svo:
Til að hindra að dýrasjúkdómar berist til landsins er óheimilt að flytja til landsins eftirtaldar vörutegundir:
a.
kjötmjöl, beinamjöl og blóðmjöl,
b.
hey og hálm,
c.
hvers konar notaðar umbúðir, reiðfatnað, reiðtygi, vélar, tæki, áhöld og annað sem hefur
verið í snertingu við dýr, dýraafurðir og dýraúrgang,
d.
hvers konar notaðan búnað til stangaveiða.
Þrátt fyrir ákvæði 1. mgr. er Matvælastofnun heimilt að leyfa innflutning á vörum þeim
sem taldar eru upp í a–d-lið, enda þyki sannað að ekki berist smitefni með þeim er valda
dýrasjúkdómum. Þá getur ráðherra ákveðið með reglugerð að ákvæði 1. mgr. skuli ekki gilda
fyrir einstakar vörutegundir sem þar eru taldar upp ef varan sótthreinsast við tilbúning eða
sérstök sótthreinsun er framkvæmd fyrir innflutning og vörunni fylgir fullnægjandi vottorð
um uppruna, vinnslu og sótthreinsun. Ráðherra er heimilt að banna með auglýsingu innflutning á vörum sem hætta telst á að smitefni geti borist með og hætta telst geta steðjað af varðandi heilbrigði dýra.
Um framkvæmd þessarar greinar fer einnig eftir ákvæðum annarra laga og alþjóðasamninga sem íslenska ríkið er aðili að.
31. gr.
13. gr. laganna orðast svo:
Aukaafurðir dýra, sem ekki eru ætlaðar til manneldis, skal meðhöndla, geyma, flytja,
vinna eða eyða á þann hátt að ekki valdi hættu á útbreiðslu smitefna eða annarra skaðlegra
efna. Þeir sem meðhöndla, geyma, flytja eða vinna aukaafurðir dýra skulu sækja um leyfi
Matvælastofnunar áður en starfsemin hefst.
Stjórnendur vinnslu-, geymslu-, lífgas- og myltingarstöðva, svo og stöðva fyrir milliefni
og líffituefni, sem ætlað er að vinna aukaafurðir úr dýrum, þ.m.t. stöðvar sem annast vinnslu
úrgangs úr sjávar- og eldisafurðum, skulu sækja um starfsleyfi hjá Matvælastofnun.
Ráðherra setur með reglugerð nánari ákvæði um aukaafurðir dýra sem ekki eru ætlaðar
til manneldis, svo sem meðferð slíkra aukaafurða, flokkun og starfsleyfi vegna þeirra, sbr.
29. gr. a.
32. gr.
Við 25. gr. laganna bætist ný málsgrein, svohljóðandi:
Sjávarútvegs- og landbúnaðarráðherra er heimilt með reglugerð að skilgreina arfgerðir
þeirra líflamba sem má ekki flytja yfir varnarlínur, þegar um er að ræða endurnýjun bústofns
eftir niðurskurð vegna riðuveiki.
33. gr.
Á eftir 29. gr. laganna kemur ný grein sem verður 29. gr. a, svohljóðandi:
Heimilt er ráðherra að innleiða með reglugerð reglugerð Evrópuþingsins og ráðsins (EB)
nr. 1774/2002 frá 3. október 2002 um heilbrigðisreglur um aukaafurðir úr dýrum sem ekki
eru ætlaðar til manneldis, sbr. ákvörðun sameiginlegu EES-nefndarinnar frá 27. október 2007
nr. 135/2007 og nr. 136/2007. Reglugerðir EB sem teknar verða upp í samninginn um Evrópska efnahagssvæðið og fela í sér breytingar eða viðbætur við reglugerð Evrópuþingsins
og ráðsins (EB) nr. 1774/2002 er einnig heimilt að innleiða með reglugerð. Sama gildir um
reglugerðir sem settar eru með tilvísun í reglugerðina.
III. KAFLI Breytingar á lögum um dýralækna og heilbrigðisþjónustu við dýr,
nr. 66/1998, með síðari breytingum.
34. gr.
1. mgr. 6. gr. laganna orðast svo:
Dýralæknar samkvæmt lögum þessum eru þeir dýralæknar er lokið hafa prófi frá dýralæknaháskóla sem er viðurkenndur af íslenskum stjórnvöldum. Jafnframt teljast þeir dýralæknar sem heimild hafa til að starfa hér á landi undir starfsheiti heimalands síns í samræmi
við reglur Evrópska efnahagssvæðisins eða stofnsamning Fríverslunarsamtaka Evrópu.
Sjávarútvegs- og landbúnaðarráðherra setur nánari reglur um leyfisveitingu, menntunarkröfur
og viðurkenndar menntastofnanir. Ef um er að ræða próf frá dýralæknaháskóla sem er utan
Evrópska efnahagssvæðisins og Sviss skal leita umsagnar dýralæknaráðs áður en leyfi er
veitt samkvæmt lögunum skv. 2. mgr.
35. gr.
11. gr. laganna orðast svo:
Matvælastofnun skal hafa sex umdæmisskrifstofur og við hverja þeirra skal héraðsdýralæknir ráðinn til starfa, en einnig er heimilt að ráða dýralækna og aðra eftirlitsmenn til aðstoðar ef þess er þörf vegna eftirlits og sjúkdómavarna. Skrifstofur Matvælastofnunar skulu
vera í eftirfarandi umdæmum:
1.
Suðvesturumdæmi: Garðabær, Hafnarfjarðarkaupstaður, Kjósarhreppur, Kópavogsbær,
Mosfellsbær, Reykjavíkurborg, Seltjarnarneskaupstaður, Sveitarfélagið Álftanes,
Grindavíkurbær, Reykjanesbær, Sandgerðisbær, Sveitarfélagið Garður og Sveitarfélagið
Vogar.
2.
Vesturumdæmi: Akranes, Árneshreppur, Bolungarvíkurkaupstaður, Borgarbyggð, Dalabyggð, Eyja- og Miklaholtshreppur, Kaldrananeshreppur, Grundarfjarðarbær, Helgafellssveit, Hvalfjarðarsveit, Ísafjarðarbær, Skorradalshreppur, Snæfellsbær, Stykkishólmsbær, Súðavíkurhreppur, Strandabyggð, Reykhólahreppur, Tálknafjarðarhreppur
og Vesturbyggð.
3.
Norðvesturumdæmi: Akrahreppur, Blönduósbær, Húnaþing vestra, Húnavatnshreppur,
Höfðahreppur, Skagabyggð, Sveitarfélagið Skagafjörður og Bæjarhreppur.
4.
Norðausturumdæmi: Aðaldælahreppur, Akureyrarkaupstaður, Arnarneshreppur, Dalvíkurbyggð, Eyjafjarðarsveit, Fjallabyggð, Grímseyjarhreppur, Grýtubakkahreppur,
Hörgárbyggð, Langanesbyggð, Norðurþing, Skútustaðahreppur, Svalbarðshreppur, Svalbarðsstrandarhreppur, Tjörneshreppur og Þingeyjarsveit.
5.
Austurumdæmi: Borgarfjarðarhreppur, Breiðdalshreppur, Djúpavogshreppur, Fjarðabyggð, Fljótsdalshérað, Fljótsdalshreppur, Seyðisfjarðarkaupstaður, Sveitarfélagið
Hornafjörður og Vopnafjarðarhreppur.
6.
Suðurumdæmi: Ásahreppur, Bláskógabyggð, Flóahreppur, Grímsnes- og Grafningshreppur, Hrunamannahreppur, Hveragerðisbær, Mýrdalshreppur, Rangárþing eystra,
Rangárþing ytra, Skaftárhreppur, Skeiða- og Gnúpverjahreppur, Sveitarfélagið Árborg,
Sveitarfélagið Ölfus og Vestmannaeyjabær.
Héraðsdýralæknar skulu eingöngu sinna opinberum eftirlitsstörfum og hafa m.a. eftirlit
með sláturdýrum, sláturafurðum og afurðastöðvum, eftirlit með heilbrigði, hirðingu, aðbúnaði og aðstöðu nautgripa á búum þar sem framleidd er mjólk til sölu og lyfjanotkun vegna
búfjár, sbr. ákvæði 3. mgr. 11. gr. lyfjalaga. Einnig ber þeim að hafa með höndum framkvæmd sóttvarnaaðgerða í sínum umdæmum. Þeir skulu annast eftirlit með velferð búfjár í
samræmi við lög um búfjárhald. Þá ber þeim að hafa eftirlit með búfé og öðrum dýrum eftir
því sem lög ákveða.
Ráðherra má, þrátt fyrir ákvæði 2. mgr., heimila með reglugerð opinberum eftirlitsdýralæknum að sinna almennri þjónustu við dýraeigendur á tilteknu svæði ef heilbrigði eða velferð dýra er stefnt í hættu enda fáist ekki dýralæknar til að sinna slíkri þjónustu við dýraeigendur á umræddu svæði.
Matvælastofnun getur falið héraðsdýralæknum og öðrum starfsmönnum umdæmisskrifstofa stofnunarinnar að annast önnur eftirlitsverkefni sem stofnuninni eru falin.
Að fengnum tillögum Matvælastofnunar setur ráðherra reglur um gjald sem skal innheimt
fyrir eftirlit og skoðanir héraðsdýralækna og annarra dýralækna og eftirlitsmanna sem starfa
við umdæmisskrifstofur stofnunarinnar.
36. gr.
12. gr. laganna orðast svo:
Til að tryggja almenna þjónustu við dýraeigendur skal dýralæknir jafnan vera á bakvakt
á hverju vaktsvæði, sbr. 3. mgr. Héraðsdýralæknar, hver í sínu umdæmi, skipuleggja bakvaktir í samráði við sjálfstætt starfandi dýralækna sem þar starfa og er heimilt að skipta
bakvakt innan sama vaktsvæðis milli fleiri dýralækna samtímis. Við skipulagningu bakvakta
er ætlast til að tekið sé mið af vegalengdum og umfangi þjónustu innan viðkomandi vaktsvæða. Komi upp ágreiningur um skiptingu bakvakta innan vaktsvæða skal leita úrskurðar
Matvælastofnunar.
Fyrir bakvaktaþjónustu greiðist samkvæmt samningi Dýralæknafélags Íslands við Matvælastofnun, sjávarútvegs- og landbúnaðarráðuneyti og fjármálaráðuneyti.
Vaktsvæði dýralækna eru sem hér greinir:
1.
Akranes, Borgarbyggð, Hvalfjarðarsveit og Skorradalshreppur.
2.
Eyja- og Miklaholtshreppur, Grundarfjarðarbær, Helgafellssveit, Snæfellsbær og
Stykkishólmsbær.
3.
Dalabyggð og Reykhólahreppur.
4.
Árneshreppur, Bolungarvíkurkaupstaður, Ísafjarðarbær, Kaldrananeshreppur, Súðavíkurhreppur, Strandabyggð, Tálknafjarðarhreppur og Vesturbyggð.
5.
Bæjarhreppur, Blönduósbær, Húnaþing vestra, Húnavatnshreppur, Höfðahreppur og
Skagabyggð.
6.
Aðaldælahreppur, Grímseyjarhreppur, Langanesbyggð, Norðurþing, Skútustaðahreppur,
Tjörneshreppur og Þingeyjarsveit.
7.
Borgarfjarðarhreppur, Fjarðabyggð, Fljótsdalshérað, Fljótsdalshreppur, Seyðisfjarðarkaupstaður og Vopnafjarðarhreppur.
8.
Breiðdalshreppur og Djúpavogshreppur.
9.
Sveitarfélagið Hornafjörður.
10.
Mýrdalshreppur, Skaftárhreppur og Vestmannaeyjabær.
Matvælastofnun skal tryggja og skipuleggja vaktir héraðsdýralækna og annarra starfsmanna stofnunarinnar til að bregðast við málum sem upp kunna að koma vegna opinberra
eftirlitsstarfa og sóttvarna. Sjávarútvegs- og landbúnaðarráðherra, að höfðu samráði við fjármálaráðherra, skal setja reglur um greiðslur til Matvælastofnunar vegna þessara vakta.
37. gr.
13. gr. laganna orðast svo:
Í því skyni að tryggja dreifðum byggðum reglubundna dýralæknaþjónustu og bráðaþjónustu skal sjávarútvegs- og landbúnaðarráðherra setja reglugerð um hvernig tryggja skal
starfsaðstöðu og greiðslu staðaruppbótar og/eða ferðakostnaðar dýralæknis sem tekur að sér
að veita slíka þjónustu. Við ákvörðun um hvar þörf er á opinberum greiðslum fyrir dýralæknaþjónustu skal ráðherra hafa samráð við Dýralæknafélag Íslands, Bændasamtök Íslands,
Samband íslenskra sveitarfélaga og Matvælastofnun.
38. gr.
14. gr. laganna orðast svo:
Matvælastofnun skal ráða sérgreinadýralækna, m.a. til að annast störf á sviði sóttvarna,
dýraverndar, dýralyfja, alifuglasjúkdóma, fisksjúkdóma, hrossasjúkdóma, nautgripasjúkdóma, sauðfjársjúkdóma, loðdýrasjúkdóma, svínasjúkdóma, heilbrigðiseftirlits sláturdýra og
sláturafurða og inn- og útflutningseftirlits búfjárafurða og dýra.
Sérgreinadýralæknar skulu vinna að bættu heilbrigði búfjár og sjúkdómavörnum með sértækum aðgerðum, almennri fræðslu, forvarnastarfi og eftirliti með framkvæmd sóttvarnaaðgerða. Sérgreinadýralæknar skulu hafa frumkvæði að sýnatökum, rannsóknum og öðrum
aðgerðum til að stuðla að heilbrigði og velferð dýra og öryggi búfjárafurða.
Sérgreinadýralæknum er óheimilt að stunda ráðgjöf og almennar dýralækningar á sínu
sérsviði og á öðrum sviðum þar sem Matvælastofnun sinnir opinberu eftirliti.
39. gr.
Við lögin bætist nýtt ákvæði til bráðabirgða, svohljóðandi:
Störf héraðsdýralækna hjá Matvælastofnun eru lögð niður við gildistöku þessara laga.
Viðkomandi starfsmönnum skulu boðin störf hjá Matvælastofnun. Ákvæði 7. gr. laga nr.
70/1996, um réttindi og skyldur starfsmanna ríkisins, gildir ekki um störf sem ráðið er í samkvæmt þessu ákvæði.
IV. KAFLI Breytingar á lögum um eldi og heilbrigði sláturdýra, slátrun, vinnslu,
heilbrigðisskoðun og gæðamat á sláturafurðum,
nr. 96/1997, með síðari breytingum.
40. gr.
Við lögin bætist ný grein sem verður 4. gr. a, svohljóðandi:
Lög nr. 93/1995, um matvæli, gilda um slátrun og sláturafurðir. Sama á við um reglugerðir sem settar eru með heimild í þeim lögum.
41. gr.
11. gr. laganna orðast svo:
Heilbrigðisskoðun skal fara fram á öllum sláturdýrum áður en slátrað er. Skoðunina skal
framkvæma innan 24 klukkustunda frá komu í sláturhús og innan 24 klukkustunda fyrir
slátrun. Þá skal heilbrigðisskoðun á öllum sláturafurðum fara fram í sláturhúsinu áður en
frekari vinnsla fer fram eða þær eru afhentar til dreifingar. Að skoðun lokinni skal merkja
allar sláturafurðirnar samkvæmt reglugerð er sjávarútvegs- og landbúnaðarráðherra setur um
heilbrigðisskoðun og merkingu á sláturafurðum að fengnum tillögum Matvælastofnunar.
Fyrir eftirlit samkvæmt lögum þessum skulu sláturleyfishafar greiða eftirlitsgjald sem
ekki er hærra en raunkostnaður við eftirlitið til að standa straum af eftirtöldum kostnaðarþáttum við eftirlitið:
a.
launum starfsfólks sem sinnir störfum vegna eftirlits,
b.
öðrum kostnaði vegna starfsfólks, þ.m.t. vegna aðstöðu, áhalda, búnaðar, þjálfunar,
ferðalaga og tengds kostnaðar, svo sem af bókhalds- og verkskráningarkerfi,
c.
kostnaði við greiningu á rannsóknastofu og sýnatöku.
Matvælastofnun framkvæmir viðbótareftirlit, þar á meðal rannsóknir, með sláturafurðum
og sláturdýrum þegar tiltekin starfsemi eða afurðir sláturleyfishafa eða framleiðanda eru ekki
taldar uppfylla þær almennu og eðlilegu kröfur sem gerðar eru til meðferðar eða heilbrigðis
sláturafurða vegna vísbendinga um smitefni, mengun eða brot gegn heilbrigðis- eða starfsreglum eða skyldra atvika. Raunkostnað af viðbótareftirliti ber sláturleyfishafi eða framleiðandi, eftir því hvaða starfsemi sætir viðbótareftirliti. Framkvæma má viðbótareftirlit þrátt
fyrir að sláturafurðir hafi þegar hlotið heilbrigðisvottun.
Sjávarútvegs- og landbúnaðarráðherra er heimilt að setja reglugerð um framkvæmd og
inntak eftirlits og gefa út gjaldskrá fyrir eftirlitið að fengnum tillögum Matvælastofnunar.
Gjald fyrir eftirlit skal ekki nema lægri fjárhæðum en fram koma í reglugerð Evrópuþingsins
og ráðsins (EB) 882/2004, um opinbert eftirlit til að tryggja sannprófun þess að lög um fóður
og matvæli og reglur um dýraheilbrigði og velferð dýra séu virtar. Ráðherra skal kynna
Landssamtökum sláturleyfishafa og Bændasamtökum Íslands efni og forsendur reglugerðar
og gjaldskrár með a.m.k. eins mánaðar fyrirvara og óska eftir umsögnum þeirra. Hafi umsagnir þeirra ekki borist ráðherra að mánuði liðnum er honum þó heimilt að setja reglugerð
og gjaldskrá án umsagna þeirra. Miða skal við að gjaldskrá verði gefin út með eins árs millibili og taki mið af rekstraruppgjöri heilbrigðiseftirlits fyrir heilt rekstrarár.
Við gerð reglugerðar og gjaldskrár er ráðherra heimilt að taka tillit til:
a.
hvers konar slátrun er um að ræða og viðkomandi áhættuþátta,
b.
hagsmuna sláturleyfishafa með litla framleiðslu,
c.
hefðbundinna aðferða við framleiðslu, vinnslu og dreifingu,
d.
þarfa sláturleyfishafa á svæðum sem líða fyrir tilteknar landfræðilegar takmarkanir.
Eftirlitsgjald skal greiða samkvæmt framlögðum reikningi eftirlitsaðila. Innheimta má
eftirlitsgjaldið með fjárnámi án undanfarins dóms eða sáttar. Matvælastofnun er heimilt að
krefjast dráttarvaxta af ógreiddri fjárkröfu vegna eftirlits frá og með gjalddaga fram að
greiðsludegi.
Þá getur eftirlitsaðili afturkallað starfsleyfi sláturleyfishafa hafi hann verulega vanefnt
greiðslu eftirlitsgjalds eða ef hann er ekki greiðslufær.
Einnig er heimilt að taka gjald vegna raunkostnaðar við sýnatöku og rannsóknir á sláturdýrum og afurðum sem slátrað er með heimild í 4. mgr. 5. gr.
Ákvæði þessarar greinar gilda eftir því sem við á um innheimtu gjalds fyrir eftirlit á landamærastöðvum með innflutningi frá ríkjum utan Evrópska efnahagssvæðisins.
42. gr.
13. gr. laganna fellur brott.
43. gr.
Á eftir 17. gr. laganna kemur ný grein, 17. gr. a, svohljóðandi:
Ráðherra setur með reglugerð ákvæði um meðferð aukaafurða úr sláturdýrum sem skal
vera í samræmi við reglugerð Evrópuþingsins og ráðsins (EB) nr. 1774/2002.
44. gr.
Heiti laganna verður: Lög um slátrun og sláturafurðir.
V. KAFLI
Breytingar á lögum um framleiðslu, vinnslu og dreifingu sjávarafurða,
nr. 55/1998, með síðari breytingum.
45. gr.
Eftirfarandi breytingar verða á 2. gr. laganna:
a.
Skilgreining á „sjávarafurðum“ í 1. mgr. orðast svo: Sjávarafurðir: Sjávarafli og fiskafurðir eins og skilgreint er hér að framan.
b.
Skilgreining á „neysluvatni“ í 2. mgr. orðast svo: Neysluvatn: Vatn í upphaflegu ástandi
eða eftir meðhöndlun, án tillits til uppruna þess og hvort sem það kemur úr dreifikerfi,
tönkum, flöskum eða öðrum ílátum og ætlað er til neyslu, eða matargerðar, einnig allt
vatn sem notað er í matvælafyrirtækjum, nema unnt sé að sýna fram á að gæði þess
vatns sem notað er hafi ekki áhrif á heilnæmi framleiðslunnar.
c.
Við 2. mgr. bætast eftirfarandi skilgreiningar á hugtökum í viðeigandi stafrófsröð:
1.
Smásala: Meðhöndlun og/eða vinnsla sjávarafurða og geymsla þeirra á staðnum þar
sem þau eru seld eða afhent neytanda, þ.m.t. dreifingarstöðvar, matsölufyrirtæki,
mötuneyti starfsfólks, veitingahús og önnur samsvarandi matarþjónusta ásamt verslunum, dreifingarstöðvum stórmarkaða og heildsölumarkaðir.
2.
Stjórnandi: Einstaklingur eða lögaðili sem er ábyrgur fyrir því að farið sé að kröfum
samkvæmt lögum og stjórnvaldsreglum í fyrirtækjum sem annast meðferð, vinnslu
og dreifingu sjávarafurða undir þeirra stjórn.
46. gr.
Á eftir 4. gr. laganna kemur ný grein, 4. gr. a., svohljóðandi:
Lög nr. 93/1995, um matvæli, gilda um sjávar- og eldisafurðir. Sama á við um reglugerðir
sem settar eru með heimild í þeim lögum.
47. gr.
Eftirfarandi breytingar verða á 7. gr. laganna:
a.
Í stað orðanna „íslensk yfirvöld“ í 1. málsl. 1. mgr. kemur: lög og stjórnvaldsreglur.
b.
Í stað orðanna „af íslenskum yfirvöldum“ í 2. mgr. kemur: í lögum og stjórnvaldsreglum.
c.
Í stað orðanna „íslensk yfirvöld heimila“ í 3. mgr. kemur: heimiluð eru í lögum og
stjórnvaldsreglum.
48. gr.
1. mgr. 9. gr. laganna fellur brott.
49. gr.
Við 2. málsl. 11. gr. laganna bætist: og skulu merkingar að öðru leyti vera í samræmi við
13. gr. a laga um matvæli, nr. 93/1995, með síðari breytingum.
50. gr.
Eftirfarandi breytingar verða á 14. gr. laganna:
a.
Orðin „framleiðslustöðvar dýrafóðurs úr sjávarafurðum“ í 1. mgr. falla brott.
b.
Orðin „og samning við faggilta skoðunarstofu, sbr. 16. gr.“ í 3. mgr. falla brott.
51. gr.
Í stað orðanna „Forsvarsmenn vinnslustöðva“ í 1. málsl. 1. mgr. 15. gr. laganna kemur:
Stjórnendur vinnslustöðva, skipa og annarra starfsstöðva.
52. gr.
Eftirfarandi breytingar verða á 16. gr. laganna:
a.
Í stað 1.–4. mgr. kemur ein ný málsgrein, svohljóðandi:
Matvælastofnun er heimilt að fela aðilum sem hlotið hafa faggildingu samkvæmt
lögum um faggildingu o.fl. að annast tiltekin verkefni við framkvæmd eftirlits samkvæmt lögum þessum og skal gerður um það sérstakur samningur í hverju tilviki. Þeir
skulu bundnir þagnarskyldu um það sem þeir fá vitneskju um við framkvæmd eftirlitsins
og leynt á að fara.
b.
7. mgr. orðast svo:
Ráðherra setur með reglugerð nánari ákvæði um skilyrði og störf faggiltra skoðunarstofa samkvæmt lögum þessum.
53. gr.
Orðin „eða fóðurs“ í 1. mgr. 20. gr. laganna falla brott.
54. gr.
21. gr. laganna orðast svo:
Matvælastofnun er heimil skyndiskoðun og sýnataka til rannsókna á lifandi fiski og
sjávarafurðum sem fluttar eru til Íslands frá ríkjum innan Evrópska efnahagssvæðisins enda
sé rökstuddur grunur um að fiskurinn eða afurðirnar séu heilsuspillandi eða óhæfar til neyslu.
Viðtakandi slíkra afurða skal halda dagbók yfir mótteknar sendingar og ganga úr skugga
um að samræmi sé milli þeirra og meðfylgjandi skjala. Varðveita skal vottorð og önnur skilríki þeim viðkomandi í eitt ár svo að unnt sé að framvísa þeim að kröfu eftirlitsaðila.
55. gr.
22. gr. laganna orðast svo:
Allur innflutningur lifandi fisks og sjávarafurða frá ríkjum utan Evrópska efnahagssvæðisins skal fara um landamærastöðvar.
Tilkynna skal Matvælastofnun fyrir fram um slíkan innflutning þar sem getið er um magn,
tegund, áfangastað og hvenær áætlað er að sending berist.
Á landamærastöðvum eða í þeim höfnum sem heimild hafa fengið fyrir innflutningi skal
fara fram athugun á skjölum og samanburður á þeim og sendingu til að sannreyna uppruna
hennar og ákvörðunarstað.
Matvælastofnun skal kanna ástand afurðanna og taka sýni til rannsókna á rannsóknastofu.
Skal Matvælastofnun í þeim efnum fylgja gildandi reglum um tíðni skoðana og um sýnatökur. Komi í ljós við skynmat eða rannsókn að þær séu óhæfar til manneldis skal eyða þeim.
Heimilt er þó að endursenda afurðina að fengnu leyfi yfirvalda í framleiðslulandi eða að nýta
hana í mjöl enda sé hún laus við eiturefni.
Innflytjandi er ábyrgur fyrir þeim kostnaði sem getur fallið til við að endursenda vöru,
geyma hana, taka til annarra nota eða eyða henni.
Vegna innflutnings framangreindra afurða gildir að öðru leyti reglugerð (EB) nr. 882/2004
frá 29. apríl 2004.
56. gr.
Orðin „eða að nýta hana í fiskimjöl“ í 4. málsl. 2. mgr. 26. gr. laganna falla brott.
57. gr.
28. gr. laganna fellur brott ásamt fyrirsögn á undan greininni.
58. gr.
Eftirfarandi breytingar verða á 31. gr. laganna:
a.
Við 1. mgr. bætist nýr málsliður, svohljóðandi: M.a. skal ráðherra setja gjaldskrá fyrir
útgáfu starfsleyfa og staðfestinga og vottorða vegna framkvæmdar á lögum þessum, svo
og fyrir skráningu og móttöku umsókna.
b.
2. mgr. fellur brott.
59. gr.
Á eftir 31. gr. laganna kemur ný grein, 31. gr. a, svohljóðandi:
Fyrir eftirlit samkvæmt lögum þessum skulu framleiðendur greiða eftirlitsgjald sem ekki
er hærra en raunkostnaður við eftirlit til að standa straum af eftirtöldum kostnaðarþáttum við
eftirlitið:
a.
launum starfsfólks sem sinnir störfum vegna eftirlits,
b.
öðrum kostnaði vegna starfsfólks, þ.m.t. vegna aðstöðu, áhalda, búnaðar, þjálfunar,
ferðalaga og tengds kostnaðar, svo sem af bókhalds- og verkskráningarkerfi,
c.
kostnaði við greiningu á rannsóknastofu og sýnatöku.
Eftirlitsaðili framkvæmir viðbótareftirlit með sjávarafurðum, eldisafurðum og aukaafurðum þegar tiltekin starfsemi og afurðir eru ekki taldar uppfylla þær almennu og eðlilegu
kröfur sem gerðar eru til meðferðar eða heilbrigðis afurða vegna vísbendinga um smitefni,
mengun eða brot gegn heilbrigðis- eða starfsreglum eða skyldra atvika. Raunkostnað af viðbótareftirliti ber framleiðandi eftir því hvaða starfsemi sætir viðbótareftirliti. Framkvæma
má viðbótareftirlit þrátt fyrir að afurðir hafi þegar hlotið heilbrigðisvottun.
Sjávarútvegs- og landbúnaðarráðherra er heimilt að setja reglugerð um framkvæmd og
inntak eftirlits Matvælastofnunar og faggiltra eftirlitsaðila og gefa út gjaldskrá fyrir eftirlitið
að fengnum tillögum Matvælastofnunar. Gjald fyrir eftirlit skal ekki nema lægri fjárhæðum
en fram koma í reglugerð Evrópuþingsins og ráðsins (EB) 882/2004, um opinbert eftirlit til
að tryggja sannprófun þess að lög um fóður og matvæli og reglur um dýraheilbrigði og velferð dýra séu virtar.
Ráðherra skal kynna hagsmunaaðilum efni og forsendur reglugerðar og gjaldskrár með
a.m.k. eins mánaðar fyrirvara og óska eftir umsögnum þeirra. Hafi umsagnir þeirra ekki borist ráðherra að mánuði liðnum er honum þó heimilt að setja reglugerð og gjaldskrá án umsagna þeirra. Við gerð reglugerðar og gjaldskrár er ráðherra heimilt að taka tillit til:
a.
hvers konar starfsemi er um að ræða og viðkomandi áhættuþátta,
b.
hagsmuna framleiðenda með litla framleiðslu,
c.
hefðbundinna aðferða við framleiðslu, vinnslu og dreifingu,
d.
þarfa framleiðenda á svæðum sem líða fyrir tilteknar landfræðilegar takmarkanir.
Eftirlitsgjald skal greiða samkvæmt framlögðum reikningi eftirlitsaðila.
Innheimta má eftirlitsgjald með fjárnámi án undanfarins dóms eða sáttar. Eftirlitsaðilum
er heimilt að krefjast dráttarvaxta af ógreiddri fjárkröfu vegna eftirlits frá og með gjalddaga
fram að greiðsludegi. Þá getur eftirlitsaðili afturkallað starfsleyfi matvælafyrirtækis skv. 9.
gr. laga um matvæli hafi hann verulega vanefnt greiðslu eftirlitsgjalds eða ef hann er ekki
greiðslufær.
Einnig er heimilt að taka gjald vegna raunkostnaðar við sýnatöku og rannsóknir af afurðum.
Ákvæði þessarar greinar gilda eftir því sem við á um innheimtu gjalds fyrir eftirlit á landamærastöðvum með innflutningi frá ríkjum utan Evrópska efnahagssvæðisins.
Þá skulu ákvæði þessarar greinar einnig gilda eftir því sem við á um eftirlit sem Matvælastofnun felur faggiltum skoðunarstofum að framkvæma samkvæmt lögum þessum, sbr.
16. gr.
60. gr.
Heiti laganna verður: Lög um sjávar- og eldisafurðir.
VI. KAFLI Breytingar á lögum um eftirlit með fóðri, áburði og sáðvöru,
nr. 22/1994, með síðari breytingum.
61. gr.
Á eftir 2. gr. laganna kemur ný grein, 2. gr. a, svohljóðandi:
Í lögum þessum er merking eftirfarandi hugtaka sem hér segir:
1.
Eftirlitsaðili er Matvælastofnun.
2.
Aukaafurðir úr dýrum eru heil hræ, skrokkar, skrokkhlutar, líffæri eða aðrar afurðir af
dýrum sem ekki eru hæfar eða ætlaðar til manneldis.
3.
Aukefni eru efni eða efnablöndur sem eru notaðar í fóður í því skyni að:
a.
bæta eiginleika dýrafóðurs, fóðurblandna eða dýraafurða eða
b.
bæta frumefnum í fóðrið og stuðla að því að ná tilteknum næringarmarkmiðum eða
mæta sérstakri tilfallandi næringarþörf dýra eða
c.
fullnægja næringarþörf dýra eða bæta búfjárframleiðslu, einkum með því að hafa
áhrif á örveruflóru meltingarvegarins eða niðurbrotshæfni fóðurs, eða
d.
koma í veg fyrir eða draga úr skaðlegum áhrifum húsdýraáburðar eða bæta umhverfi
dýra.
4.
Forblöndur eru blöndur aukefna í fóðri eða blöndur eins eða fleiri aukefna í fóðri við
fóðurefni eða vatn, sem notuð eru sem burðarefni og ekki ætluð til nota beint sem fóður.
5.
Fóður er hvers konar efni eða vörur, einnig aukefni, hvort sem þau eru fullunnin, unnin
að hluta eða óunnin, sem ætluð eru til fóðrunar dýra. Til fóðurs teljast einnig vörur
unnar úr fiski eða fiskúrgangi.
6.
Fóður-, áburðar- eða sáðvörufyrirtæki er fyrirtæki eða einstaklingur sem starfar við
framleiðslu, vinnslu, geymslu, flutning eða dreifingu fóðurs, áburðar og sáðvöru, þ.m.t.
framleiðsla, vinnsla eða geymsla framleiðanda á slíkum vörum til notkunar á eigin bújörð, hvort sem fyrirtækið er rekið í ágóðaskyni eður ei og hvort sem það er einkarekið
eða opinbert fyrirtæki.
7.
Stjórnandi fóður-, áburðar- eða sáðvörufyrirtækis er einstaklingur og lögaðili sem er
ábyrgur fyrir því að farið sé að kröfum samkvæmt lögum og stjórnvaldsfyrirmælum um
fóður, áburð eða sáðvöru í fyrirtækjum undir þeirra stjórn.
8.
Neytandi fóðurs er sá sem notar fóður ekki sem lið í rekstri eða starfsemi fóðurfyrirtækis.
9.
Markaðssetning fóðurs er að hafa umráð yfir fóðri með sölu fyrir augum, þ.m.t. að bjóða
það til sölu eða afhendingar í öðru formi, gegn gjaldi eða endurgjaldslaust, og sjálf
salan, dreifingin eða önnur form afhendingar.
10.
Rekjanleiki fóðurs er sá möguleiki að rekja feril fóðurs, dýra, sem gefa af sér afurðir til
manneldis, og efna, sem nota á eða vænst er að verði notuð í fóður og matvæli í gegnum
öll stig framleiðslu, vinnslu og dreifingar.
62. gr.
2. mgr. 3. gr. laganna fellur brott
63. gr.
4. gr. laganna orðast svo:
Fóður-, áburðar- eða sáðvörufyrirtæki skulu tilkynna eftirlitsaðila um starfsemi sína áður
en starfsemi hefst. Óheimilt er að skrá fóður-, áburðar- eða sáðvörufyrirtæki sem ekki sýna
fram á fullnægjandi aðstöðu fyrir þá starfsemi sem tilkynnt er um.
Fóðurfyrirtæki sem nota aukefni eða forblöndur í fóðurvörur eða vinna fóður úr aukaafurðum dýra skulu hafa starfsleyfi frá eftirlitsaðila, og skulu þau sækja um starfsleyfi áður
en starfsemi hefst. Heimilt er að skilyrða starfsleyfi.
Gefa skal út starfsleyfi til tiltekins tíma, enda uppfylli starfsemin skilyrði laga og stjórnvaldsfyrirmæla sem um hana gilda. Óheimilt er að hefja starfsleyfisskylda starfsemi hafi
starfsleyfi fyrir hana ekki verið gefið út. Stjórnanda ber að veita eftirlitsaðila upplýsingar um
fyrirhugaðar breytingar á starfsemi sem varðað geta ákvæði starfsleyfis með hæfilegum
fyrirvara. Eftirlitsaðila er heimilt að endurskoða starfsleyfi áður en gildistími þess er liðinn
vegna breyttra forsendna, svo sem ef breytingar verða á rekstrinum eða vegna tækniþróunar
eða breytinga á reglum um öryggi fóðurs eða framkvæmd fóðureftirlits.
64. gr.
Við lögin bætist ný grein, 6. gr. a, svohljóðandi:
Leiki rökstuddur grunur á að tiltekið fóður, áburður eða sáðvara hafi í för með sér áhættu
fyrir heilbrigði manna eða dýra skulu eftirlitsaðilar upplýsa almenning um eðli áhættunnar
fyrir heilsu dýra eða manna. Slíkar ráðstafanir eftirlitsaðila skulu miðast við eðli, alvarleika
og umfang áhættunnar. Tilgreina skal eins nákvæmlega og unnt er fóður, áburð og sáðvöru
sem um er að ræða, tegund vörunnar, þá áhættu sem kann að vera á ferðum og ráðstafanir
sem hafa verið gerðar eða verða gerðar á næstunni til að fyrirbyggja, draga úr eða eyða
þessari áhættu.
Ráðherra er heimilt að setja reglugerð um opinbera birtingu niðurstaðna vegna eftirlits
sem fer fram vegna eftirlits skv. 1. mgr.
Jafnframt er ráðherra heimilt að setja með reglugerð reglur um birtingu niðurstaðna almenns eftirlits með fóðri, áburði eða sáðvöru. Ráðherra getur m.a. ákveðið að kæra fresti
ekki réttaráhrifum opinberrar birtingar og jafnframt ákveðið að vissum upplýsingum sé haldið leyndum. Slíkar reglur skulu kveða á um framsetningu og inntak birtingarinnar, m.a. að
birtingin sé rafræn og á hvaða tímamarki skuli birta slíkar upplýsingar. Heimilt er að birta
niðurstöður eftirlits er varða eitt matvælafyrirtæki eða fleiri í senn eftir atvikum.
65. gr.
7. gr. laganna orðast svo:
Til þess að tryggja framkvæmd laga þessara setur ráðherra reglugerðir um atriði sem lög
þessi ná til og varða fóður, áburð og sáðvöru. Þar skal m.a. kveðið nánar á um framleiðslu
og markaðssetningu, hollustuhætti í framleiðslu, rekjanleika fóðurs, merkingar og vörulýsingar, efnainnihald, sýnatökur, viðmiðunarmörk fyrir örverufræðilega þætti og óæskileg efni,
umbúðir og pökkun, eftirlit eftirlitsaðila, innra eftirlit, meðferð aukaafurða dýra, innflutning
fóðurs, áburðar og sáðvöru frá þriðju ríkjum og starfsemi landamærastöðva vegna fóðurs,
hraðviðvörunarkerfi og stjórnun vegna neyðartilvika.
Ráðherra er heimilt að innleiða með reglugerð reglugerð Evrópuþingsins og ráðsins (EB)
nr. 178/2002, frá 28. janúar 2002, um almennar meginreglur og kröfur um matvæli, um stofnun Matvælaöryggisstofnunar Evrópu og um málsmeðferð vegna öryggis matvæla, sbr. ákvörðun sameiginlegu EES-nefndarinnar frá 27. október 2007 nr. 134/2007. Reglugerðir
EB sem teknar verða upp í samninginn um Evrópska efnahagssvæðið og fela í sér breytingar
eða viðbætur við reglugerð Evrópuþingsins og ráðsins (EB) nr. 178/2002, frá 28. janúar
2002, er einnig heimilt að innleiða með reglugerð. Sama gildir um reglugerðir sem settar eru
með tilvísun í reglugerðina.
Ráðherra er heimilt að innleiða með reglugerð reglugerð Evrópuþingsins og ráðsins (EB)
nr. 183/2005, frá 12. janúar 2005, um hollustuhætti í fóðuriðnaði, sbr. ákvörðun sameiginlegu EES-nefndarinnar frá 27. október 2007 nr. 138/2007. Reglugerðir EB sem teknar verða
upp í samninginn um Evrópska efnahagssvæðið og fela í sér breytingar eða viðbætur við
framangreinda reglugerð Evrópuþingsins og ráðsins (EB) er einnig heimilt að innleiða með
reglugerð. Sama gildir um reglugerðir sem settar eru með tilvísun í reglugerðina.
Ráðherra er heimilt að innleiða með reglugerð reglugerð Evrópuþingsins og ráðsins (EB)
nr. 882/2004, frá 29. apríl 2004, um opinbert eftirlit til að tryggja sannprófun þess að lög um
fóður og matvæli og reglur um dýraheilbrigði og velferð dýra séu virtar, sbr. ákvörðun sameiginlegu EES-nefndarinnar frá 27. október 2007 nr. 137/2007. Reglugerðir EB sem teknar
verða upp í samninginn um Evrópska efnahagssvæðið og fela í sér breytingar eða viðbætur
við framangreindar reglugerðir Evrópuþingsins og ráðsins (EB) er einnig heimilt að innleiða
með reglugerð. Sama gildir um reglugerðir sem settar eru með tilvísun í þessar reglugerðir
EB.
Heimilt er ráðherra að innleiða með reglugerð reglugerð Evrópuþingsins og ráðsins (EB)
nr. 1774/2002, frá 3. október 2002, um heilbrigðisreglur um aukaafurðir úr dýrum sem ekki
eru ætlaðar til manneldis, sbr. ákvörðun sameiginlegu EES-nefndarinnar frá 27. október 2007
nr. 135/2007 og nr. 136/2007. Reglugerðir EB sem teknar verða upp í samninginn um Evrópska efnahagssvæðið og fela í sér breytingar eða viðbætur við reglugerð Evrópuþingsins
og ráðsins (EB) nr. 1774/2002, er einnig heimilt að innleiða með reglugerð. Sama gildir um
reglugerðir sem settar eru með tilvísun í reglugerðina.
66. gr.
Fyrirsögn II. kafla laganna verður: Skráningarskylda og starfsleyfi, eftirlit og reglugerðarheimild.
67. gr.
Á eftir 7. gr. laganna kemur nýr kafli, III. kafli, Reglur um fóður, með átta nýjum
greinum, 7. gr. a – 7. gr. h, svohljóðandi, og breytast önnur kaflanúmer samkvæmt því:
a. (7. gr. a.)
Fóður sem ekki er öruggt skal ekki markaðssetja né gefa dýrum sem gefa af sér afurðir
til manneldis. Fóður telst ekki öruggt til fyrirhugaðrar notkunar ef það er álitið heilsuspillandi fyrir menn og dýr eða verða þess valdandi að matvæli af dýrum sem gefa af sér afurðir
til manneldis verða óhæf til manneldis. Ef fóður, sem staðfest hefur verið að standist ekki
kröfur um öryggi fóðurs, er hluti af framleiðslueiningu, lotu eða sendingu matvæla í sama
flokki eða með sömu einkenni skal gert ráð fyrir að ekkert fóður í þeirri framleiðslueiningu,
lotu eða sendingu standist kröfurnar nema ítarlegt mat hafi leitt í ljós að engar vísbendingar
séu um að afgangurinn af framleiðslueiningunni, lotunni eða sendingunni standist ekki kröfur
um öryggi fóðurs.
b. (7. gr. b.)
Dýraprótein sem unnið er úr aukaafurðum úr dýrum má ekki nota í fóður eða til fóðurgerðar fyrir dýr sem alin eru upp til manneldis. Einungis er heimilt að nota slík dýraprótein
til að framleiða fóður fyrir loðdýr, gæludýr og önnur dýr sem ekki eru alin til manneldis, og
þá aðeins ef efnasamsetning, framleiðsluaðferðir, geymsla, flutningur og aðrar sérkröfur
vegna þessara aukaafurða er í samræmi við reglugerð Evrópuþingsins og ráðsins (EB) nr.
1774/2002 frá 3. október 2002.
Þrátt fyrir ákvæði 1. mgr. er heimilt að nota dýraprótein sem búið er til úr fiski sem fóður
eða til fóðurgerðar fyrir jórturdýr.
Þó er bannað að fóðra dýr á dýrapróteini sem er unnið úr dýrum eða afurðum dýra af sömu
tegund.
Að öðru leyti gildir reglugerð Evrópuþingsins og ráðsins (EB) nr. 1774/2002 um notkun
aukaafurða úr dýrum sem ekki eru ætlaðar til manneldis til fóðrunar eða fóðurgerðar.
Ráðherra setur með reglugerð ákvæði um notkun á fóðri og áburði sem búinn er til úr
aukaafurðum úr dýrum. Þar er ráðherra heimilt að flokka þessar afurðir í áhættuflokka allt
eftir því hversu mikil hætta stafar af þeim varðandi útbreiðslu á smitsjúkdómum, sem og að
banna notkun á einstökum flokkum ef slíkt reynist nauðsynlegt til að koma í veg fyrir útbreiðslu smitsjúkdóma.
c. (7. gr. c.)
Stjórnandi fóðurfyrirtækis ber ábyrgð á að uppfylltar séu kröfur laga og stjórnvaldsreglna
sem gilda um starfsemi þess á hverjum tíma. Stjórnandi bera ábyrgð á öllum stigum framleiðslu, vinnslu og dreifingar í fyrirtæki undir hans stjórn og skal sannprófa að þessum kröfum sé fullnægt.
d. (7. gr. d.)
Ef stjórnandi fóðurfyrirtækis álítur eða hefur ástæðu til að álíta að fóður, sem hann hefur
flutt inn, framleitt, tilreitt, unnið eða dreift, sé ekki í samræmi við kröfur um öryggi fóðurs
skal hann tafarlaust gera ráðstafanir til að taka umrætt fóður af markaðnum og tilkynna það
hlutaðeigandi eftirlitsaðilum. Í þessum tilvikum eða þar sem framleiðslueiningin, lotan eða
vörusendingin stenst ekki kröfur um öryggi fóðurs skal farga fóðrinu nema eftirlitsaðili fallist
á aðra lausn. Stjórnandi skal upplýsa notendur fóðursins á skilvirkan og nákvæman hátt um
ástæðurnar fyrir því að það var tekið af markaðnum og, ef nauðsyn krefur, innkalla vörur sem
þeim hafa þegar verið afhentar ef aðrar ráðstafanir nægja ekki til þess að tryggja víðtæka
heilsuvernd.
Stjórnandi fóðurfyrirtækis, sem ber ábyrgð á smásölu eða dreifingarstarfsemi sem hefur
ekki áhrif á umbúðir, merkingu, öryggi eða heilleika fóðursins, skal gera ráðstafanir, innan
þeirra marka sem ráðast af viðkomandi starfsemi, til að taka vörur af markaðnum ef þær eru
ekki í samræmi við kröfur um öryggi fóðurs og stuðla að öryggi matvæla með því að veita
þær upplýsingar sem þarf til að rekja feril tiltekins fóðurs í samvinnu við framleiðendur,
vinnsluaðila og/eða eftirlitsaðila.
Álíti stjórnandi fóðurfyrirtækis eða hafi hann ástæðu til að álíta að tiltekið fóður, sem
hann hefur markaðssett, standist ekki kröfur um öryggi fóðurs skal hann þegar í stað tilkynna
það eftirlitsaðila. Stjórnendur skulu tilkynna yfirvöldum um aðgerðir til að fyrirbyggja hættu
vegna notkunar þessa fóðurs. Þeir skulu jafnframt eiga allt það samstarf við yfirvöld sem
dregið getur úr eða eytt áhættu vegna viðkomandi fóðurs.
e. (7. gr. e.)
Á öllum stigum framleiðslu, vinnslu og dreifingar skal vera fyrir hendi möguleiki á að
rekja feril fóðurs dýra sem gefa af sér afurðir til manneldis og hvers kyns efna sem nota á eða
vænst er að verði notuð í fóður. Stjórnandi fóðurfyrirtækis skal geta tilgreint alla einstaklinga
og lögaðila sem hafa afhent því matvæli, fóður, dýr sem gefur af sér afurðir til manneldis eða
hvers kyns efni sem nota á eða vænst er að verði notuð í matvæli eða fóður. Einnig skal
stjórnandi geta tilgreint fyrirtæki sem fóðurfyrirtækið hefur afhent vörur sínar. Í þessu skyni
skulu umræddir stjórnendur hafa yfir að ráða kerfum og verklagsreglum til að gera framangreindar upplýsingar aðgengilegar eftirlitsaðilum að beiðni þeirra. Þá skulu fóðurvörur vera
merktar og auðkenndar á viðeigandi hátt til að auðveldara verði að rekja feril þeirra með
aðstoð viðeigandi skjala eða upplýsinga í samræmi við fyrrgreindar kröfur.
f. (7. gr. f.)
Í sérstökum tilvikum þar sem mat á fyrirliggjandi upplýsingum leiðir í ljós möguleika á
heilsuspillandi áhrifum fóðurs en vísindaleg óvissa ríkir áfram er ráðherra heimilt að samþykkja nauðsynlegar bráðabirgðaráðstafanir til að tryggja heilsu almennings vegna hugsanlegra heilsuspillandi áhrifa fóðurs.
Ráðstafanir, sem eru samþykktar á grundvelli 1. mgr., skulu vera í réttu hlutfalli við markmiðið og ekki hamla viðskiptum meira en nauðsynlegt er. Ráðstafanirnar skulu endurskoðaðar innan eðlilegs tíma miðað við eðli þeirrar áhættu fyrir líf eða heilsu manna sem greind
hefur verið og þá tegund vísindalegra upplýsinga sem þarf til að eyða vísindalegri óvissu og
til að framkvæma umfangsmeira áhættumat.
Varúðar- og varnaraðgerðir skv. 1. mgr. geta náð til alls landsins eða hluta þess. Skal
ráðherra hafa samráð við Matvælastofnun áður en til slíkra aðgerða er gripið.
g. (7. gr. g.)
Leitast skal við að vernda hagsmuni neytenda og gefa neytendum kost á upplýstu vali með
tilliti til fóðurs sem þeir nota. Þannig skal leitast við að fyrirbyggja framleiðslu og markaðssetningu svikins fóðurs, sviksamlegar eða villandi starfsvenjur og aðrar starfsvenjur sem
gætu villt um fyrir neytendum.
Óheimilt er að villa um fyrir neytendum með merkingu, auglýsingu og framsetningu fóðurs, þ.m.t. lögun þess, útliti eða umbúðum og umbúðaefni, hvernig þeim er fyrir komið og
í hvaða umhverfi það er sýnt sem og upplýsingarnar sem eru veittar um það.
h. (7. gr. h.)
Allur innflutningur fóðurs frá ríkjum utan Evrópska efnahagssvæðisins skal fara um
landamærastöðvar.
Tilkynna skal eftirlitsaðila fyrir fram um slíkan innflutning þar sem getið er um magn,
tegund, áfangastað og hvenær áætlað er að sending berist.
Á landamærastöðvum eða í þeim höfnum sem heimild hafa fengið fyrir innflutningi skal
fara fram athugun á skjölum og samanburður á þeim og sendingu til að sannreyna uppruna
hennar og ákvörðunarstað.
Eftirlitsaðili skal kanna ástand fóðursins og taka sýni til rannsókna á rannsóknastofu. Skal
hann í þeim efnum fylgja gildandi reglum um tíðni skoðana og um sýnatökur. Komi í ljós við
skynmat eða rannsókn að fóðrið sé heilsuspillandi fyrir menn og dýr og verða þess valdandi
að matvæli af dýrum sem gefa af sér afurðir til manneldis verða óhæf til manneldis skal eyða þeim. Heimilt er þó að endursenda afurðina að fengnu leyfi yfirvalda í útflutningslandi eða
að nýta hana í mjöl enda sé hún laus við eiturefni.
Innflytjandi er ábyrgur fyrir þeim kostnaði sem getur fallið til við að endursenda vöru,
geyma hana, taka til annarra nota eða eyða henni.
68. gr.
8. gr. laganna orðast svo:
Fyrir eftirlit samkvæmt lögum þessum skulu fóður-, áburðar- og sáðvörufyrirtæki greiða
eftirlitsgjald sem ekki er hærra en raunkostnaður við eftirlitið til að standa straum af eftirtöldum kostnaðarþáttum við eftirlit með fóðri, áburði eða sáðvöru:
a.
launum starfsfólks sem sinnir störfum vegna eftirlits,
b.
öðrum kostnaði vegna starfsfólks, þ.m.t. vegna aðstöðu, áhalda, búnaðar, þjálfunar,
ferðalaga og tengds kostnaðar, svo sem af bókhalds- og verkskráningarkerfi,
c.
kostnaði við greiningu á rannsóknastofu og sýnatöku.
Eftirlitsaðili framkvæmir viðbótareftirlit, þar á meðal rannsóknir, með vöru þegar tiltekin
starfsemi eða vara fyrirtækis er ekki talin uppfylla þær almennu og eðlilegu kröfur sem
gerðar eru til meðferðar eða heilbrigðis vara vegna vísbendinga um smitefni, mengun eða
brot gegn heilbrigðis- eða starfsreglum eða skyldra atvika. Raunkostnað af viðbótareftirliti
ber fóður-, áburðar- eða sáðvörufyrirtæki. Framkvæma má viðbótareftirlit þrátt fyrir að afurðir eða vara hafi þegar hlotið heilbrigðisvottun.
Ráðherra er heimilt að setja reglugerð um framkvæmd og inntak eftirlits og gefa út gjaldskrá fyrir eftirlitið að fengnum tillögum eftirlitsaðila. Ráðherra skal afla umsagnar hagsmunaaðila og kynna þeim efni og forsendur reglugerðar og/eða gjaldskrár með a.m.k. eins
mánaðar fyrirvara. Hafi umsagnir þeirra ekki borist ráðherra að mánuði liðnum er honum þó
heimilt að setja reglugerð og gjaldskrá án umsagna þeirra. Miða skal við að gjaldskrá verði
gefin út með eins árs millibili og taki mið af rekstraruppgjöri eftirlitsins fyrir heilt rekstrarár.
Við gerð reglugerðar og gjaldskrár er ráðherra heimilt að taka tillit til:
a.
hvers konar framleiðslu um er að ræða og viðkomandi áhættuþátta,
b.
hagsmuna framleiðanda með litla framleiðslu,
c.
hefðbundinna aðferða við framleiðslu, vinnslu og dreifingu
d.
þarfa framleiðenda á svæðum sem líða fyrir tilteknar landfræðilegar takmarkanir.
Eftirlitsgjald skal greiða samkvæmt framlögðum reikningi eftirlitsaðila. Innheimta má
eftirlitsgjaldið með fjárnámi án undanfarins dóms eða sáttar. Eftirlitsaðilum er heimilt að
krefjast dráttarvaxta af ógreiddri fjárkröfu vegna eftirlits frá og með gjalddaga fram að
greiðsludegi. Þá getur eftirlitsaðili afturkallað starfsleyfi fóðurfyrirtækis skv. 4. gr. hafi það
verulega vanefnt greiðslu eftirlitsgjalds eða ef það er ekki greiðslufært.
69. gr.
Á eftir 8. gr. laganna kemur ný grein, 8. gr. a, svohljóðandi:
Ráðherra skal setja gjaldskrá vegna útgáfu starfsleyfa og vottorða vegna framkvæmdar
á lögum þessum, svo og vegna skráningar og móttöku umsókna. Gjaldskrá skal taka mið af
kostnaði sem hlýst af útgáfu starfsleyfa og vottorða, skráningu og móttöku umsókna og
leyfisveitingum og má ákvörðun gjalds ekki vera hærri en sá kostnaður.
70. gr.
Fyrirsögn III. kafla laganna er verður IV. kafli verður: Eftirlitsgjald vegna fóðurs,
áburðar og sáðvöru.
71. gr.
Í stað 9. gr. laganna koma fimm nýjar greinar sem verða 9. gr. og 9. gr. a – 9. gr. e, svohljóðandi:
a. (9. gr.)
Eftirlitsaðila er heimilt að stöðva starfsemi að hluta eða í heild ef rökstuddur grunur er um
að fóður, áburður eða sáðvara sé heilsuspillandi fyrir menn og dýr og verði þess valdandi að
matvæli af dýrum sem gefa af sér afurðir til manneldis verða óhæf til manneldis. Sama gildir
ef um er að ræða starfsemi sem starfar án tilskilins leyfis eða hefur ekki sinnt tilkynningarskyldu skv. 4. gr.
Einnig er eftirlitsaðila heimilt að gefa fyrirmæli um afmengun fóðurs, stöðva eða takmarka framleiðslu og markaðssetningu fóðurs, áburðar eða sáðvöru og leggja hald á slíka
vöru þegar rökstuddur grunur er um að varan uppfylli ekki ákvæði í vörulýsingu, ákvæðum
laga þessara eða reglugerða settra samkvæmt þeim. Þegar eftirlitsaðilar leggja hald á fóður,
áburð eða sáðvöru er þeim heimil förgun vörunnar sé það talið nauðsynlegt.
Þá getur eftirlitsaðili jafnframt til að knýja á um aðgerðir samkvæmt lögum þessum, reglugerðum eða eigin fyrirmælum samkvæmt þessum ákvæðum beitt eftirfarandi aðgerðum:
1.
veitt áminningu,
2.
veitt áminningu og tilhlýðilegan frest til úrbóta.
Stöðvun starfsemi og förgun á vörum skal því aðeins beitt að um alvarlegri tilvik eða
ítrekað brot sé að ræða eða ef aðilar sinna ekki úrbótum innan tiltekins frests og er heimilt
að leita aðstoðar lögreglu ef með þarf. Sé um slík brot að ræða getur eftirlitsaðili afturkallað
leyfi viðkomandi fyrirtækis til reksturs skv. 4. gr.
b. (9. gr. a.)
Þegar stjórnandi sinnir ekki fyrirmælum innan tiltekins frests getur eftirlitsaðili ákveðið
fyrirtæki dagsektir þar til úrbætur hafa verið framkvæmdar. Dagsektir renna í ríkissjóð og
skal hámark þeirra ákveðið í reglugerð sem ráðherra setur. Jafnframt er eftirlitsaðila heimilt
að láta vinna verk á kostnað hins vinnuskylda ef fyrirmæli um framkvæmd eru vanrækt og
skal kostnaður þá greiddur til bráðabirgða af viðkomandi eftirlitsaðila en innheimtast síðar
hjá hlutaðeigandi fyrirtæki. Kostnað og dagsektir má innheimta með fjárnámi án dóms eða
sáttar.
c. (9. gr. b.)
Eftirlitsaðila skal heimill aðgangur til skoðunar og eftirlits, þar á meðal töku sýna og
myndatöku, að öllum þeim stöðum sem lög þessi, reglugerðir og samþykktir ná yfir og er
heimilt að leita aðstoðar lögreglu ef með þarf.
Einnig er eftirlitsaðila heimilt að taka sýni þar sem starfsemi fer fram og lög þessi, reglugerðir settar samkvæmt þeim og samþykktir ná til.
Stjórnanda er skylt að veita aðstoð við framkvæmd eftirlitsins og veita allar upplýsingar
sem nauðsynlegar eru vegna eftirlits með framkvæmd laganna og ber þeim endurgjaldslaust
að afhenda sýni sem talin eru nauðsynleg vegna eftirlits. Þá getur eftirlitsaðili ákveðið að fyrirtæki skuli greiða allan kostnað vegna þvingunarrúræða sem framkvæmd eru samkvæmt
lögum þessum og má innheimta slíkan kostnað með fjárnámi án dóms eða sáttar.
d. (9. gr. c.)
Telji Matvælastofnun svo alvarlega hættu stafa af tiltekinni starfrækslu eða notkun að
aðgerð þoli enga bið er henni heimilt til bráðabirgða að stöðva starfsemi eða notkun þegar
í stað, með aðstoð lögreglu ef þurfa þykir.
e. (9. gr. d.)
Við meðferð mála skv. 9. gr., 9. gr. a, 9. gr. b og 9. gr. c skal fara eftir ákvæðum
stjórnsýslulaga og öðrum reglum stjórnsýsluréttar.
f. (9. gr. e.)
Brot gegn ákvæðum þessara laga og stjórnvaldsreglum settum samkvæmt þeim varða sektum hvort sem þau eru framin af ásetningi eða stórfelldu gáleysi. Sé um stórfelld eða ítrekuð
ásetningsbrot að ræða skulu þau að auki varða fangelsi allt að tveimur árum.
Sektir má ákvarða lögaðila þó að sök verði ekki sönnuð á stjórnanda eða starfsmenn hans
eða aðra þá einstaklinga sem í þágu hans starfa, enda hafi brotið orðið eða getað orðið til
hagsbóta fyrir lögaðilann. Þó skal lögaðili ekki sæta refsingu ef um óhapp er að ræða. Einnig
má, með sömu skilyrðum, gera lögaðila sekt ef stjórnandi eða starfsmenn hans eða aðrir einstaklingar sem í þágu hans starfa gerast sekir um brot.
Mál út af brotum skv. 1. og 2. mgr. skulu sæta meðferð opinberra mála.
72. gr.
Fyrirsögn IV. kafla laganna er verður V. kafli verður: Þvingunarúrræði og refsiákvæði.
VII. KAFLI
Staðfesting og gildistaka.
73. gr.
Ríkisstjórninni er heimilt að staðfesta fyrir Íslands hönd eftirfarandi ákvarðanir sameiginlegu EES-nefndarinnar frá 26. október 2007: nr. 133/2007, nr. 134/2007, nr. 135/2007, nr.
136/2007, nr. 137/2007 og nr. 138/2007.
74. gr.
Lög þessi öðlast gildi 27. apríl 2008 að undanskildum II.–IV. kafla sem öðlast gildi 27.
október 2009.
Athugasemdir við lagafrumvarp þetta.
I. Inngangur.
Þann 23. október 2007 heimilaði ríkisstjórnin staðfestingu á sex ákvörðunum sameiginlegu EES-nefndarinnar sem fela í sér breytingar á viðaukum og bókunum við EES-samninginn. Efnislega var um að ræða endurskoðun á undanþágu Íslands frá I. kafla í viðauka I
við EES-samninginn og upptöku löggjafar Evrópusambandsins (hér eftir skammstafað ESB)
um matvæli og fóður inn í EES-samninginn.
Framangreindar ákvarðanir sameiginlegu EES-nefndarinnar voru staðfestar af nefndinni
þann 26. október 2007 með fyrirvara um samþykki Alþingis. Lagafrumvarp þetta kveður á um þær lagabreytingar sem nauðsynlegar eru vegna framangreindra breytinga á EES-samningnum og innleiðingar fyrrgreindrar EES-löggjafar um matvæli og fóður.
Ákvarðanir sameiginlegu EES-nefndarinnar eru eftirfarandi:
a.
Ákvörðun nr. 133/2007 sem varðar endurskoðun á þeim undanþágum sem Ísland hefur
haft frá I. kafla í viðauka I við EES-samninginn, en þar er að finna þær ESB-gerðir sem
taka til heilbrigðis dýra og dýraafurða. Samþykkt þessarar ákvörðunar að því er varðar
Ísland hefur í för með sér að Ísland mun framvegis framfylgja reglum ESB-á þessu sviði
að því er varðar búfjárafurðir til viðbótar við núverandi framkvæmd á reglunum er
snerta sjávarafurðir. Þessar breytingar á EES-samningnum munu auka frelsi til innflutnings búfjárafurða á grundvelli heilbrigðiskrafna.
b.
Ákvarðanir nr. 134/2007 og nr. 137/2007 sem varða heildarendurskoðun á matvælalöggjöf ESB. Önnur varðar reglugerð ESB nr. 178/2002/EB um matvælalöggjöf, fæðuöryggi og Matvælaöryggisstofnun Evrópu (EFSA). Hin fjallar um reglugerðir ESB og
varðar opinbert eftirlit með matvælum og fóðri og hollustuhætti við framleiðslu og dreifingu matvæla. Tekið skal fram að þær ESB-reglugerðir sem hér um ræðir koma í stað
tilskipana sem þegar er að finna í EES-samningnum, að undanskildum nýjum skuldbindingum Íslands að því er varðar búfjárafurðir, en þær er þó einnig þegar að finna í EES-
samningnum, þar sem Noregur hefur ekki notið þeirra undantekninga sem íslensk stjórnvöld gera. Ýmsar veigamiklar breytingar felast hins vegar í nýrri og endurskoðaðri löggjöf ESB á þessu sviði sem innleiða þarf hér á landi og koma í framkvæmd við eftirlit
með matvælum og fóðri.
c.
Ákvarðanir nr. 135/2007 og nr. 136/2007 sem fjalla um aukaafurðir eða úrgang frá dýrum sem ekki er ætlaður til manneldis.
d.
Ákvörðun nr. 138/2007 sem fjallar um innleiðingu reglugerðar Evrópuþingsins og ráðsins (EB) nr. 183/2005, um hollustuhætti í fóðuriðnaði, auk afleiddra gerða.
II.
Undanþága Íslands frá kafla I í viðauka I við EES-samninginn – ákvörðun nr.
133/2007.
Í I. kafla í viðauka I við EES-samninginn er að finna þær ESB-gerðir sem taka til heilbrigðis dýra og dýraafurða. Þessar gerðir fjalla um kjöt og kjötafurðir, fisk og fiskafurðir,
mjólk, egg og afurðir úr þeim, dýrasjúkdóma, verslun með lifandi dýr, flutning á sæði og
erfðavísum milli ríkja og um hormóna. Af heilbrigðisástæðum, einkum í þágu sjúkdómavarna, var á sínum tíma samið um að Ísland hefði undanþágu frá upptöku allra gerða í þessum kafla. Síðar voru reglur varðandi fiskafurðir teknar yfir.
Framkvæmdastjórn ESB setti það sem skilyrði fyrir yfirtöku á nýju matvælalöggjöfinni
og þátttöku í Matvælaöryggisstofnun Evrópu (EFSA) að fyrrgreind undanþága varðandi
búfjárafurðir yrði endurskoðuð. Meginrökin fyrir þessu voru að ekki yrði lengur hægt að
greina á milli búfjárafurða, sjávarafurða og annarra matvæla með sama hætti og áður, eftir
að ný matvælalöggjöf ESB öðlast gildi, þar sem þær samræmdu reglur ná yfir matvælakeðjuna í heild sinni, án þess að skilja á milli einstakra tegunda matvæla. Með samþykkt
ríkisstjórnarinnar var fallist á að hefja viðræður við ESB um endurskoðun á undanþágu Íslands og lauk þeim með endanlegu samkomulagi á sumarmánuðum 2007. Endurspeglar þessi
ákvörðun niðurstöðu þess samkomulags.
Í ákvörðun nr. 133/2007 vegna endurskoðunar á undanþágunni er gert ráð fyrir almennum
aðlögunartíma, allt að 18 mánuðum frá gildistöku ákvörðunarinnar, til að innleiða gerðir er
varða búfjárafurðir. Helstu atriði ákvörðunar 133/2007 eru eftirfarandi:
A. Frelsi til innflutnings búfjárafurða mun aukast. Búfjárafurðir fá sömu lagalegu stöðu
hvað heilbrigðisreglur varðar og fiskur og fiskafurðir hafa haft. Hluti þeirra vörutegunda sem
áður hefur verið óheimilt að flytja til landsins eða einungis er heimilt að flytja inn með
sérstakri heimild mun verða heimilaður á grundvelli heilbrigðiskrafna EES-löggjafar. Samkvæmt hinni nýju löggjöf verður Ísland hluti af innri markaði ESB hvað matvæli varðar, en
ekki þriðja ríki eins og hingað til hefur verið og settar verða upp landamærastöðvar vegna
kjöt- og mjólkurvara eins og gert hefur verið með fisk.
B. Á Íslandi verður áfram heimilt að fóðra jórturdýr með fiskimjöli þrátt fyrir gildandi
bann þess efnis innan ESB.
C. Ekki verður þörf á að fjarlægja áhættuvefi við slátrun þar sem Ísland er laust við kúariðu.
D. Ísland getur áfram bannað innflutning á beina-, blóð- og kjötmjöli.
E. Ísland þarf að innleiða sérstakar reglur sem varða líflömb á bæi þar sem skorið hefur
verið niður vegna riðu.
F. Ekki er gert ráð fyrir að reglur um dýravernd verði teknar yfir, nema hvað varðar
aðbúnað og aðferðir við slátrun dýra.
G. Ekki er vikið frá banni Íslands á innflutningi lifandi dýra þar sem enn eru talin standa
rök til slíks banns á grundvelli heilbrigðisástæðna.
H. Breytingin hefur engin áhrif á það fyrirkomulag sem er við lýði á innflutningi búfjárafurða að því er varðar tolla.
Íslensk yfirvöld hafa frest til 27. október 2009 til þess að innleiða þær gerðir ákvörðunarinnar sem gilda um búfjárafurðir, kjöt, mjólk og egg. Þennan tíma þarf að nota til að aðlaga
ýmis stjórnvaldsfyrirmæli að löggjöf EBS og breyta lagaframkvæmd. Unnið er að því að fá
svokallaðar „viðbótartryggingar“ vegna salmonellu sem þýðir að ESB tekur tillit til þess hve
salmonellusýkingar eru fátíðar á Íslandi. Slíkar viðbótartryggingar þýða að takmarka má
tiltekinn innflutning til að fyrirbyggja útbreiðslu tiltekins sjúkdóms
III. Reglugerð Evrópusambandsins um matvælalöggjöf, fæðuöryggi og Matvælaöryggisstofnun Evrópu (EFSA) – ákvörðun nr. 134/2007. Ávörðun nr. 134/2007 fjallar um reglugerð Evrópuþingsins og ráðsins (EB) nr. 178/2002
auk afleiddra gerða. Undirbúningur reglugerðar (EB) nr. 178/2002, um almennar meginreglur
og kröfur samkvæmt lögum um matvæli, um stofnun Matvælaöryggisstofnunar Evrópu og
um málsmeðferð vegna öryggis matvæla, átti sér langan aðdraganda hjá ESB. Fyrst var gefin
út svokölluð grænbók á árunum 1996–1997 og síðar hvítbók 1999. Þessi skjöl voru send til
fjölmargra ríkja til umsagnar, m.a. Íslands. Reglugerðin tók gildi í febrúar 2002 innan ESB,
en gildistöku tiltekinna ákvæða hennar var þó frestað fram til 1. janúar 2005.
Með reglugerðinni voru settar heildarreglur um fæðuöryggi frá frumframleiðslu til markaðssetningar matvæla og var einnig kveðið á um stofnun Matvælaöryggisstofnunar Evrópu
(EFSA). EFSA er ætlað mikilvægt hlutverk, m.a. að gefa út vísindaleg álit og áhættumat um
allt er varðar matvæli og heilbrigði dýra.
Með reglugerðinni er leitast við að gera regluverk um framleiðslu matvæla einfaldara og
skilvirkara. Gildir reglugerðin á öllum stigum framleiðslu, vinnslu og dreifingar matvæla og
fóðurs. Lögð er áhersla á að samræma löggjöf og eftirlit með matvælum „frá hafi og haga til
maga“. Skulu sömu reglur gilda um hollustuhætti óháð því hvort um er að ræða framleiðslu
eða dreifingu á kjöti, fiski, matjurtum eða unnum matvælum.
Meginmarkmið reglugerðarinnar er að efla fæðuöryggi og tryggja þannig hnökralaus viðskipti með örugg matvæli á innri markaðinum. Hagsmunir neytenda eru settir í öndvegi og
munu reglur um rekjanleika matvæla leika stórt hlutverk. Með þeim mun verða mögulegt að
rekja feril matvæla á öllum stigum framleiðslu og dreifingar. Ábyrgð framleiðenda og dreifingaraðila gagnvart neytendum matvæla er dregin skýrt fram. Þá er lögð mikil áhersla á skjót
viðbrögð í alvarlegum tilfellum, en ESB hefur sætt gagnrýni fyrir seinagang þegar upp hafa
komið atvik sem krafist hafa skjótra viðbragða. Með reglugerðinni er reynt að bregðast við
því með ýmsu móti. Er m.a. gert ráð fyrir sérstökum neyðarráðstöfunum og almennri áætlun
fyrir áfallastjórnun sem nær bæði til matvæla og fóðurs.
Reglugerðin gerir ráð fyrir að ráðstafanir sem aðildarríkin og framkvæmdastjórnin (ESB)
samþykkja viðvíkjandi matvælum og fóðri skuli að jafnaði byggjast á áhættugreiningu.
Með reglugerðinni er kveðið á um stofnun EFSA. Stofnun þessi hefur nú starfað í fimm
ár, safnað saman upplýsingum frá aðildarríkjunum, samræmt vinnu þeirra, framkvæmt
áhættumat og gert tillögur til úrbóta þegar þess var þörf. Stofnunin er ráðgefandi og hefur
hvorki löggjafar- né eftirlitshlutverk. Hins vegar er ljóst að bæði framkvæmdastjórn og aðildarríki ESB hafa leitað eftir áliti EFSA og tekið tillit til stofnunarinnar og þess starfs sem
þar er unnið. Almennt er talið að stofnunin muni gegna lykilhlutverki á fæðuöryggissviðinu
og starf hennar muni hafa mikil áhrif á lagasetningu, starfshætti sem varða eftirlit og einnig
framleiðslu og markaðssetningu matvæla í framtíðinni. Ísland mun taka fullan þátt í starfi
og stjórn stofnunarinnar.
Rétt er að geta þess að þær reglur sem hér um ræðir, svo og gildandi reglur EES-samningsins, gera ráð fyrir að unnt sé að grípa til neyðarráðstafana undir sérstökum kringumstæðum. Í reglugerð 178/2002/EB er fjallað um slíkar heimildir í 53. og 54. gr. Almenna reglan
er að ef upp koma sjúkdómar eða annað hættuástand sem getur haft áhrif á heilsu manna eða
dýra er ætlast til að viðkomandi ríki og/eða framkvæmdastjórn ESB grípi strax til viðeigandi
varúðarráðstafana. Telji eitthvert ríki á EES-svæðinu að þessar ráðstafanir séu ekki nægilegar
til að vernda heilsu manna og dýra getur það gripið til neyðarráðstafana, svo sem að stöðva
innflutning á ákveðnum vörum. Skýrt skal tekið fram að við framkvæmd slíkra neyðarráðstafana er rík sönnunarbyrði lögð á viðkomandi ríki að rökstyðja nauðsyn framkvæmdarinnar
og skal ákvörðunin byggð á áhættugreiningu. Ef fullnægjandi vísindaleg gögn liggja ekki
fyrir er í vissum tilvikum hægt að grípa til tímabundinna varúðarráðstafana, sbr. 7. gr. (varúðarregla), en slíkar ákvarðanir ber að endurskoða eins fljótt og unnt er.
IV. Löggjöf um opinbert eftirlit og um hollustuhætti við framleiðslu og dreifingu matvæla – ákvörðun nr. 137/2007.
Ákvörðunin kveður á um upptöku tveggja reglugerða um hollustuhætti við framleiðslu og
dreifingu matvæla og tveggja reglugerða um opinbert eftirlit með fóðri og matvælum. Með
þessum reglugerðum var löggjöf ESB á þessu sviði samræmd og einfölduð því gerðirnar
koma í stað sautján eldri tilskipana sem felldar voru úr gildi. Löggjöfin tekur til fóðurframleiðslu og til allrar matvælaframleiðslu, þ.m.t. fisks og fiskafurða og nær yfir matvælakeðjuna í heild frá frumframleiðslu til tilbúinna matvæla. Lögð er áhersla á að neytendum
séu tryggð örugg matvæli, að matvælaframleiðendur og dreifingaraðilar beri ábyrgð á framleiðslu sinni, eftirlit opinberra aðila byggist á áhættumati, rekjanleiki fóðurs og matvæla sé
tryggður og að öll stjórnsýsla sé gegnsæ.
Samkvæmt nýju löggjöfinni verður opinbert fóðureftirlit víðtækara en áður, því nú skal
hafa eftirlit með öllum sem framleiða, flytja eða höndla með fóður. Þetta þýðir m.a. að allir bændur og öll flutningsfyrirtæki falla undir fóðureftirlit Matvælastofnunar, en það er breyting frá því sem nú er.
Nýja löggjöfin mun hafa lítil áhrif varðandi byggingar og búnað mjólkurstöðva, sláturhúsa
og kjötpökkunarstöðva því allar mjólkurstöðvar nema ein, langflest sauðfjársláturhús og
mörg stórgripasláturhús hafa nú þegar útflutningsleyfi á ESB-markað og hafa því þurft að
uppfylla ákvæði þessarar löggjafar hingað til. Áhrif löggjafarinnar verða hins vegar meiri
fyrir opinbert eftirlit og verða þau t.d. mikil fyrir heilbrigðisskoðun á sláturafurðum. Það
mun hafa í för með sér meiri viðveru kjötskoðunarlækna eða menntaðs aðstoðarfólks og þar
með meiri kostnað. Auka þarf heilbrigðisskoðun í alifuglasláturhúsum og bæta verulega
menntun aðstoðarfólks við heilbrigðisskoðun í sauðfjársláturhúsum. Í viðbót við núverandi
eftirlit Matvælastofnunar með salmonellu í alifugla- og svínakjöti þarf að koma á eftirliti
með salmonellu í nautakjöti og eggjum, svo unnt verði að fá viðbótartryggingar vegna
salmonellusmits í innfluttum vörum. Jafnframt þarf að auka aðskotaefnaeftirlit með alifuglakjöti og með eggjum. Það liggur ljóst fyrir að aukið eftirlit leiðir til aukins kostnaðar.
Ísland mun þurfa að gera eftirlitsáætlun til fleiri ára í senn (multi annual) fyrir allt opinbert eftirlit með fóðri og matvælum. Þetta er nýmæli hér á landi og mun hafa í för með sér
aukinn kostnað. Áætlun þessi skal vera samræmd fyrir allt eftirlit í fæðukeðjunni frá frumframleiðslu til tilbúinna matvæla og skal hún einnig ná til fóðureftirlits.
Samkvæmt löggjöfinni má ekki vera hætta á hagsmunaárekstrum eftirlitsaðila og eftirlitsþola. Margir héraðsdýralæknar sinna í dag bæði opinberu eftirliti og almennri dýralæknaþjónustu og því þarf að breyta lögum um dýralækna þannig að opinberir eftirlitsdýralæknar
sinni aðeins eftirliti og ekki dýralæknaþjónustu.
Gert er ráð fyrir að síðar verði samið um að Ísland geti krafist viðbótartrygginga vegna
salmonellusmits í innfluttum dýraafurðum (svo sem kjöti og eggjum) þegar Ísland hefur sýnt
fram á að það hafi aðgerðaáætlun þar að lútandi. Sérstök yfirlýsing frá íslenskum stjórnvöldum um þetta atriði fylgir ákvörðun sameiginlegu EES-nefndarinnar um upptöku viðkomandi
gerða í EES-samninginn.
Íslensk yfirvöld hafa frest til 27. október 2009 til þess að innleiða þær gerðir ákvörðunarinnar sem gilda um búfjárafurðir, kjöt, mjólk og egg. Þennan tíma þarf að nota til að aðlaga
lög og stjórnvaldsfyrirmæli að löggjöf ESB og til þess að breyta lagaframkvæmd.
Helstu reglugerðir EB sem ákvörðun nr. 137/2005 fjallar um eru:
Reglugerð nr. 852/2004 frá 29. apríl 2004 um hollustuhætti í matvælaiðnaði.
Reglugerðin fjallar almennt um öll matvæli og er beint að matvælafyrirtækjum og stjórnendum þeirra sem bera frumábyrgð á að tryggja að allar kröfur séu uppfylltar til að tryggja
matvælaöryggi í allri matvælakeðjunni frá hafi og haga til maga. Fyrirtæki sem framleiða
matvæli úr dýraafurðum verða jafnframt að fara eftir reglugerð (EB) nr. 853/2004.
Hlutverk lögbærs eftirlitsaðila er að sannreyna að fyrirtækið uppfylli kröfur reglugerðarinnar og skal eftirlitsaðili gera það samkvæmt ákvæðum reglugerðar nr. 882/2004 og þegar
um dýraafurðir er að ræða samkvæmt reglugerð ESB nr. 854/2004 sem fjallað er um hér síðar. Skýrt er tekið fram að innflutt matvæli verða að uppfylla kröfur samkvæmt reglugerð nr.
178/2002 og öðrum ESB-gerðum vegna matvæla.
Gildissvið reglugerðarinnar er frá hafi og haga til maga nema á eftirfarandi sviðum þar
sem ætlast er til að ríkin setji sér eigin reglur:
–
Frumframleiðslu til eigin nota svo sem fiskur, villibráð, heimaslátrun, berjatínsla og
grænmeti.
–
Unnum afurðum úr frumframleiðslu til eigin nota.
–
Sölu framleiðanda á litlu magni af eigin framleiðslu beint til neytenda eða í litlar verslanir á heimasvæði sem selja beint til neytenda.
Reglugerð nr. 853/2204 um sérstakar reglur um hollustuhætti sem varða matvæli úr dýraríkinu.
Reglugerðin fjallar um heilbrigðisákvarðanir fyrir fyrirtæki sem framleiða matvæli af
dýrauppruna; kjöt, fisk, mjólk og egg. Helsta markmið reglugerðarinnar er að setja ítarlegri
reglur fyrir matvæli af dýrauppruna og er hún til fyllingar reglugerð ESB nr. 852/2004 um
heilbrigði allra matvæla. Verið er að samþætta og einfalda reglur um framleiðslu matvæla
sem nú er að finna í mörgum mismunandi gerðum.
Reglugerð nr. 854/2004 um sérstakar reglur um opinbert eftirlit með afurðum úr dýraríkinu
sem eru ætlaðar til manneldis.
Reglugerðin snýr að yfirvöldum sem hafa eftirlit með framleiðendum matvæla af dýrauppruna. Eftirlit yfirvalda skal ná til allra mikilvægra þátta sem varða heilbrigði fólks og þar
sem við á heilbrigði dýra og dýravelferð. Yfirvöld skulu framkvæma sérstakar skoðanir til
að tryggja þessa þætti.
Reglugerð nr. 882/2004 frá 29. apríl 2004 um opinbert eftirlit til að tryggja sannprófun þess
að lög um fóður og matvæli og reglur um dýraheilbrigði og velferð dýra séu virtar.
Helsta gildissvið er opinbert eftirlit í ESB-löndum með fóðri, dýraheilbrigði og dýravelferð og sambærilegt eftirlit við innflutning til ESB frá þriðju ríkjum. Skoða verður ákvæði
þessarar gerðar með hliðsjón af ákvæðum matvælareglugerðar (EB) nr. 178/2002, heilbrigðisreglugerða nr. 852/2004, 853/2004, 854/2004 og reglugerðar EB nr. 183/2005 um
fóðurheilbrigði.
V. Aukaafurðir úr matvælum – ákvarðanir nr. 135/2007 og 136/2007.
Ákvörðun nr. 135/2007 innleiðir reglugerð Evrópuþingsins og ráðsins (EB) nr. 1774/2002
auk afleiddra gerða. Reglugerð (EB) nr. 1774/2002 (Animal by-products) er víðtæk og fjallar
um reglur til verndar heilbrigði dýra og manna. Í reglugerðinni er að finna ákvæði um söfnun, flutning, meðhöndlun, markaðssetningu, vinnslu og notkun eða förgun á úrgangi frá
dýrum sem ekki er ætlaður til manneldis (aukaafurðir). Jafnframt gilda reglurnar um úrgang
sem fellur til við alþjóðlega flutningastarfsemi, sem og almennan eldhúsúrgang.
Með setningu reglugerðar hér á landi um meðferð og nýtingu á slátur- og dýraleifum nr.
820/2007 voru margar af efnisreglum reglugerðar (EB) nr. 1774/2002 innleiddar í íslenskt
lagaumhverfi. Regluverkið í gerðinni er þó bæði mun víðtækara og ítarlegra en í reglugerð
nr. 820/2007.
Í reglugerð (EB) nr. 1774/2002 er einnig að finna ákvæði sem skylda alla sem senda, flytja
eða taka við aukaafurðum úr dýrum að halda skrá yfir sendingarnar. Mikinn fjölda viðskiptaskjala (heilbrigðisvottorða) er að finna í reglugerðinni og ljóst að skjalavinna fyrir hagsmunaaðila og hið opinbera mun aukast umtalsvert hér á landi við innleiðingu þessarar reglugerðar.
Samkvæmt reglugerð (EB) nr. 1774/2002 verða íslensk yfirvöld skuldbundin til þess að
farga úrgangi sem tilkominn er vegna riðu með brennslu. Jafnframt verður að álykta svo að yfirvöldum sé skylt að sjá til þess að slík aðstaða sé fyrir hendi, en svo er ekki hér á landi.
Ákvörðun nr. 136/2007 fjallar jafnframt um afleiddar gerðir reglugerðar (EB) nr. 1774/2002.
Íslensk yfirvöld hafa frest til 27. október 2009 til þess að innleiða þær gerðir ákvörðunarinnar sem gilda um búfjárafurðir, kjöt, mjólk og egg. Þennan tíma þarf að nota til að
aðlaga stjórnvaldsfyrirmæli að löggjöf ESB og til þess að breyta lagaframkvæmd. Efnisákvæði reglugerðar (EB) nr. 1774/2002 um aukaafurðir vegna fisks og fóðurs öðlast gildi 27.
apríl 2008.
VI. Löggjöf um hollustuhætti í fóðuriðnaði – ákvörðun nr. 138/2007.
Ákvörðunin innleiðir í íslenska löggjöf reglugerð nr. 183/2005 frá 12. janúar 2005 um
hollustuhætti í fóðuriðnaði.
Reglugerðin fjallar um fóður og er beint að fóðurfyrirtækjum og stjórnendum þeirra sem
bera frumábyrgð á að tryggja að allar kröfur séu uppfylltar til að tryggja fóðuröryggi. Fóðuröryggi er grundvöllur matvælaöryggis en dýraheilbrigði hefur stóru hlutverki að gegna í hollustu matvæla. Fóðurfyrirtæki eru tilkynningarskyld til yfirvalda og sum þurfa á starfsleyfi
að halda. Þetta er nauðsynlegt m.a. til að tryggja rekjanleika fóðurs á öllum stigum. Reglugerðin nær til fóðurframleiðslu og eftir atvikum til markaðssetningar eða útflutnings fóðurs.
Hlutverk lögbærs eftirlitsaðila er að sannreyna að fyrirtækið uppfylli kröfur reglugerðarinnar
og skal eftirlitsaðili gera það samkvæmt ákvæðum reglugerðar nr. 882/2004. Fóðurfyrirtækjum ber hins vegar að hafa kerfi innra eftirlits með sama hætti og matvælafyrirtæki.
VII. Helstu efnisatriði frumvarpsins eftir köflum.
Í I. og VI. kafla frumvarpsins eru tekin upp ýmis mikilvæg ákvæði reglugerðar (EB) nr.
178/2002 í lög um matvæli, nr. 93/1995, og í lög um fóður, nr. 22/1994. Hér er um að ræða
skilgreiningar hugtaka og ákvæði um öryggi matvæla og fóðurs, ábyrgð stjórnenda matvæla-
og fóðurfyrirtækja, rekjanleika matvæla og fóðurs, varúðarreglur og upplýsingar til almennings. Í þessum köflum eru gjaldskrárákvæði vegna matvæla og fóðurs í samræmi við ákvæði
reglugerðar (EB) nr. 882/2004. Nánar er fjallað um ákvæðum frumvarpsins vegna eftirlitsgjalda í VII. kafla þessara athugasemda. Jafnframt er gert ráð fyrir ákvæði um viðbrögð við
matarsýkingum og matareitrunum. Gert er ráð fyrir ítarlegri reglugerðarheimild í frumvarpinu þar sem ráðherra er veitt heimild til þess að innleiða helstu reglugerðir ESB vegna matvæla- og fóðurlöggjafar auk breytingagerða.
Í II. kafla frumvarpsins er fjallað um breytingar á 10. gr. laga um dýrasjúkdóma og varnir
gegn þeim, nr. 25/1993, með síðari breytingum. Með þessari lagabreytingu er innflutningsbann vegna heilbrigðiskrafna flestra vara sem rekja má til afurða úr dýraríkinu fellt brott.
Meginreglan verður sú að heimilt verður að flytja þessar vörur til landsins uppfylli varan
skilyrði Evrópusambandsins um heilbrigðisvottun. Jafnframt er í þessum kafla ákvæði um
smithættu vegna aukaafurða dýra sem ekki eru ætlaðar til manneldis. Ráðherra er jafnframt
veit heimild til þess að setja reglugerðir um flutning líflamba og innleiðing reglugerðar EB
nr. 1774/2002.
Í III. kafla er fjallað um breytingar á lögum um dýralækna og heilbrigðisþjónustu við dýr,
nr. 66/1998, með síðari breytingum. Í reglugerð (EB) nr. 882/2004 er aðildarríkjum EES gert
skylt að tryggja að ekki geti orðið hagsmunaárekstrar við opinbert eftirlit eftirlitsaðila, þar
á meðal dýralækna. Frumvarpið gerir því ráð fyrir nauðsynlegum lagabreytingum til að uppfylla kröfur reglugerðarinnar um aðskilnað opinbers eftirlits og faglegrar/klíniskrar þjónustu
dýralækna. Í tengslum við þessar breytingar verða verulegar breytingar á starfssvæðum héraðsdýralækna. Ný skipan kallar á breytingar á störfum héraðsdýralækna og endurspegla
ákvæði þessa kafla þessar breytingar. Í kaflanum er ákvæði til bráðbirgða sem fjallar um
niðurlagningu starfa héraðsdýralækna.
Í IV. kafla frumvarpsins er fjallað um breytingar á lögum um eldi og heilbrigði sláturdýra,
slátrun, vinnslu, heilbrigðisskoðun og gæðamat á sláturafurðum, nr. 96/1997, með síðari
breytingum. Um er að ræða lagabreytingar vegna reglugerðar EB nr. 882/2004 um opinbert
eftirlit til að tryggja að uppfylltar séu kröfur laga um fóður og matvæli og um reglur varðandi
dýraheilbrigði og dýravernd. Lagabreytingarnar varða fresti vegna heilbrigðisskoðunar í
sláturhúsum og gjaldskrárákvæði vegna eftirlits. Í VII. kafla þessara athugasemda er gerð
sérstök grein fyrir ákvæðum frumvarpsins vegna eftirlitsgjalda.
Í V. kafla frumvarpsins er fjallað um breytingar á lögum um framleiðslu, vinnslu og dreifingu sjávarafurða, nr. 55/1998, með síðari breytingum. Lagabreytingarnar fela í sér að
ákvæði laganna eru aðlöguð að þeim reglugerðum Evrópuþingsins og ráðsins sem gerð er
grein fyrir í almennum athugasemdum og eru tilefni þessa frumvarps, einkum reglugerðum
(EB) nr. 178/2002 og 882/2004. Í samræmi við VI. kafla frumvarpsins eru efnisákvæði um
fiskimjöl felld út úr lögunum enda munu lög nr. 22/1994, um eftirlit með fóðri, áburði og
sáðvöru, gilda um fiskimjöl, sbr. hér síðar. Einnig er leitast við að tryggja að ákvæði laganna
geti einnig gilt um aukaafurðir úr sjávarafurðum og eldisafurðum sem ekki eru ætlaðar til
manneldis.
Í VI. kafla frumvarpsins eru ákvæði um breytingar á lögum um eftirlit með fóðri, áburði
og sáðvöru, nr. 22/1994, með síðari breytingum. Lagabreytingarnar fela í sér að ákvæði laganna eru að löguð að þeim reglugerðum Evrópuþingsins og ráðsins sem gerð er grein fyrir
í almennum athugasemdum og eru tilefni þessa frumvarps, einkum reglugerðum (EB) nr.
178/2002, 183/2005 og 882/2004. Það nýmæli er í þessum kafla frumvarpsins að fískimjöl
er nú skilgreint sem fóður þannig að lög nr. 22/1994, um eftirlit með fóðri, áburði og sáðvöru, og EES-löggjöf um fóður gildir um fiskimjöl. Núgildandi reglur um fiskimjöl er að
finna í lögum um framleiðslu, vinnslu og dreifingu sjávarafurða, nr. 55/1998.
Einnig er leitast við að tryggja að ákvæði laganna geti gilt um aukaafurðir úr dýraafurðum,
sem ekki eru ætlaðar til manneldis, sbr. reglugerð (EB) nr. 1774/2002.
Í VII. kafla frumvarpsins eru ákvæði um heimild ríkisstjórnarinnar til að staðfesta þær
ákvarðanir sameiginlegu EES-nefndarinnar sem hér eru til umfjöllunar. Umræddar ákvarðanir voru samþykktar af íslenskum stjórnvöldum með stjórnskipulegum fyrirvara vegna
þeirra lagabreytinga sem ákvarðanirnar kalla á. Í VII. kafla frumvarpsins er einnig að finna
gildistökuákvæði. Lögin munu taka gildi 27. apríl 2008 hvað varðar allar matvælategundir
aðrar en kjöt, mjólk og egg. Hvað þessar matvælategundir varðar og afurðir úr kjöti, mjólk
og eggjum taka lögin gildi eigi síðar en 27. október 2009. Gildistökuákvæðin miðast við þann
tíma sem EB-gerðir þær sem frumvarpinu er ætlað að heimila innleiðingu á, taka gildi hér
á landi sem er mismunandi eftir einstökum matvælategundum.
VIII. Gjaldskrárákvæði laga nr. 93/1995, nr. 22/1994, nr. 96/1997 og nr. 55/1998.
Með frumvarpinu er lögð til breyting á gjaldtökuákvæðum 25. gr. laga nr. 93/1995, um
matvæli og 11. gr. laga nr. 96/1997, um eldi og heilbrigði sláturdýra, slátrun, vinnslu, heilbrigðisskoðun og gæðamat á sláturafurðum. Frumvarpið gerir ráð fyrir sambærilegu ákvæði
í lögum nr. 93/1995, um matvæli, lögum nr. 22/1994, um eftirlit með fóðri, áburði og sáðvöru, og einnig í lögum nr. 55/1998, um meðferð, vinnslu og dreifingu sjávarafurða.
Gjald er tekið vegna kostnaðar við heilbrigðiseftirlit hjá matvæla- og fóðurfyrirtækjum
og í sláturhúsum. Þessi fjögur ákvæði frumvarpsins eru í samræmi við reglugerð EB nr. 882/
2004.
Í frumvarpinu er gert ráð fyrir að sjávarútvegs- og landbúnaðarráðherra setji gjaldskrá
fyrir eftirlitið sem byggist á raunkostnaði við það. Þó er gert ráð fyrir því að sveitarfélögin
setji gjaldskrár fyrir matvælaeftirlit viðkomandi heilbrigðisnefndar. Þetta er í samræmi við
efnisákvæði 12. gr. laga nr. 7/1998, um hollustuhætti og mengunarvarnir, og a-liðar 4. tölul.
27. gr. reglugerðar (EB) 882/2004. Í dag eru eftirlitsgjöld reiknuð með ýmsum hætti. Í tilviki
eftirlits með sláturafurðum ákveður Alþingi með lögum þá krónutölu sem greiða skal fyrir
eftirlit með hverju kílói innvegins kjöts í sláturhúsi, en sú krónutala hefur verið óbreytt frá
árinu 2002.
Þá er í frumvarpinu gert ráð fyrir samræmdu ákvæði um gjaldtöku fyrir landamæraeftirlit
með innflutningi frá ríkjum utan Evrópska efnahagssvæðisins.
Með frumvarpinu er nánar tilgreint hvaða kostnaði tekjum af eftirlitsgjaldinu er ætlað að
standa undir. Gert er ráð fyrir að sérstakur sjóður sem var í vörslu Landbúnaðarstofnunar,
nú Matvælastofnunar, verði lagður niður en að tekjur af gjaldinu renni þess í stað beint til
Matvælatofnunar sem sér um eftirlitið í samræmi við framangreint.
IX. Eftirlitsaðilar með matvælum og fóðri.
Matvælastofnun og heilbrigðisnefndir sveitarfélaganna hafa eftirlit með matvælum samkvæmt lögum nr. 93/1995, um matvæli, sbr. I. kafla frumvarpsins. Matvælastofnun hefur
jafnframt eftirlit með matvælum samkvæmt lögum nr. 96/1997, um eldi og heilbrigði sláturdýra, slátrun, vinnslu, heilbrigðisskoðun og gæðamat á sláturafurðum, skv. IV. kafla frumvarpsins, og lögum nr. 55/1998, um framleiðslu, vinnslu og dreifingu sjávarafurða.
Matvælastofnun hefur auk eftirlits með matvælum eftirlit með fóðri samkvæmt lögum nr.
22/1994, um eftirlit með fóðri, áburði og sáðvöru.
Eftirlit Matvælastofnunar er skilgreint í 6. gr. laga nr. 93/1995, um matvæli. Þar kemur
fram að Matvælastofnun hefur með höndum eftirlit með frumframleiðslu matvæla og allt inn-
og útflutningseftirlit á matvælum frá löndum utan Evrópska efnahagssvæðisins. Annað
eftirlit með framleiðslu og dreifingu matvæla en tilgreint er í framangreindri 6. gr. annast
heilbrigðisnefndir sveitarfélaganna skv. 22. gr. sömu laga. Þetta eftirlit heilbrigðisnefndanna
er undir yfirumsjón Matvælastofnunar samkvæmt lagagreininni.
Almennt má segja að heilbrigðisnefndir sveitarfélaganna sinni eftirliti með smásölu matvæla auk eftirlits með tilteknum framleiðslufyrirtækjum á sviði matvæla. Heilbrigðisnefndir
sveitarfélaganna munu samkvæmt frumvarpi þessu sinna eftirfarandi eftirliti auk núverandi
matvælaeftirlits:
a.
Eftirliti með kjöti, mjólk og eggjum í smásölu sem flutt eru inn frá löndum innan Evrópska efnahagssvæðisins. Ekki verður um að ræða innflutningseftirlit á sama hátt og
verið hefur þar sem frelsi er til flutnings þessara vara milli landa innan Evrópska efnahagssvæðisins nema í undantekningartilvikum skv. 17. gr. frumvarpsins.
b.
Eftirliti með eggjum eftir að þau yfirgefa framleiðslustað.
c.
Eftirliti með smásölu fæðubótaefna en ekki verður um eiginlegt innflutningseftirlit með
slíkum matvælum af sömu ástæðu og tilgreint hefur verið í a-lið hér að ofan.
Matvælastofnun mun hins vegar sinna öðrum þáttum matvælaeftirlits vegna a–d-liðar, þar
á meðal inn- og útflutningseftirliti með þessum matvælum enda komi þau frá löndum utan
hins Evrópska efnahagssvæðis.
Fyrir liggur ítarlegt kostnaðarmat Matvælastofnunar vegna frumvarpsins þar sem farið er
yfir kostnaðarþætti sem falla til vegna frumvarpsins.
Matvælastofnun og heilbrigðisnefndir sveitarfélaganna skulu skv. 15. gr. frumvarpsins
innheimta gjöld vegna matvælaeftirlits sem miðast við raunkostnað þess. Ráðherra setur
gjaldskrá vegna eftirlits Matvælastofnunar en viðkomandi sveitarfélag setur gjaldskrá fyrir
matvælaeftirlit heilbrigðisnefndar. Samkvæmt þessu munu eftirlitsþolar greiða raunkostnað
vegna eftirlits og því ætti ekki að falla til aukinn kostnaður á sveitarfélögin vegna breytinga
á matvælaeftirliti heilbrigðisnefnda.
Athugasemdir við einstakar greinar frumvarpsins.
Um 1. gr.
Meginmarkmið matvælalöggjafar Evrópusambandsins er matvælaöryggi. Til að ná þessu
markmiði er kveðið á um ítarlegt eftirlit með framleiðslu og markaðsetningu matvæla. Jafnframt eru reglur um rekjanleika dýraafurða og annara matvæla auk ákvæða um vernd neytenda matvæla. Yfirvöld geta einnig gripið til varúðar- og varnaraðgerða til að tryggja heilsu
almennings vegna hugsanlegra heilsuspillandi áhrifa matvæla. Lagt er til að að síðasti málsliður 1. gr. laganna sem breytt er með 1. gr. frumvarpsins endurspegli þessar áherslur löggjafarinnar og kveði á um rekjanleika afurða og vara og neytendavernd, auk heimildar til
varnaraðgerða, enda mikilvæg úrræði til að ná markmiðum laganna.
Um 2. gr.
Orðalagi 1. mgr. 2. gr. laganna er breytt til samræmis við 3. tölul. 1. gr. reglugerðar Evrópuþingsins og ráðsins (EB) nr. 178/2002. Síðasti málsliður 1. mgr. er þó óbreyttur frá núgildandi lögum. Í síðasta málslið 2. mgr. 2. gr. er skýrt kveðið á um að lögin gildi ekki um
plöntur fyrir uppskeru og lifandi dýr nema þau séu meðhöndluð til markaðssetningar til
manneldis. Þetta er í samræmi við b–c-lið 2. gr. reglugerðar (EB) nr. 178/2002. Núgildandi
lög um matvæli gilda ekki um fóður. Gert er ráð fyrir því í þessu frumvarpi að svo verði
áfram enda þótt reglugerð (EB) nr. 178/2002 gildi bæði um matvæli og fóður. Fóðurlöggjöf
reglugerðar (EB) nr. 178/2002 er innleidd með breytingum á lögum nr. 22/1994, um eftirlit
með fóðri, áburði og sáðvöru. Sérstaklega er tekið fram í ákvæðinu að frumvarpið taki til
fæðubótaefna. Núgildandi lög hafa ekki kveðið skýrt á um þetta.
Um 3. gr.
Í ákvæðinu eru skilgreind nokkur hugtök sem notuð eru í frumvarpinu. Hugtakið matvæli
er skilgreint upp á nýtt í samræmi við skilgreiningu reglugerðar nr. 178/2002. Fæðubótarefni
eru nú skilgreind sem matvæli. Í frumvarpinu er jafnframt skilgreining á því hvað séu fæðubótarefni. Ef fæðubótarefni innheldur efni sem telst lyf samkvæmt lyfjalögum er ekki um
fæðubótarefni að ræða og því óheimilt að markaðsetja það sem slíkt. Nauðsynlegt þótti að
skilgreina hugtakið „eftirlitsaðili“ sérstaklega og „neysluvatn“, en það er skilgreint eins og
í tilskipun (EB) nr. 98/83/EB. Aðrar skilgreiningar frumvarpsins eru samhljóða skilgreiningum í reglugerð (EB) nr. 178/2002. Ekki er talið að aðrar skilgreiningar í núverandi lögum
stangist á við hugtök sem notuð eru í matvælalöggjöf Evrópusambandsins.
Um 4. gr.
Hér er a-lið gildandi ákvæðis 6. gr. laganna eins og hann er með þeim breytingum sem
gerðar voru á lögunum með lögum nr. 167/2007, um tilfærslu verkefna innan Stjórnarráðs Íslands, skipt í tvo stafliði til einföldunar og glöggvunar í framkvæmd. Frumframleiðsla er
skilgreind í 3. gr. frumvarpsins. Með frumframleiðslu í 4. gr. frumvarpsins er m.a. átt við
framleiðslu matjurta og er þá átt við það ferli sem verður frá og með uppskeru og geymslu
þar til kemur að pökkun og dreifingu. Pökkun og dreifing matjurta er því samkvæmt þessu
háð eftirliti heilbrigðisnefnda sveitarfélaganna. Með frumframleiðslu eggja er átt við ferlið
sem verður frá útungun dags gamalla alifugla og við eldi þeirra, svo og tínslu neyslueggja,
þvott, flokkun, pökkun og geymslu eggja á framleiðslustað. Egg lúta því eftirliti heilbrigðisnefnda sveitarfélaganna þegar þau yfirgefa framleiðslustað. Varðandi aðrar búfjárafurðir
felur hugtakið frumframleiðsla í sér mjöltun og eldi dýra til slátrunar, ásamt flutningi og öðru
sem þetta varðar, áður en kemur til frekari vinnslu.
Efnisákvæði 2. mgr. eru samhljóða 2. málsl. 2. mgr. 18. gr. og síðasta málslið 19. gr. laga
nr. 7/1998, um hollustuhætti og mengunarvarnir. Samkvæmt 22. gr. laga nr. 93/1995, um
matvæli, hefur Matvælastofnun yfirumsjón með eftirliti heilbrigðisnefnda sveitarfélaganna.
Eðlilegt þykir að skýrt sé hvað við er átt með hugtakinu yfirumsjón. Matvælastofnun skal
þannig samræma allt matvælaeftirlit í landinu og gefa út leiðbeiningar og viðmiðunarreglur
um framkvæmd matvælaeftirlits almennt sem heilbrigðisnefndinar skulu lúta.
Um 5. gr.
Lagt er til að við lögin bætist þrjú ný ákvæði, 8. gr. a, 8. gr. b og 8. gr. c, í samræmi við
17. og 19. gr. reglugerðar (EB) nr. 178/2002. Um a-lið (8. gr. a).
Ákvæðið skilgreinir örugg matvæli. Matvæli sem ekki eru örugg skal ekki markaðssetja.
Matvæli skulu ekki teljast örugg ef þau eru álitin heilsuspillandi eða óhæf til neyslu. 2.–4.
mgr. ákvæðisins gefur nánari leiðbeiningar um það hvað má telja örugg, heilsuspillandi og
óneysluhæf matvæli. Um b-lið (8. gr. b).
Stjórnendur matvælafyrirtækja eins og þeir eru skilgreindir í frumvarpinu bera ábyrgð á
því að starfsemin sé í samræmi við lög og stjórnvaldsfyrirmæli. Stjórnanda ber einnig að
sannprófa að starfsemin sé í samræmi við lög og reglur sem um reksturinn gilda. Stjórnandi
er í bestri aðstöðu til að þróa öruggt kerfi fyrir afhendingu matvæla og til að tryggja að
matvæli, sem hann afhendir, séu örugg. Af þessum sökum er eðlilegt að stjórnandi matvælafyrirtækis beri frumábyrgð á öryggi matvæla. Stjórnandi hefur einnig skyldu skv. 8. gr. c til
að afturkalla vöru af markaði og láta eftirlitsaðila vita ef hann hefur grun um að matvæli sem
hann hefur framleitt, unnið eða dreift séu ekki í samræmi við öryggiskröfur matvæla. Um c-lið (8. gr. c).
Í ákvæðinu er orðalag núverandi ákvæðis matvælalaga um ábyrgð framleiðenda matvæla
lagað að reglugerð EB 178/2002 að því marki sem það er talið nauðsynlegt, sbr. 17. gr. reglugerðarinnar. Talið er að núverandi orðalag ákvæðisins samræmist ákvæði reglugerðarinnar
nokkuð vel einnig að teknu tilliti til reglugerða EB sem settar hafa verið í kjölfar hennar svo
sem reglugerðar EB nr. 852/2004.
Um 6. gr.
Í ákvæðinu er lögð til sú regla að matvælafyrirtæki skuli hafa starfsleyfi frá viðkomandi
eftirlitsaðila, sbr. 20. gr. laganna, og sækja um slíkt leyfi áður en starfsemi hefst. Gert er ráð
fyrir að heimilt verði að binda starfsleyfi tilteknum skilyrðum ef eftirlitsaðili telur ástæðu til.
Gefa skal út starfsleyfi til tiltekins tíma enda uppfylli starfsemin skilyrði laga og stjórnvaldsreglna sem um hana gilda. Gert er ráð fyrir að óheimilt sé að hefja starfsleyfisskylda starfsemi hafi starfsleyfi fyrir hana ekki verið gefið út. Enn fremur er gert ráð fyrir að stjórnanda
beri að veita eftirlitsaðila upplýsingar um fyrirhugaðar breytingar á starfsemi sem varðað
geta ákvæði starfsleyfis með hæfilegum fyrirvara. Þá er gert ráð fyrir að eftirlitsaðila sé
heimilt að endurskoða starfsleyfi áður en gildistími þess er liðinn vegna breyttra forsendna,
svo sem ef breytingar verða á rekstrinum, vegna tækniþróunar eða breytinga á reglum um
öryggi matvæla eða framkvæmd matvælaeftirlits. Þá getur eftirlitsaðili afturkallað starfsleyfi
matvælafyrirtækis hafi það verulega vanefnt greiðslu eftirlitsgjalds eða ef það er ekki
greiðslufært skv. 7. mgr. 25. gr. laganna.
Í greininni er fjallað nánar um þá þætti sem skulu koma fram í starfsleyfi og um leið skilyrði sem sett eru vegna veitingar þeirra. Ákvæði frumvarpsins eru jafnframt talin ná yfir
tilvik þar sem eftirlitsaðilar gefa starfsleyfi til skemmri tíma eða til bráðabirgða, t.d. þegar
fyrirtæki er að hefja rekstur, en eftirlitsaðili metur það svo að ekki séu öll skilyrði uppfyllt
til fulls. Engu að síður sé mögulegt að leyfa fyrirtækinu að hefja rekstur þar sem það sem á
vanti varði ekki matvælaöryggi, enda verði úr því bætt innan skamms tíma í samræmi við
skilyrði í starfsleyfi. Að þeim tíma liðnum og þegar staðfest er að bætt hafi verið úr verði
gefið út fullt starfsleyfi til lengri tíma.
Það er nýmæli hvað frumframleiðslu varðar að tekið sé fram í matvælalögum að öll matvælafyrirtæki skuli hafa starfsleyfi frá viðkomandi eftirlitsaðila. Í samræmi við skilgreiningu
3. gr. frumvarpsins á matvælafyrirtækjum verður að líta svo á að allir þeir sem ala dýr, sem
gefa af sér afurðir til manneldis, skuli falla undir þessa skilgreiningu og þar með vera
starfsleyfisskyldir. Það sama gildir um þá sem framleiða matjurtir.
Núverandi staða hefur verið sú að nautgripa-, svína- og alifuglarækt eru starfsleyfisskyldar greinar, en sauðfjár- og hrossarækt ekki. Það er ekki viðunandi staða þar sem þessar búgreinar leggja mikið til matvælaframleiðslu landsmanna. Því er lagt til að þeir aðilar sem
stunda sauðfjár- og hrossarækt í atvinnuskyni til matvælaframleiðslu skuli vera starfsleyfisskyldir. Þó er gert ráð fyrir því að starfsleyfi þessara aðila verði byggt á niðurstöðum búfjáreftirlits þar sem slíkar niðurstöður liggja fyrir. Ekki er ætlunin að hafa tvöfalt eftirlit með
þessum aðilum. Þeir bændur sem sinna ræktun matjurta eru ekki starfsleyfisskyldir heldur
þurfa einungis að tilkynna Matvælastofnun um starfsemi sína. Ekki er talin ástæða til þess
að krefjast starfsleyfis vegna þessarar ræktunar við núverandi aðstæður.
Í greininni er gert ráð fyrir að ráðherra geti með reglugerð undanskilið frá starfsleyfisskyldu tómstundabændur, þ.e. þá aðila sem ekki halda sauðfé, geitfé og hross í ágóðaskyni
heldur sér til ánægju. Þeir verði þó eftir sem áður skyldir til að vera með sín dýr á skrá hjá
viðkomandi búfjáreftirliti og lúta öllum öðrum lögum og stjórnvaldsfyrirmælum, svo sem
um einstaklingsmerkingar og fleiri atriði sem varða dýraheilbrigði og dýravernd og heilbrigði
sláturdýra, kjósi þeir að senda dýr til slátrunar.
Loks er gert ráð fyrir að í sérlögum sé heimilt að kveða á um sérstök skilyrði fyrir útgáfu
starfsleyfis fyrir starfsemi einstakra matvælafyrirtækja. Ef einnig er kveðið á um starfs- eða
vinnsluleyfisskyldu í sérlögum fyrir starfsemi sem fellur undir ákvæði þessara laga er eftirlitsaðila heimilt að gefa út eitt starfsleyfi á grundvelli hvorra tveggja laganna.
Um 7. gr.
Hugtakið „matvælafyrirtæki“ kemur í stað orðanna „Þeir sem framleiða matvæli og dreifa
þeim“. Einnig er hér tekið upp ákvæði um innra eftirlit sambærilegt við það sem nú er í 15.
gr. laga nr. 55/1998, um meðferð, vinnslu og dreifingu sjávarafurða, þar sem gert er ráð fyrir að stjórnandi matvælafyrirtækis beri ábyrgð á að sett sé á fót og starfrækt innra eftirlit með
framleiðslu og starfsemi matvælafyrirtækja. Þá er þar ákvæði um að matvælafyrirtækjum sé
skylt að fara eftir reglum um almenna hollustuhætti en þar er einkum átt við reglugerðir
Evrópusambandsins nr. 852/2004, 853/2004 og 854/2004 sem heimilað er að innleiða með
21. gr. frumvarpsins og gerð er grein fyrir í almennum athugasemdum með frumvarpinu. Að
öðru leyti þarfnast greinin ekki skýringa.
Um 8. gr.
Miklu skiptir að hægt sé að rekja feril matvæla. Í þessu skyni gerir matvælalöggjöf Evrópusambandsins ráð fyrir víðtæku kerfi rekjanleika í matvælafyrirtækjum til þess að hægt
sé að afturkalla vörur á markvissan og nákvæman hátt eða veita neytendum eða eftirlitsmönnum upplýsingar og komast þannig hjá óþarfa röskun þegar upp koma vandamál í tengslum við öryggi matvæla. Ákvæðið kveður á um grunnreglu reglugerðar (EB) nr. 178/2002 í
18. gr. um rekjanleika matvæla, dýra sem gefa af sér afurðir til manneldis og efna sem notuð
eru í matvæli. Stjórnandi eins og hann er skilgreindur þarf að hafa vitneskju um birgja og
aðra þá sem útvega hráefni til matvælaframleiðslu eða matvælavinnslu. Þessa vitneskju þarf
stjórnandinn að hafa tiltæka ef eftirlitsaðilar óska þessara upplýsinga. Matvælafyrirtæki, að
innflytjanda meðtöldum, getur þurft að staðfesta frá hvaða fyrirtæki það hefur fengið tiltekin
matvæli, dýr eða efni sem sett eru í matvæli til að tryggja rekjanleika á öllum stigum ef rannsókn fer fram.
Um 9. gr.
Greinin þarfnast ekki skýringa.
Um 10. gr.
Ákvæðið kveður á um hagsmunavernd neytenda matvæla og er samsvarandi 8. gr. reglugerðar (EB) nr. 178/2002. 2. mgr. ákvæðisins er samsvarandi 16. gr. reglugerðar (EB) nr.
178/2002.
Um 11. gr.
Greinin þarfnast ekki skýringa.
Um 12. gr.
Gert er ráð fyrir að leyfisveitingar verði bæði í höndum Matvælastofnunar og heilbrigðisnefnda sveitarfélaganna og að leyfisveitandi verði sú stofnun sem fer með eftirlit með starfsemi viðkomandi matvælafyrirtækis. Um eftirlit heilbrigðisnefnda sveitarfélaganna og matvælastofnunar gildir 22. gr. laga nr. 93/1995, sbr. 6. gr. sömu laga.
Um 13. gr.
Hér er kveðið á um heimild til að fela faggiltum skoðunarstofum að framkvæma tiltekin
verkefni við framkvæmd eftirlits samkvæmt lögunum og einnig að fela rannsóknastofum tiltekin verkefni við rannsóknir samkvæmt lögunum. Gert er ráð fyrir svipuðu ákvæði varðandi
eftirlit í 16. gr. laga nr. 55/1998, um meðferð, vinnslu og dreifingu sjávarafurða, sbr. 52. gr.
frumvarpsins, en rétt þykir að breyta því hlutverki sem faggiltar skoðunarstofur hafa haft við eftirlit samkvæmt lögunum í samræmi við þau ákvæði sem um þær gilda í reglugerð Evrópuþingsins og ráðsins nr. 882/2004.
Í 2. mgr. ákvæðisins er kveðið á um heimild ráðherra til að ákveða að tilteknar rannsóknastofur verði svokallaðar tilvísunarrannsóknastofur. Til að tryggja áreiðanlegar og sambærilegar rannsóknaniðurstöður hvar sem er innan Evrópska efnahagssvæðisins hafa verið settar
upp svokallaðar tilvísunarrannsóknastofur þar sem ein slík er útnefnd á hverju sviði til að
bera ábyrgð á þróun aðferða og miðlun upplýsinga og tryggja að samræmi sé í niðurstöðum
milli landa. Ætlast er til að innan hvers aðildarlands sé sett upp svipað kerfi, þ.e. ein tilvísunarrannsóknastofa í hverju landi sinni sama hlutverki á landsvísu og tilvísunarrannsóknastofa Evrópusambandsins (ESB) sinnir fyrir ESB. Tilvísunarrannsóknarstofur ESB eru
ákveðnar sérstaklega af ESB, en yfirvöld í hverju landi fyrir sig ákveða tilvísunarrannsóknastofur á landsvísu og tilkynna ESB. Hvort tveggja er birt með sérstökum ákvörðunum fyrir
hvert svið.
Um 14. gr.
24. gr. laga nr. 1995 er breytt í samræmi við hugtakið „matvælafyrirtæki“.
Um 15. gr.
Ákvæðið er í samræmi við meginreglur um gjaldtökuheimildir hér á landi og einnig 27.
gr. reglugerðar (EB) nr. 882/2004. Byggt er á því að eftirlitsgjöld miðist við raunkostnað við
eftirlitið. Þetta er í samræmi við efnisákvæði a-liðar 4. tölul. 27. gr. reglugerðar (EB) 882/
2004. Um 1. mgr.
Í a–c-liðum 1. mgr. er fjallað um þá kostnaðarþætti sem eftirlitsgjaldið skal standa straum
af. Stafliðirnir eru nær orðrétt þeir sömu og greinir í VI. viðauka við reglugerð nr. 882/2004
þar sem fjallað er um viðmiðanir sem taka skal tillit til við útreikning gjalda. Einnig má vísa
til II. viðauka við reglugerðina þar sem fjallað er um viðmiðanir fyrir þjálfun starfsfólks sem
gefur leiðbeiningar um orðið „þjálfun“ í b-lið. Hluti kostnaðar sem tilgreindur er í b-lið verður lagður á öll matvælafyrirtæki eftir hlutfallstölu. Um 2. mgr.
Í 2. mgr. er fjallað um viðbótareftirlit umfram almennt og eðlilegt matvæla- eða heilbrigðiseftirlit. Hvað fellur undir „almennt og eðlilegt“ matvæla- eða heilbrigðiseftirlit fer
eftir því hversu mikið eftirlit er talið nauðsynlegt á hverjum tíma í regluverki sjávarútvegs-
og landbúnaðarráðuneytis og fyrirmælum eða leiðbeiningum Matvælastofnunar. Um það
verður ekki fjölyrt hér enda fer það eftir óræðum breytum er einkum varða sjúkdómaástand
og sjúkdómavarnir eða aðra starfsemi matvælafyrirtækja. Hér má vísa til V. bálks reglugerðar nr. 882/2004 þar sem fjallað er um eftirlitsáætlanir.
Ákvæðið er í samræmi við fyrirmæli 28. gr. reglugerðar EB nr. 882/2004 um kostnað við
opinbert viðbótareftirlit. Í þeirri grein er sú skylda lögð á lögbært yfirvald að innheimta gjald
fyrir viðbótareftirlit umfram eðlilega eftirlitsstarfsemi hjá þeim matvælafyrirtækjum sem eru
ábyrg fyrir því að ekki er farið að tilskildum ákvæðum eða hjá matvælafyrirtæki sem á eða
hefur vörurnar í sinni vörslu þegar viðbótareftirlitinu er sinnt. Í reglugerðinni er eðlileg eftirlitsstarfsemi talin sú venjubundna eftirlitsstarfsemi sem krafist er samkvæmt lögum, þ.e.
innlendum lögum eða lögum Evrópusambandsins, og má hér vísa til fyrirmæla um innlendar
eftirlitsáætlanir í V. bálki reglugerðarinnar. Opinbert viðbótareftirlit umfram eðlilega eftirlitsstarfssemi skv. 28. gr. reglugerðinnar felur í sér rannsóknarkostnað, m.a. töku og greiningu sýna auk annars eftirlits sem krafist er til að kanna umfang vandamáls, til að sannprófa
hvort gerðar hafi verið úrbætur eða til að finna og/eða færa sönnur á að ekki sé farið að tilskildum ákvæðum. Erfitt er að sjá hversu oft ástæða verður til að sinna viðbótareftirliti eða
fella kostnað af því á matvælafyrirtæki.
Með fyrirmælum um viðbótareftirlit er tryggt að matvælafyrirtæki (framleiðandi, innflytjandi eða sláturleyfishafi) sem smitefni hefur greinst hjá þarf sjálft að bera þann kostnað sem
af viðbótarsýnatökum og prófunum hlýst.
Fyrirkomulagið er til samræmis við þá ábyrgð sem Evrópusambandið leggur á matvælafyrirtæki vegna sjúkdómavarna. Má hér vísa t.d. til 4. þáttar reglugerðar nr. 178/2002 um almennar meginreglur og kröfur samkvæmt lögum um matvæli, um stofnun Matvælaöryggisstofnunar Evrópu og um málsmeðferð vegna öryggis matvæla. Um 3. mgr.
Í 3. mgr. er ráðherra heimilað að setja reglugerð og gjaldskrá til að útfæra nánar framkvæmd eftirlits og innheimtu fyrir það. Slík gjaldskrá mun gilda fyrir eftirlit Matvælastofnunar. Samkvæmt 3. mgr. 12. gr. laga nr. 7/1998, um hollustuhætti og mengunarvarnir, setja
sveitarstjórnir gjaldskrá fyrir matvælaeftirlit heilbrigðisnefnda sveitarfélaganna. Samkvæmt
þeirri grein bera sveitarfélögin ábyrgð á fjármálum og rekstri heilbrigðiseftirlits á viðkomandi svæði. Mælt er fyrir um eðlilegt samráð sem ráðherra ber að viðhafa við fagaðila í matvælaiðnaði við gerð reglugerðar og gjaldskrár með heimild í frumvarpsgreininni. Jafnframt
er vísað til lágmarksgjalda vegna eftirlits. Ákvæðið vísar til efnisreglna reglugerðar (EB) nr.
882/2004. Um 4. mgr.
Í 4. mgr. eru ráðherra veittar heimildir til að líta til ákveðinna sjónarmiða við gerð reglugerðar og gjaldskrár. Þessi sjónarmið eru tekin upp úr 27. gr. reglugerðar nr. 882/2004.
Rétt er að taka fram að þrátt fyrir að ráðherra kjósi að taka sérstakt tillit til hagsmuna
fyrirtækja með litla framleiðslu eða fyrirtækja sem líða fyrir landfræðilega einangrun eru
hagsmunir annarra matvælafyrirtækja í samkeppnislegu tilliti tryggðir með a.m.k. tvennum
hætti.
Í fyrsta lagi er eftirlitsgjaldið þjónustugjald sem felur í sér að óheimilt verði að fella halla
vegna lægri tekna af eftirliti hjá sumum matvælafyrirtækjum á önnur matvælafyrirtæki. Fjármagn til þess að bæta Matvælastofnun tekjutap verði að koma með sérstökum greiðslum úr
ríkissjóði eða af fjárlögum stofnunarinnar.
Í öðru lagi er í I. kafla IV. viðauka við reglugerð nr. 882/2004 lagt bann við að innheimt
séu lægri eftirlitsgjöld fyrir eftirlit með slátrun en þar greinir. Því getur aldrei komið til þess
að eftirlitsgjöld verði felld niður.
Til hliðsjónar er á Norðurlöndunum með ólíkum hætti tekið tillit til hagsmuna smærri matvælafyrirtækja (sláturleyfishafa). Í Danmörku er smáum fyrirtækjum gert að greiða einungis
fyrrgreindan lágmarkstaxta en sérstakri fjárveitingu er varið til að greiða það sem eftir stendur. Í Noregi sem dæmi er hins vegar mælt fyrir um tiltekið hámarksgjald vegna kjötskoðunar
í smærri sláturhúsum (1 NOK á hvert kíló innvegins kjöts). Um 5. mgr.
Í 5. mgr. er kveðið á um hvenær skal greiða gjald vegna eftirlits. Matvælafyrirtæki skal
greiða gjald vegna eftirlits þegar eftirlitsaðili leggur fram reikning vegna þess. Um 6. mgr.
Í 6. mgr. er lagt til að heimilað verði að innheimta eftirlitsgjald með fjárnámi án undanfarins dóms eða sáttar. Einnig er heimilað að innheimta dráttarvexti komi til vanefnda. Um núverandi fyrirkomulag greiðslna má vísa til 5. gr. reglugerðar nr. 336/2005 um innheimtu
gjalds vegna heilbrigðiseftirlits með sláturafurðum. Um 7. mgr.
Í 7. mgr. getur eftirlitsaðili afturkallað starfsleyfi hafi viðkomandi matvælafyrirtæki vanefnt greiðslu eftilitsgjalds eða ef fyrirtæki er ekki greiðslufært. Um verulega vanefnd er að
ræða ef t.d. þriggja mánaða dráttur verður á greiðslu. Um 8. mgr.
Í 8. mgr. er vísað til þess að efnisákvæði greinarinnar gildi eftir því sem við á um gjöld
vegna eftirlits á landamærastöðvum.
Um 16. gr.
Í 27. gr. laga nr. 93/1995, um matvæli, er kveðið á um heimild til innheimtu á nauðsynlegum rannsóknarkostnaði hjá framleiðanda eða dreifanda matvæla. Heimild til gjaldtöku
þessa kostnaðar er nú í 15. gr. þessa frumvarps, nánar til tekið í 2. mgr. 25. gr. laga um
matvæli og því ekki þörf á þessu ákvæði.
Um 17. gr.
Um a-lið (27. gr. a).
Ákvæðið er að mestu samhljóða 21. gr. laga nr. 55/1998, um meðferð, vinnslu og dreifingu sjávarafurða. Þó er 1. málsl. felldur brott úr ákvæðinu en þar sagði: „Innflytjandi sjávarafurða sem fluttar eru til Íslands frá ríkjum innan Evrópska efnahagssvæðisins skal tilkynna
Fiskistofu um komu sendinga með hæfilegum fyrirvara.“ Þetta ákvæði er ekki í samræmi við
meginreglu EES-löggjafarinnar um frjálst flæði vöru innan svæðisins. Eftirlitsaðilum er
þannig óheimilt að skylda innflytjanda til að tilkynna um komu sendinga. Eftirlitsaðilum er
einungis heimilt að skoða umræddar afurðir í flutningi milli landa þegar um rökstuddan grun
er að ræða um óörugg matvæli. Um skýringu á ákvæðinu vísast að öðru leyti til athugasemda
við frumvarp til þeirra laga, sbr. Alþingistíðindi, A-deild, 122. löggjafarþing, þskj. 929, 544.
mál.
Um b-lið (27. gr. b).
Ákvæðið fjallar um landamærastöðvar og innflutning frá löndum utan EES. Um athugasemdir við greinina vísast til 22., 25. og 26. gr. laga nr. 55/1998, um meðferð, vinnslu og
dreifingu sjávarafurða, og greinargerðar með frumvarpi til þeirrra laga, sbr. Alþingistíðindi,
A-deild, 122. löggjafarþing, þskj. 929, 544. mál.
Um 18. gr.
Lagt er til að varúðarregla 7. gr. reglugerðar (EB) 178/2002 verði lögfest. Rétt þykir að
kveðið sé á um það í lögum hvenær heimilt er að grípa til varúðarráðstafana án þess að fyrirliggjandi séu óyggjandi gögn um að viðkomandi vara muni hafa í för með sér heilsuspillandi
áhrif. Skilyrði fyrir beitingu reglunnar er þó að slík áhrif séu möguleg. Í sumum tilvikum er
vafi um heilsuspillandi áhrif matvæla en þó hætta á heilsutjóni vegna þeirra. Ákvæðið heimilar ráðherra að framkvæma nauðsynlegar ráðstafanir. Ákvæðið tilgreinir ekki heimilar ráðstafanir heldur er sagt að þær skuli vera í réttu hlutfalli við markmið þeirra og ekki hamla
viðskiptum meira en nauðsynlegt er. Ráðstafanirnar skulu endurskoðaðar innan eðlilegs tíma
enda er um tímabundnar ákvarðanir að ræða. Ákvæði þetta þarf að túlka í samræmi við þá
meginreglu matvælalöggjafar EB að markaðshindrandi aðgerðir eða aðgerðir sem leiða til
ójafnra samkeppnisskilyrða eru ekki leyfðar nema í sérstökum undantekningartilvikum. Varúðarreglan byggist á því að við þessar sérstöku aðstæður sem verða til þegar ekki er hægt að
eyða vísindalegri óvissu en hætta er á að matvæli valdi heilsutjóni geti verið nauðsynlegt að
gera ráðstafanir til að fyrirbyggja hugsanlega heilsufarsvá fyrir þjóðfélagsþegnana.
Um 19. gr.
Lagt til að lögfest verði í matvælalögum ákvæði í samræmi við 10. gr. reglugerðar EB nr.
178/2002 þar sem kveðið er á um skyldu stjórnvalda til að upplýsa almenning um eðli þeirrar
áhættu sem er fyrir hendi. Ákvæðið leggur þá skyldu á herðar eftirlitsaðilum, Matvælastofnun eða heilbrigðisnefndum sveitarfélaganna að upplýsa almenning um tiltekna hættu sem
stafar af matvælum.
Í 2. og 3. mgr. ákvæðisins eru ný ákvæði sem heimila ráðherra að setja reglugerð þar sem
fram koma nánari reglur um birtingu upplýsinga eða niðurstaðna eftirlits hjá matvælafyrirtækjum eða upplýsinga sem varða neytendur og falla undir 18. gr. a.
2. mgr. fjallar um niðurstöður eftirlits vegna atvika er falla undir 1. gr. Komi upp tilvik
við eftirlit þar sem rökstuddur grunur er um að tiltekin matvæli hafi í för með sér áhættu fyrir
heilbrigði manna er heimilt að birta slíkar upplýsingar.
Í 3. mgr. er gert er ráð fyrir því að eftirlitsaðilum sé heimilt að birta tilteknar upplýsingar
eða allar niðurstöður úr eftirliti þannig að neytendum séu ljósar niðurstöðurnar. Í 18. gr. a
eru efnisreglur um neytendavernd og sviksamlegt athæfi. Nauðsynlegt getur reynst að upplýsa almenning um tiltekin tilvik til þess að vernda hagsmuni neytenda og því nauðsynlegt
að settar séu reglur um slíkt.
Um 20. gr.
Í 29. gr. laga nr. 93/1995 segir að eftirlitsaðila sé heimilt að stöðva eða takmarka framleiðslu og dreifingu matvæla og leggja hald á þau þegar rökstuddur grunur er um að matvæli
uppfylli ekki ákvæði laga þessara eða reglugerða settra samkvæmt þeim. Þetta efnisákvæði
er nú 3. mgr. 30. gr.
Um 21. gr.
Með ákvæðinu er lagt til að lögfest verði sambærileg ákvæði um þvingunarúrræði og eru
í lögum nr. 7/1998 þar sem þau ákvæði sem nú eru í matvælalögum veita Matvælastofnun
ekki sömu heimildir og þau veittu Umhverfisstofnun áður en verkefni hennar við matvælaeftirlit voru flutt til Matvælastofnunar með lögum nr. 167/2007, um tilfærslu verkefna innan
Stjórnarráðs Íslands. Einnig felst í ákvæðinu að verið er að samræma viðurlagaákvæðin
ákvæðum um viðurlög sem fram koma í þeim reglugerðum Evrópuþingsins og ráðsins sem
stefnt er að því að mynda grundvöll fyrir innleiðingu á með frumvarpi þessu.
Þá er gert ráð fyrir að Matvælastofnun geti hér í tilteknum bráðatilvikum farið inn á verksvið heilbrigðisnefnda, sbr. 30. gr. c. Loks er í ákvæðinu það nýmæli að eftirlitsaðili getur
ákveðið að eftirlitsskyldir aðilar skuli greiða allan kostnað vegna þvingunarrúræða sem framkvæmd eru samkvæmt lögum þessum og má innheimta slíkan kostnað með fjárnámi án
undanfarandi dóms eða sáttar. Það er jafnframt nýmæli að stjórnanda matvælafyrirtækis er
skylt að veita aðstoð við framkvæmd eftirlitsins. Þykir þetta eðlileg krafa þar sem um umfangsmiklar aðgerðir er að ræða.
Um skýringar við greinina vísast að öðru leyti til athugasemda við 26.–30. gr. í frumvarpi
til laga nr. 7/1998, um hollustuhætti og mengunarvarnir, sbr. Alþingistíðindi, A-deild, 1997 –98, 122. löggjafarþing, þskj. 197, 194. mál, og eldri laga um sama efni, svo og reglugerðar
Evrópuþingsins og ráðsins (EB) nr. 882/2004.
Um 22. og 23. gr.
Greinarnar þarfnast ekki skýringa
Um 24. gr.
Brot gegn ákvæðum laganna geta haft í för með sér mikla hættu og valdið heilsutjóni á
mönnum og dýrum, svo og skaðað ýmsa aðra hagsmuni. Er því talið nauðsynlegt að efla
varnaðaráhrif laganna með því að leggja til þyngri viðurlög við brotum á þeim. Með ákvæðinu er lagt til að tekið verði upp ákvæði um tiltekin viðurlög við brotum á lögunum og að um
meðferð þeirra fari samkvæmt lögum um meðferð opinberra mála. Um skýringu á ákvæðinu
vísast að öðru leyti til athugasemda við 33. gr. í frumvarpi til laga nr. 7/1998, um
hollustuhætti og mengunarvarnir, sbr. Alþingistíðindi, A-deild, 122. löggjafarþing 1997–98,
þskj. 197, 194. mál.
Um 25. gr.
Greinin þarfnast ekki skýringa.
.
Um 26. gr.
Orðalag 1. mgr. er lagað að þeim nýmælum sem kveðið er á um í reglugerð (EB) nr.
178/2002 og afleiddum gerðum.
Jafnframt eru tilvísanir í reglugerð EB nr. 178/2002 og reglugerðir sem settar voru í kjölfar þeirrar reglugerðar, m.a. um hollustuhætti og eftirlit í matvælaiðnaði. Rétt þykir að hafa
í lögunum tilvísanir í þessar megingerðir matvælalöggjafar Evrópusambandsins þannig að
reglugerðarheimildir verði skýrar hvað þessar tilteknu gerðir varðar. Þessar tilvísanir eru í
2.–3. mgr. 31. gr. a.
Um 27. gr.
Greinin þarfnast ekki skýringa.
Um 28. gr
Ákvæði til bráðabirgða fjallar um gildistöku en lögin taka gildi 27. apríl 2008 hvað varðar
allar matvælategundir aðrar en kjöt, mjólk og egg. Í ákvörðunum sameiginlegu EES-nefndarinnar er sérstakur aðlögunartími fyrir innleiðingu á efnisákvæðum um búfjárafurðir. Hvað
þessar matvælategundir varðar, þ.e. kjöt, mjólk, egg og hráar afurðir úr þessum matvælategundum taka lögin gildi 27. apríl 2009. Jafnframt gildir aðlögunartíminn um unnar vörur
úr mjólk.
Um 29. gr.
Við 4. gr. laganna bætist skilgreining vegna aukaafurða dýra, sbr. 13. gr. laganna.
Um 30. gr.
Fyrsta málsgrein laganna mun taka allnokkrum breytingum, en þó er ekki lagt til að breytt
verði út frá markmiðsskýringu 1. málsl. um ástæður þess að innflutningur er óheimill.
A-liður núgildandi 10. gr. er umskrifaður til samræmis við endurskoðun á undanþágunni
sem Ísland hefur haft frá I. kafla I. viðauka EES-samningsins. Rétt þykir að gera nokkra
grein fyrir einstökum breytingum sem felldar verða niður, sem og ástæðum þess að ekki er
vikið frá núgildandi 10. gr. að öllu leyti.
Megingrundvöllur breytinganna er að flestar vörur sem rekja má til afurða úr dýraríkinu
eru felldar brott, enda verður meginreglan sú að heimilt verði að flytja þessar vörur til landsins, uppfylli varan evrópsk skilyrði um heilbrigðisvottun.
Þrátt fyrir framangreinda meginreglu verður áfram óheimill innflutningur á kjötmjöli,
beinamjöli og blóðmjöli. Ástæður þess eru að einstökum ríkjum er áfram heimilt að banna
innflutning þessara vara samkvæmt undanþágum sem sérstaklega eru samþykktar fyrir Ísland
með bókun við breytingu á I. viðauka EES-samningsins. Samkvæmt ákvörðun sameiginlegu
EES-nefndarinnar nr. 133/2007 munu Íslendingar áfram verða undanþegnir þeim gerðum í
I. viðauka sem varða lifandi dýr, fyrir utan fisk og fiskeldi, ásamt gerðum sem varða fósturvísa, eggfrumur og sæði úr dýrum.
Þótt EB-reglugerðirnar fjalli ekki um vörur óskyldar dýraríkinu þótti rétt að fella úr upptalningu greinarinnar hluti sem hafa lítið raunhæft gildi, svo sem stráteppi og strákörfur.
Ákvæðin um bann við innflutningi notaðs reiðfatnaðs, reiðtygja og annars sem notað hefur
verið við geymslu og flutninga á dýrum og dýraafurðum, sem og búnað til stangveiða heldur
þó gildi sínu.
Um einstakar vörur sem teknar eru út úr greininni munu eftirfarandi reglur gilda: Alidýraáburður. Áburður fellur eins og annað úr dýraríkinu sem ekki er ætlað til manneldis undir reglugerð EB nr. 1774/2002. Í III. kafla VIII. viðauka með reglugerðinni er áburði
almennt skipt upp í tvo flokka, óunninn og unninn. Meginreglan verður áfram sú að óunninn
áburð er óheimilt að flytja milli landa, nema samkvæmt nánar greindum þröngum undantekningum. Athygli er þó vakin á því að hrossatað fellur ekki undir flutningsbannið. Unninn
húsdýraáburð má flytja milli landa enda hafi hann verið rétt meðhöndlaður og fylgi heilbrigðisvottorð. Sömu reglur gilda um gróðurmold, rotmassa og annað sem áburðurinn hefur
verið blandaður við. Hráar eða lítt saltaðar sláturafurðir og fóðurvörur unnar úr afurðum eða úrgangi spendýra og fugla sem ekki hafa hlotið viðeigandi hitameðferð. Ef sláturafurðirnar fá heilbrigðisvottorð og flokkast sem matvæli falla þær undir meginregluna um tiltölulega frjálst flæði
innan Evrópu. Ef þær hins vegar eru ekki til manneldis kveður reglugerð EB nr. 1774/2002
á um nánari reglur um meðferð þeirra. Með nokkurri einföldun má segja að öllum afurðum
af dýrum sem annaðhvort eru sjálfsýkt eða grunur leikur á að geti verið sýkt skuli fargað, en
falli þær undir a- eða b-lið 1. mgr. 6. gr. reglugerðarinnar sem hlutar sláturdýra sem megi
nota til manneldis eða dýra sem sýni engin merki um sjúkdóma megi nota sláturafurðirnar
til vinnslu tæknilegra afurða, svo sem í fóður. Skilyrði er þó að við slíka vinnslu sé gætt
viðurkenndra eftirlits- og vinnsluaðferða sem skilgreindar eru í reglugerðinni. Ósótthreinsuð skinn og húðir, dýrahár, ull, fiður, fjaðrir og dúnn. Meginreglan um að
óheimilt sé að flytja inn ósótthreinsuð skinn og húðir mun í sjálfu sér gilda áfram. Hins vegar
er lagt til að um innflutning þessarar vöru fari eins og annarrar vöru úr dýraríkinu. Með því
er átt að uppfylli vinnsla húðanna kröfur VI. kafla VIII. viðauka reglugerðar EB nr. 1774/
2002 verði innflutningur heimill. Er þar nánar mælt fyrir um nokkuð mismunandi meðferð
húða og skinna af hóf- og klaufdýrum, veiðidýrum og loðdýrum og á ull, fiðri og burstum
úr dýrahárum. Blóð og blóðafurðir. Um þær er fjallað í tveimur köflum reglugerðar EB nr. 1774/2002,
annars vegar um hreinar slíkar vörur og hins vegar ef nota á þær í tæknilegum tilgangi, t.d.
vegna lyfja. Um fyrri flokkinn gildir að innflutningur eftir að varan er unnin samkvæmt fyrir
fram ákveðnu vinnsluferli er heimill. Innflutningur í tæknitilgangi er einnig heimill, en þarf
að hlíta mun strangara eftirliti og vinnslu. Ógerilsneydd mjólk, vörur unnar úr henni og hrá egg. Svipaðar reglur munu gilda um
þessar vörur og flest annað í þessum flokki, þ.e. innflutningur verður einungis leyfður að
uppfylltum reglum um uppruna og heilbrigðisvottorð og undir eftirliti. Sérstaklega þarf að
huga að salmonelluvörnum í þessu samhengi.
Um 31. gr.
Í þessu lagaákvæði er það áréttað að aukaafurðir dýra, sem ekki eru ætlaðar til manneldis,
svo sem hræ dýra, sláturúrgangur og sláturafurðir, skal meðhöndla, geyma, flytja, vinna eða
eyða á þann hátt að ekki valdi hættu á útbreiðslu smitefna eða annarra skaðlegra efna. Þeir
sem meðhöndla, geyma, flytja eða vinna aukaafurðir dýra skv. 1. mgr. skulu sækja um leyfi
Matvælastofnunar áður en starfsemin hefst. Samkvæmt lögunum er það hlutverk Matvælastofnunar að sinna eftirliti með útbreiðslu smitefna sem leynst geta í aukaafurðum dýra og
koma í veg fyrir smit slíkra efna.
Í 2. mgr. er ákvæði sem kveður á um starfsleyfisskyldu tiltekinna stöðva sem vinna eða
geyma aukaafurðir úr dýrum sem ekki eru ætlaðar til manneldis. Hér er um að ræða stöðvar
fyrir milliefni, geymslustöðvar, vinnslustöðvar fyrir efni í 1. og 2. flokki, vinnslustöðvar fyrir
líffituefni í 1. og 2. flokki, lífgasstöðvar og myltingarstöðvar og efni í 3. flokki, m.a. úrgang
úr sjávar- og eldisafurðum. Ákvæðið byggist á III. kafla reglugerðar EB nr. 1774/2002, sbr.
10.–15. gr. reglugerðarinnar. Um skilgreiningar á umræddum vinnslu- og geymslustöðvum
vísast til reglugerðarinnar. Þar sem ákvæði framangreindrar ESB-reglugerðar eru fyrst og
fremst sett á grundvelli sjónarmiða um sjúkdómavarnir er gert ráð fyrir að þetta ákvæði verði
í lögum nr. 25/1993. Eins og fram hefur komið er gert ráð fyrir að það gildi einnig um stöðvar sem vinna úrgang úr sjávar- og eldisafurðum. Matvælastofnun gefur út leyfi vegna starfsemi fyrrgreindra stöðva. Hafa verður í huga að reglur um eyðingu úrgangs sem á sér stað
í brennslustöðvum lýtur valdsviði umhverfisráðuneytisins og eftirliti Umhverfisstofnunar.
Í 3. mgr. er gert ráð fyrir að ráðherra setji með reglugerð nánari ákvæði um meðferð aukaafurða dýra, sbr. 29. gr. a, en þar er kveðið á um innleiðingu reglugerðar (EB) nr. 1774/2002.
Um 32. gr.
Með samþykkt ákvörðunar nr. 133/2007 frá 26. október 2007 samþykkti Ísland að innleiða
sérstakar reglur sem varða flutning á líflömbum til þeirra bæja þar sem skorið hefur verið
niður vegna riðuveiki og sem lokið hafa tveggja ára banni við fjárbúskap eftir niðurskurð.
Í reglugerð ESB nr. 999/2001 um riðuveiki koma fram ákvæði sem lúta að þessum þætti
varðandi arfgerðir kinda. Ísland fékk samþykktar undanþágur frá flestum þessara ákvæða ef
undan eru skilin þau sem varða flutning líflamba sem bera áhættuarfgerðarþáttinn VRQ.
Kindur af þessari arfgerð eru taldar næmari fyrir riðusmiti en aðrar arfgerðir. Með ákvæðinu
verður ráðherra heimilt að banna flutning á líflömbum sem eru með VRQ-arfgerðarþáttinn.
Á undanförnum árum hafa ekki verið teknir inn hrútar á sæðingastöðvar sem bera þessa arfgerð. Þetta mun þýða að rannsaka verður þau líflömb sem ætluð eru til sölu af líflambasvæðum til að tryggja að lömb af þessari arfgerð verði ekki flutt til umræddra bæja. Rannsóknir
þessar er unnt að gera hérlendis.
Um 33. gr.
Hér er gert ráð fyrir að ný grein bætist við lögin, sem verður 29. gr. a, þar sem ráðherra
verði veitt heimild til að innleiða í heild sinni ákvæði reglugerðar Evrópuþingsins og ráðsins
(EB) nr. 1774/2002 sem fjallar um meðferð aukaafurða úr dýrum. Þar sem ákvæði fyrrgreindrar EES-reglugerðar eru fyrst og fremst sett á grundvelli sjónarmiða um sjúkdómavarnir er gert ráð fyrir að þetta ákvæði verði í lögum nr. 25/1993. Gert er ráð fyrir að ákvæðið gildi m.a. um sláturhús en einnig um stöðvar sem vinna úrgang úr sjávar- og eldisafurðum.
Um 34. gr.
Ákvæðið fjallar um þá sem teljast dýralæknar samkvæmt íslenskum lögum. Samkvæmt
núgildandi lögum mega þeir einir sem lokið hafa prófi frá dýralæknaháskóla sem er viðurkenndur af íslenskum stjórnvöldum kalla sig dýralækna.
Gert er ráð fyrir að ákvæðið taki með skýrum hætti til erlendra dýralækna sem heimild
hafa til að starfa hér í samræmi við reglur Evrópska efnahagssvæðisins eða stofnsamning Fríverslunarsamtaka Evrópu og að ráðherra verði veitt heimild til að setja nánari reglur um leyfi
slíkra dýralækna hér á landi.
Um 35. gr.
Með lögum nr. 66/1998, um dýralækna og heilbrigðisþjónustu við dýr, voru gerðar viðamiklar skipulagsbreytingar á dýralæknisumdæmum og þeim fækkað úr 31 í 14. Vegna stjórnsýslu- og samkeppnislaga var talið brýnt að skilja að, eins og aðstæður leyfðu, eftirlits- og
dýralæknisþjónustu sama aðila. Það var ekki talið samrýmast góðri stjórnsýslu að sami aðili
gæfi út starfsleyfi og hefði jafnframt tekjur af þjónustu við hina leyfisskyldu starfsemi. Af
þessum sökum var lögfest að héraðsdýralæknar í þremur stærstu umdæmunum, þ.e. í Gullbringu- og Kjósar-, Skagafjarðar- og Eyjafjarðar- og Suðurlandsumdæmum, sinntu eingöngu
eftirlitsstörfum, en héraðsdýralæknar í öðrum umdæmum gætu samhliða eftirlitsstörfum sinnt
almennri dýralæknisþjónustu, þar með talið vaktþjónustu. Lagt er til með frumvarpi þessu
að það skref sem tekið var árið 1998 verði stigið til fulls og umdæmum héraðsdýralækna
fækkað úr 16 í 6, svo og að þessir héraðsdýralæknar sinni einvörðungu eftirlitsstörfum. Eftirlitsdýralæknar munu einnig starfa í þessum umdæmum og verða sumir ráðnir í fullt starf sem
opinberir eftirlitsmenn, en einnig verður heimilt að ráða þá í hlutastarf sem opinbera eftirlitsaðila undir stjórn og á ábyrgð héraðsdýralækna.
Í kjölfar breytinga á I. viðauka EES-samningsins mun Ísland verða að innleiða í íslenska
löggjöf reglugerð Evrópusambandsins (EB) nr. 882/2004 um opinbert eftirlit til að tryggja
sannprófun þess að lög um fóður og matvæli og reglur um dýraheilbrigði og velferð dýra séu
virtar. Í reglugerðinni er kveðið á um hvaða kröfur eru gerðar til opinbers eftirlits með fóðri,
matvörum, dýraheilbrigði og dýravelferð og samkvæmt reglugerðinni er aðildarríkjunum gert
skylt að tryggja að ekki geti orðið hagsmunaárekstrar milli þeirra og opinbers eftirlits, sbr.
b-lið 2. mgr. 4. gr. reglugerðarinnar. Ákvæði reglugerðarinnar eru í samræmi við reglur
stjórnsýsluréttar um vanhæfi. Samkvæmt núgildandi lögum sinna héraðsdýralæknar í öllum
umdæmum nema í Gullbringu- og Kjósar-, Skagafjarðar- og Eyjafjarðar- og Rangárvalla- og
Árnessýslu opinberu eftirliti gagnvart bændum og afurðum þeirra, þ.m.t. eftirliti með aðbúnaði dýra, dýraheilbrigði og dýravernd. Jafnframt selja þessir héraðsdýralæknar bændum
þjónustu sína sem almennir dýralæknar, en slíkt býður upp á möguleika á alls kyns hagsmunaárekstrum sem taka verður fyrir.
Samkeppnissjónarmið mæla jafnframt með því að fækka umdæmum og skilja á milli
opinbers eftirlits og almennrar dýralæknisþjónustu. Samkvæmt núgildandi skipulagi á verkefnum og umdæmum héraðsdýralækna eru þeir í mörgum tilfellum að bjóða sömu þjónustu
og sjálfstætt starfandi dýralæknar. Slíkt skekkir samkeppnisstöðu sjálfstætt starfandi dýralækna þar sem héraðsdýralæknar fá samhliða þjónustugjöldum greidd laun frá hinu opinbera.
Kröfur um aðskilnað opinbers eftirlits og faglegrar/klíniskrar þjónustu byggist þannig bæði
á skuldbindingum samkvæmt alþjóðasamningum, almennum vanhæfisreglum stjórnsýsluréttarins og samkeppnissjónarmiðum. Fjöldi og stærð umdæma var ákveðinn með eftirfarandi
sjónarmið í huga:
a.
Næg verkefni séu fyrir héraðsdýralækni í hverju umdæmi.
b.
Verkefni þessi séu m.a. eftirlit með:
1.
Sláturhúsum, kjötfrystihúsum og kjötpökkunarstöðvum.
2.
Mjólkur- og kjötframleiðslu.
3.
Svínabúum.
4.
Alifuglabúum.
5.
Fiskeldisstöðvum.
6.
Loðdýrabúum.
7.
Garnaveikibólusetningu.
8.
Sæðingastöðvum.
9.
Einangrunarstöðvum.
10.
Kjötmjölsverksmiðjum.
Enn fremur annist héraðsdýralæknar lögboðna útflutningsskoðun hrossa og sinni dýraverndarmálum og framkvæmd sóttvarnaraðgerða vegna smitsjúkdóma.
c.
Landfræðileg skipting milli umdæma sé eðlileg og hagkvæm og samgöngur góðar.
1.
Suðvesturumdæmi. Óbreytt umdæmi frá núgildandi fyrirkomulagi.
2.
Vesturumdæmi. Þar eru fjögur umdæmi felld saman í eitt. Landfræðileg mörk eru
eðlileg og samgöngur góðar nema á Vestfjörðum. Í umdæminu er ekkert sláturhús,
talsverður kúabúskapur og sauðfjárrækt, sæðingastöð, einangrunarstöð fyrir frjóegg,
bólusett er við garnaveiki í sumum hlutum umdæmisins. Á Vestfjörðum er búskapur
frekar dreifður. Þar er sjúkdómastaða góð (ekki riða og ekki garnaveiki) svo að eftirlitsverkefni eru ekki mikil. Verkefni eru fyrir héraðsdýralækni og eftirlitsdýralækna
í umdæminu.
3.
Norðvesturumdæmi. Felld eru saman tvö umdæmi miðað við núgildandi fyrirkomulag. Landfræðilega er skiptingin eðlileg, samgöngur góðar. Skilin gagnvart Norðurlandsumdæmi eystra ættu að ráðast af því hvernig samgöngur eru bestar. Í umdæminu eru þrjú stór sauðfjársláturhús þar sem einnig er slátrað stórgripum. Sláturhúsin
eru öll með útflutningsleyfi og krefjast stöðugrar viðveru eftirlitsdýralæknis í sauðfjársláturtíð og þegar stórgripum er slátrað til útflutnings. Kúabúskapur er allnokkur
og mikill sauðfjár- og hrossabúskapur. Riðu- og garnaveikisvæði. Þörf er á héraðsdýralækni og eftirlitsdýralæknum.
4.
Norðausturumdæmi. Tvö umdæmi eru felld saman í eitt miðað við núgildandi kerfi.
Fjögur sláturhús, mikill kúabúskapur, sauðfjárrækt, svínarækt og alifuglarækt. Verkefni fyrir héraðsdýralækni og eftirlitsdýralækna. Landfræðileg skipting er eðlileg,
umdæmið er stórt en samgöngur frekar góðar.
5.
Austurumdæmi. Þrjú umdæmi felld saman í eitt. Landfræðilega er þetta stórt umdæmi, samgöngur allgóðar, tvö sláturhús, hreindýrakjötpökkunarstöð, ferjuhöfn, riðu- og garnaveikibólusetning. Verkefni fyrir héraðsdýralækni og eftirlitsdýralækna.
6.
Suðurumdæmi. Óbreytt nema Skaftárhreppur fellur undir það. Landfræðilega fellur
hann betur að Suðurumdæmi en að Austurumdæmi.
Sérstakt nýmæli er í frumvarpinu, að héraðsdýralæknar skuli hafa eftirlit með heilbrigði
búfjár og lyfjanotkun búfjár og annarra dýra. Í 4. mgr. 11. gr. lyfjalaga, nr. 93/1994, er tekið
fram að Matvælastofnun skuli hafa eftirlit með ávísunum dýralyfja og ástæða þykir til að
tilgreina sérstaklega þá starfsmenn Matvælastofnunar sem annast slíkt eftirlit. Jafnframt er
vísað til laga um búfjárhald vegna starfa eftirlitsdýralækna á sviði dýravelferðar.
Jafnframt er það nýmæli að ráðherra er heimilt með reglugerð að leyfa opinberum eftirlitsdýralæknum að sinna almennri þjónustu við dýraeigendur á tilteknu svæði ef heilbrigði eða
velferð dýra er stefnt í hættu enda fáist ekki dýralæknar til að sinna slíkri þjónustu við dýraeigendur á umræddu svæði. Hér er um að ræða undatekningu frá þeirri meginreglu að opinberum eftilitsdýralæknum sé óheimilt, vegna hagsmunatengsla, að sinna almennri dýralæknaþjónustu í sínu umdæmi. Eftirfarandi skilyrði eru sett fyrir framangreindri heimild, í fyrsta
lagi að heilbrigði eða velferð dýra sé stefnt í hættu, í öðru lagi að dýralæknir fáist ekki til
þess að starfa eingöngu við almennar dýralækningar á svæðinu og í þriðja lagi er gert ráð
fyrir að heimild ráðherra eigi eingöngu við um starfandi eftirlitsdýralækna sem starfa undir
héraðsdýralækni en ekki héraðsdýralækninn sjálfan. Það gefur augaleið að heimild ráðherra
tekur einungis til dreifðari byggða landsins.
Um 36. gr.
Í frumvarpinu er lagt til að skilið verði að fullu á milli opinbers eftirlits héraðsdýralækna
annars vegar og hins vegar almennrar klíniskrar þjónustu dýralækna svo og að vaktsvæðum
almennrar dýralækningarþjónustu verði fækkað úr 15 í 10. Eingöngu er gert ráð fyrir greiðslu
fyrir bakvaktir utan venjulegs dagvinnutíma. Á þeim svæðum þar sem lagt er til að leggja
niður skipulagða vaktþjónustu hins opinbera, þ.e. í Gullbringu- og Kjósarumdæmi, Skagafirði, Eyjafirði, Rangárvallasýslu og Árnessýslu, er starfrækt öflug dýralæknaþjónusta sem
sinnir vaktþjónustu fyrir dýraeigendur. Ekki er því ástæða til að skipuleggja og greiða fyrir
slíka þjónustu þar sem starfandi dýralæknar sinna þessari þjónustu nú á markaðslegum forsendum.
Lagt er til að þeim fjármunum sem sparast við niðurlagningu á vaktþjónustu á fyrrnefndum svæðum verði þess í stað varið til að styrkja vaktþjónustu Matvælastofnunar svo að stofnunin geti skipulagt vaktir í öllum umdæmum og á aðalskrifstofu vegna mála sem sinna verður
og upp kunna að koma utan venjulegs skrifstofutíma og varða opinber eftirlitsstörf og sóttvarnir. Slík mál varða t.d. dýravernd, innflutning og útflutning dýra og grun um smitsjúkdóma.
Um 37. gr.
Í frumvarpinu er gert ráð fyrir að störf héraðsdýralækna, sem sinna bæði opinberu eftirliti
og almennri dýralæknaþjónustu, verði lögð niður. Þetta á við um héraðsdýralæknana sem nú
eru staðsettir í Borgarnesi, Stykkishólmi, Búðardal, á Ísafirði, Hvammstanga, Blönduósi,
Húsavík, Egilsstöðum, Breiðdalsvík, Höfn og á Kirkjubæjarklaustri. Í stað þess koma stærri
opinber eftirlitssvæði þar sem Matvælastofnun hefur umdæmisskrifstofur og ákveður stofnunin staðsetningu héraðsdýralækna og annarra eftirlitsaðila sem þar verða ráðnir til opinberra
eftirlitsstarfa og sóttvarna. Með þessari breytingu verður jafnframt nauðsynlegt að tryggja
almenna dýralæknaþjónustu í dreifðum byggðum landsins með öðrum hætti en verið hefur. Markmiðið er að tryggja dýraeigendum um allt land nauðsynlega dýralæknaþjónustu og þar
með, m.a. af dýraverndarástæðum, að veik og slösuð dýr fái rétta meðhöndlun eins fljótt og
kostur er.
Ólíklegt er að dýralæknar fáist til starfa þar sem dýrafjöldi er takmarkaður og verkefni við
lækningu dýra fremur fá. Til að ná markmiðum greinarinnar um að tryggja dreifðum byggðum reglubundna dýralæknaþjónustu og bráðaþjónustu verður að stuðla að því að fyrir hendi
verði nauðsynleg starfsaðstaða fyrir sjálfstætt starfandi dýralækna á Snæfellsnesi, í Dalasýslu, á Vestfjörðum, í Austur- og Vestur-Húnavatnssýslum, í Suður-og Norður-Þingeyjarsýslum, í Norður- og Suður-Múlasýslum og í Austur- og Vestur-Skaftafellssýslum. Jafnframt
þarf hið opinbera að greiða einhverja staðaruppbót og/eða kostnað við ferðir dýralækna á
þessum stöðum. Að öðrum kosti er ekki tryggt að dýralæknaþjónustan verði nægileg til að
tryggja heilbrigði og velferð dýra.
Þar sem samkvæmt framanrituðu er verið að gera verulegar breytingar á dýralæknakerfinu
með því að fækka héraðsdýralæknum sem áður hafa annast þjónustu við dýraeigendur er talið
nauðsynlegt að gefin verði út reglugerð um hvernig dýraeigendum í hinum dreifðu byggðum
landsins verði tryggð dýralæknaþjónusta. Gert ráð fyrir því að ráðherra skuli hafa samráð við
Dýralæknafélag Íslands, Bændasamtök Íslands, Samband íslenskra sveitarfélaga og Matvælastofnun.
Um 38. gr.
Í núgildandi lögum kemur fram að ráða skuli sérmenntaða dýralækna, einn á hverju
sérsviði, sem tilgreind eru í lögunum. Í stað þess að tilgreina á hvaða sérsviði viðkomandi
dýralæknar starfa er nú lagt til að Matvælastofnun ráði sérgreinadýralækna og hafi tækifæri
til breytinga á verkaskiptingu milli þeirra. Starfsskyldur þeirra verða einnig samkvæmt þessum tillögum skilgreindar í starfslýsingum, en ekki í erindisbréfum eins og verið hefur.
Eftir sem áður verða ýmis sérsvið tilgreind í lögunum og reyndar heldur fleiri en áður. Þar
er átt við sérsvið eins og sóttvarnir, dýravernd og dýralyf. Starf sóttvarnadýralæknis er afar
mikilvægt og má líkja við starf sóttvarnalæknis, nema hvað annað starfið varðar sóttvarnir
vegna dýrasjúkdóma og hitt sjúkdóma í mönnum. Aðgerðir vegna fuglaflensu, sem eins og
mál standa er fyrst og fremst dýrasjúkdómur, skýra betur en margt annað þörfina fyrir þessi
störf. Þá eru dýraverndarmál fjölmörg, geta varðað aðbúnað og velferð búfjár og reynast oft
erfið úrlausnar. EES-löggjöf um dýralyf hefur verið innleidd hér á landi og nú er verið að
taka inn í íslenska löggjöf nýjar EES-reglur sem varða skráningu á notkun dýralyfja í búfjárrækt, eftirlit með notkun þeirra og útskolun áður en kemur til slátrunar eða annarrar nýtingar
afurða vegna matvælavinnslu. Ekki hefur verið unnt að sinna þessum málaflokki sem skyldi
og nú bætast við aukin verkefni. Úrbætur eru því nauðsynlegar.
Í þessari grein frumvarpsins eru einnig ákvæði sem varða almenn dýralæknastörf og ráðgjafastörf sem geta, ef þau eru heimil, orðið til þess að sérgreinadýralæknir verður vanhæfur
í starfi sínu hjá Matvælastofnun. Vegna þessa er gert ráð fyrir að slík störf verði ekki heimil
samhliða sérhæfðu starfi hjá stofnuninni.
Um 39. gr.
Vegna breytinga á umdæmum héraðsdýralækna er gert ráð fyrir að öll núverandi stöðugildi héraðsdýralækna við Matvælastofnun verði lögð niður en þau eru sextán í dag. Hins
vegar er kveðið á um að starfsmönnunum skuli boðin störf hjá Matvælastofnun og að ekki
þurfi að auglýsa þau störf skv. 7. gr. laga nr. 70/1996, um réttindi og skyldur starfsmanna ríkisins. Gert er ráð fyrir því að sex dýralæknum verði boðin störf héraðsdýralækna í sex nýjum
umdæmum en allt að tíu dýralæknum boðin störf eftirlitsdýralækna.
Um 40. gr.
Í ákvæðinu er sérstaklega tekið fram að lögin um matvæli, nr. 93/1995, gildi um efni laga
nr. 96/1997. Í matvælalögum eru mikilvæg ákvæði sem gilda um öll matvæli, þar á meðal
skv. 2. gr. laga um matvæli, og gilda þau eftir atvikum um lifandi dýr ef þau eru meðhöndluð
til markaðsetningar til manneldis.
Um 41. gr.
Reglugerð Evrópuþingsins og ráðsins (EB) nr. 854/2004 kveður á um heilbrigðisskoðun
innan 24 klukkustunda frá komu í sláturhús og innan 24 stunda fyrir slátrun. Ákvæði um
þetta er að finna í I. viðauka, I. þætti, II. kafla, B.1.b) lið reglugerðarinnar. Eldra ákvæði laga
nr. 96/1997 kvað á um að slátrun skyldi fara fram innan 12 klukkustunda frá heilbrigðisskoðun og til slátrunar. Í eldra ákvæði var jafnframt kveðið á um undanþágu frá heilbrigðisskoðun ef upplýsingar um eldi, heilbrigði og lyfjagjöf fylgja sláturgrip í sláturhús samkvæmt
reglum sem settar eru af Matvælastofnun. Þessi undanþága fellur brott en jafnframt er kveðið
á um að Matvælastofnun geti sett nánari reglur um heilbrigðisskoðun sláturdýra sem geta
falið í sér undanþágur frá framangreindum tímafresti. Að öðru leyti er 1. mgr. óbreytt.
2.–9. mgr. eru efnislega samhjóða 25. gr. laga nr. 93/1995, um matvæli. Þó er tveimur
málsgreinum bætt við ákvæðið í lögum nr. 96/1997.
Annars vegar er bætt við málsgrein sem fjallar um eftirlit vegna slátrunar á býli. Með 8.
mgr. er Matvælastofnun heimilað að taka eftirlitsgjald vegna raunkostnaðar við sýnatöku og
rannsóknir vegna slátrunar sem framkvæmd er með heimild í 4. mgr. 5. gr. laganna, þ.e.
slátrun eigenda lögbýla á eigin búfé til eigin neyslu. Að öðru leyti vísast til athugasemda við
15. gr. þessa frumvarps þar sem fram koma tillögur um efni gjaldtökuákvæðis fyrir eftirlit
í 25. gr. laga nr. 93/1995. Hins vegar er bætt við einni málsgrein sem segir að miða skuli við
að gjaldskrá verði gefin út með eins árs millibili og taki mið af rekstraruppgjöri heilbrigðiseftirlits fyrir heilt rekstrarár. Slíkt ákvæði er ekki að finna í matvælalögunum.
Um 42. gr.
Í ákvæðinu er mælt fyrir um brottfall 13. gr. laga nr. 96/1997. Með fyrirmælum 2. mgr.
39. gr. frumvarpsins er lagagrein þessi gerð óþörf, enda er Matvælastofnun heimilað með því
ákvæði að framkvæma sérstakt viðbótareftirlit samkvæmt því ákvæði.
Um 43. gr.
Hér er kveðið á um að ráðherra setji reglugerð, m.a. um meðferð aukaafurða úr dýrum sem
óhjákvæmilega munu falla til í sláturhúsum og að hún verði í samræmi við ákvæði reglugerðar Evrópuþingsins og ráðsins (EB) nr. 1774/2002.
Um 44. gr.
Oft hefur komið til tals á undanförnum árum að heiti laga nr. 96/1997, um eldi og heilbrigði sláturdýra, slátrun, vinnslu, heilbrigðisskoðun og gæðamat á sláturafurðum, með síðari
breytingum, sé óþarflega langt og stirt.
Lagt er til að lögin verði þess í stað nefnd lög um slátrun og sláturafurðir. Orðið slátrun
er ekki skilgreint í lögum nr. 96/1997 en orðið er þó víða að finna í lögunum. Orðið myndar einnig orðstofna hugtaka sem skilgreind eru í 3. gr. laganna. Samkvæmt Íslenskri orðabók
merkir sögnin að slátra að „lóga, aflífa (og stykkja sundur til matar)“. Þá er tilgangur laganna, sbr. 1. gr. laganna, að tryggja gæði, heilnæmi og hollustu sláturafurða og að þær séu
ómengaðar og framleiddar við fullnægjandi aðstæður, metnar og flokkaðar.
Þar sem umfjöllunarefni laganna snýr allt að aðgerðum tengdum slátrun og sláturafurðum
þykir hið nýja heiti fela í sér fullnægjandi vísbendingu um efni þeirra.
Um 45. gr.
Í samræmi við fóðurlöggjöf Evrópusambandsins er gerð sú breyting að fiskimjöl lúti íslenskri fóðurlöggjöf en falli ekki undir lög nr. 55/1998. Núverandi fyrirkomulag hefur verið
gagnrýnt af Eftirlitsstofnun EFTA sem telur eðlilegt að reglur EES um fóður gildi um fiskimjöl. Í því sambandi er mikilvægt að reglur EES um fóðureftirlit gildi um fiskimjöl. Í
samræmi við þetta er skilgreiningu um sjávarafurðir breytt þannig að orðin „vörur unnar úr
fiski eða fiskúrgangi“ falli brott úr skilgreiningunni. Á sama hátt breytist skilgreining laga
nr. 22/1994 um fóður. Jafnframt eru greinar laga nr. 55/1998 um fóður og fiskimjöl felldar
brott úr lögunum, sbr. grein þessa og 50.–52. gr. frumvarpsins.
Þá er í ákvæðinu jafnframt lagt til að breytt verði skilgreiningum á hugtökum í lögum nr.
55/1998 og bætt við nýjum skilgreiningum á hugtökum í samræmi við ákvæði reglugerðar
nr. 178/2002 sem fjallað er um í almennum athugasemdum með frumvarpi þessu.
Um 46. gr.
Í ákvæðinu er tekið sérstaklega fram að lögin um matvæli, nr. 93/1995, gildi um efni laga
nr. 55/1998. Í matvælalögum eru mikilvæg ákvæði sem gilda um öll matvæli, þar á meðal
skv. 2. gr., og gilda þau eftir atvikum um lifandi dýr ef þau eru meðhöndluð til markaðssetningar til manneldis.
Um 47. gr.
Með greininni er leitast við að aðlaga ákvæðið betur að reglugerðum Evrópuþingsins og
ráðsins (EB) nr. 178/2002, 852/2004, 853/2004 og 882/2004.
Um 48. gr.
Ákvæði þetta er liður í því að fella brott ákvæði um fiskimjöl og fóður í lögum um sjávar-
og eldisafurðir, eins og lagt er til að lög nr. 55/1998 verði nefnd eftir gildistöku laganna, sbr.
m.a. athugasemdir við 50.–52. gr.
Um 49. gr.
Hér er verið að samræma ákvæði laganna að því er varðar merkingar umbúða ákvæðum
í lögum nr. 93/1995, um matvæli, og með því tryggja að uppfylltar séu kröfur EES-samningsins um það efni. Frumvarp til laga um innleiðingu EES-löggjafar um umbúðir í matvælalögum hefur nú þegar verið lagt fyrir núverandi löggjafarþing, sbr. þskj. 521, 326. mál.
Um 50. gr.
Í ákvæðinu felst hluti af þeim breytingum sem gerðar eru með frumvarp þessu á hlutverki
faggiltra skoðunarstofa, sbr. 49. gr., svo og því að fella brott úr ákvæðum laga nr. 55/1998
öll ákvæði sem varða fiskimjöl og fóður. Eins og fram hefur komið er gert ráð fyrir að
ákvæði fóðurlaga muni framvegis gilda um fiskimjöl og fóður úr fiskúrgangi.
Um 51. gr.
Með greininni er verið að aðlaga ákvæði laganna betur að reglugerð Evrópuþingsins og
ráðsins (EB) nr. 178/2002. Um skilgreiningu á stjórnanda vísast til 2. gr. laganna, sbr. og 32.
gr. þessa frumvarps.
Um 52. gr.
Rétt þykir að breyta því hlutverki sem faggiltar skoðunarstofur hafa haft við eftirlit samkvæmt lögunum í samræmi við þau ákvæði sem um þær gilda í reglugerð Evrópuþingsins og
ráðsins nr. 882/2004. Samkvæmt gildandi lögum er öllum starfs- og vinnsluleyfishöfum skylt
að hafa samning við faggilta skoðunarstofu til að annast framkvæmd eftirlits með starfsemi
þeirra en Fiskistofa hefur hins vegar haft yfirumsjón með starfi þeirra. Hér er hins vegar gert
ráð fyrir að lögbært stjórnvald, í þessu tilviki Matvælastofnun, geti einungis falið skoðunarstofum tiltekin verkefni við framkvæmd eftirlitsins enda uppfylli þær tiltekin skilyrði til þess.
Gert er ráð fyrir að ráðherra setji þessi skilyrði með reglugerð. Heimild til að framselja
skoðunarstofum vald til eftirlits er nokkuð þrengri í framangreindri reglugerð Evrópuþingsins og ráðsins (EB) nr. 882/2004 en í gildandi lögum og því óhjákvæmilegt að gera
þessar breytingar.
Um 53. gr.
Eins og áður hefur komið fram er í frumvarpinu miðað við að felld verði brott úr ákvæðum laga nr. 55/1998 öll ákvæði um fiskimjöl en gert ráð fyrir að fiskimjöl verði eftir gildistöku laganna skilgreint sem fóður en ekki sjávarafurð. Í 45. gr. er skilgreiningu á sjávarafurðum breytt í samræmi við það og einnig skilgreiningu á fóðri, sbr. 61. gr. Eftir gildistöku
laganna er gert ráð fyrir að lög nr. 22/1994 og stjórnvaldsreglur um fóður muni framvegis
gilda um fiskimjöl og eru gerðar ráðstafanir til að tryggja það við breytingar á þessum kafla
frumvarpsins, m.a. í 53. gr., sem fjallar um breytingar á fyrrgreindum lögum.
Um 54. og 55. gr.
Ákvæði 54. gr. er að mestu samhljóða 21. gr. laganna. Þó er 1. mgr. felld brott úr ákvæðinu en þar sagði: „Innflytjandi sjávarafurða sem fluttar eru til Íslands frá ríkjum innan Evrópska efnahagssvæðisins skal tilkynna Matvælastofnun um komu sendinga með hæfilegum
fyrirvara.“ Þetta ákvæði er ekki í samræmi við meginreglu EES-löggjafarinnar um frjálst
flæði vöru innan svæðisins. Eftirlitsaðilum er þannig óheimilt að skylda innflytjanda til að
tilkynna um komu sendinga. Eftirlitsaðilum er einungis heimilt að skoða umræddar afurðir
í flutningi milli landa þegar um rökstuddan grun er að ræða um óörugg matvæli.
Ákvæði 55. gr. fjallar um landamærastöðvar og innflutning frá löndum utan EES og er
ákvæðið að mestu sambærilegt við 22. gr. gildandi laga.
Að öðru leyti er vakin athygli á að ákvæðin eru að mestu samhljóða ákvæði 17. gr. frumvarpsins þar sem gert er ráð fyrir að sambærileg ákvæði verði lögfest í matvælalögum, nr.
93/1995. Einn er gert ráð fyrir að í 67. gr. (7. gr. h) verði lögfest sambærilegt ákvæði og 55.
gr. í lögum nr. 22/1994, um fóður, áburð og sáðvöru.
Að öðru leyti vísast um efni ákvæðanna til frumvarps til laga nr. 55/1998, um meðferð,
vinnslu og dreifingu sjávarafurða, sbr. Alþingistíðindi, A-deild, 122. löggjafarþing, þskj.
929, 544. mál.
Um 56. gr.
Hér eiga við sömu athugasemdir og fram koma við 53. gr.
Um 57. gr.
Lagt er til að fellt verði brott sérákvæði um gjöld fyrir landamæraeftirlit með afurðum frá
ríkjum utan Evrópska efnahagssvæðisins sem nú eru í 28. gr. laganna. Í stað þess er gert ráð
fyrir þeim gjöldum í almennu gjaldtökuákvæði fyrir eftirlit samkvæmt lögunum og að ráðherra setji um það gjaldskrá, sbr. nýtt ákvæði sem lagt er til að lögfest verði í 31. gr. a.
Um 58. gr.
Ákvæðið hefur að geyma nánari útfærslu á gjaldtökuheimildum fyrir tiltekna þjónustu
Matvælastofnunar og einnig fyrir eftirlit með framkvæmd laganna.
Áréttað er að ráðherra skuli með gjaldskrá setja ákvæði um gjaldtöku fyrir útgáfu vottorða
og starfsleyfa, svo og móttöku og skráningu umsókna.
Í frumvarpinu er gert ráð fyrir efnislega sambærilegu ákvæði í 26. gr. laga nr. 93/1995,
um matvæli, og 8. gr. a laga nr. 22/1994. Slíkt ákvæði er í 31. gr. laga nr. 55/1998.
Um 59. gr.
Hér er lagt til að nýtt ákvæði bætist við lögin, þ.e. að í nýrri grein, 31. gr. a, verði lögfest
sambærilegt ákvæði um gjaldtöku fyrir eftirlit og gert er ráð fyrir að lögfest verði í 25. gr.
laga nr. 93/1995, um matvæli. Gert er ráð fyrir að það muni einnig gilda um eftirlit sem Matvælastofnun kann að fela faggiltum skoðunarstofum samkvæmt lögunum, sbr. 16. gr. Um
skýringu á ákvæðinu vísast að öðru leyti til 15. gr. þessa frumvarps.
Um 60. gr.
Hér er lagt til að gerðar verði breytingar á heiti laga nr. 55/1998 til að gera ákvæði laganna
auðveldari í framkvæmd en sömu ástæður eru fyrir breytingunni og gerð hefur verið grein
fyrir í athugasemd við 44. gr. um ástæður fyrir tillögu að breytingu á lögum nr. 96/1997 þar
sem eldra heitið hefur þótt óþarflega langt og stirt í framkvæmd.
Um 61. gr.
Í ákvæðinu eru skilgreind nokkur hugtök sem notuð eru í frumvarpinu. Hugtakið fóður
er skilgreint upp á nýtt í samræmi við skilgreiningu reglugerðar nr. 178/2002. Fiskimjöl er
samkvæmt því skilgreint sem fóður enda segir í skilgreiningunni: „Til fóðurs teljast einnig
vörur unnar úr fiski og fiskúrgangi.“ Nauðsynlegt þykir að skilgreina hugtakið „eftirlitsaðili“
sérstaklega.
Aukaafurðir dýra eru skilgreindar í ákvæðinu. Skilgreiningin er byggð á skilgreiningu
reglugerðar Evrópuþingsins og ráðsins (EB) nr. 1774/2002.
Skilgreiningin er víðtæk og er henni ætlað að ná yfir aukaafurðir dýra sem ekki eru ætlaðar til eða eru ekki hæfar til manneldis.
Aðrar skilgreiningar í þessari grein frumvarpsins eru samhljóða skilgreiningum í reglugerð (EB) nr. 178/2002. Ekki er talið að aðrar skilgreiningar í gildandi lögum um þetta efni
stangist á við hugtök sem notuð eru í matvælalöggjöf Evrópusambandsins.
Um 62. gr.
Ákvæði fellir niður 2. mgr. 3. gr. en samkvæmt greininni skipaði landbúnaðarráðherra
tvær nefndir, annars vegar fóðurnefnd og hins vegar sáðvöru- og áburðarnefnd, til fjögurra
ára í senn sem höfðu það hlutverk að vera ráðgefandi um framkvæmd eftirlits samkvæmt
lögum. Þar sem þessar nefndir hafa ekki verið starfandi um nokkurn tíma og þar sem EES-
löggjöf gildir um fóður, áburð og sáðvöru er ekki talinn tilgangur með áframhaldandi starfi
slíkra nefnda.
Um 63. gr.
Ákvæðið kveður á um tilkynningarskylda starfsemi og hvaða fyrirtæki þurfa starfsleyfi.
Meginreglan er sú að fóður-, áburðar- og sáðvörufyrirtæki þurfa að tilkynna starfsemi sína
til Matvælastofnunar. Þessi fyrirtæki þurfa að sýna fram á fullnægjandi aðstöðu fyrir þá
starfsemi sem tilkynnt er um.
Fóðurfyrirtæki sem nota aukefni í fóður þurfa hins vegar starfsleyfi frá Matvælastofnun.
Þessi ákvæði eru í samræmi við reglugerð (EB) nr. 882/200. Að öðru leyti vísast til athugasemda við 6. gr. frumvarpsins eftir því sem við á.
Um 64. gr.
Ákvæðið er í samræmi við 10. gr. reglugerðar (EB) nr. 178/2002 og 19. gr. frumvarpsins
þar sem kveðið er á um skyldu stjórnvalda til að upplýsa almenning um eðli hættu sem er
fyrir hendi. Ákvæðið leggur þá skyldu á herðar eftirlitsaðila að upplýsa almenning um tiltekna hættu sem stafar af fóðri.
Í 2. og 3. mgr. ákvæðisins eru ný ákvæði sem kveða á um birtingu upplýsinga eða niðurstaðna vegna eftirlits með fóðri, áburði eða sáðvöru. Ákvæðin eru sambærileg við 2. og 3.
mgr. nýrrar 28. gr. a laga nr. 93/1995 í 19. gr. frumvarpsins.
Um 65. gr.
Í ákvæðinu er að finna reglugerðarheimild til að kveða nánar á um framleiðslu og markaðsetningu, hollustuhætti í framleiðslu, rekjanleika fóðurs, merkingar og vörulýsingar, efnainnihald, sýnatökur, viðmiðunarmörk fyrir örverufræðilega þætti og aðskotaefni, umbúðir
og pökkun, eftirlit eftirlitsaðila, innra eftirlit, meðferð aukaafurða dýra, innflutning fóðurs,
áburðar og sáðvöru frá þriðju ríkjum og starfsemi landamærastöðva vegna fóðurs, hraðviðvörunarkerfi og stjórnun vegna neyðartilvika. M.a. er heimild til að útfæra efnisákvæði um
hraðviðvörunarkerfi og stjórnun vegna neyðartilvika í reglugerð í samræmi við efnisákvæði
IV. kafla reglugerðar (EB) nr. 178/2002. Orðalag ákvæðisins er öðru leyti lagað að þeim nýmælum sem kveðið er á um í reglugerð EB nr. 178/2002. Einnig er tekið mið af því að í
kjölfar reglugerðarinnar verða settar ítarlegar reglur, m.a. um hollustuhætti í fóðuriðnaði.
Rétt þykir þó að hafa í lögunum tilvísanir í þær megingerðir fóðurlöggjafar Evrópusambandsins þannig að reglugerðarheimildir verði skýrar hvað þessar tilteknu gerðir varðar.
Þessar tilvísanir eru í 2. og 3. mgr. 7. gr. laganna.
Um 66. gr.
Greinin þarfnast ekki skýringa.
Um 67. gr.
Lagt er til að við lögin bætist nýr kafli með sjö nýjum ákvæðum, 7. gr. a – 7. gr. g. Um a-lið (7. gr. a).
Ákvæðið skilgreinir öruggt fóður. Fóður sem ekki er öruggt skal ekki markaðssetja. Matvæli skulu ekki teljast örugg ef þau eru álitin heilsuspillandi fyrir menn og dýr. Um b-lið (7. gr. b).
Ákvæðið er í samræmi við reglur reglugerðar Evópuþingsins og ráðsins (EB) nr. 1774/
2002. Reglugerðin heimilar í undantekningartilvikum notkun aukaafurða dýra í dýrafóður.
Ákvæðið tekur til tiltekinna unninna aukaafurða dýra svo sem fiskimjöls svo dæmi sé tekið. Um c-lið (7. gr. c).
Stjórnendur fóðurfyrirtækja eins og þeir eru skilgreindir í frumvarpinu bera ábyrgð á því
að starfsemin sé í samræmi við lög og stjórnvaldsfyrirmæli. Stjórnendum ber einnig að sannprófa að starfsemin sé í samræmi við lög og reglur sem um reksturinn gilda. Stjórnandi er
í bestri aðstöðu til að þróa öruggt kerfi fyrir afhendingu fóðurs og til að tryggja að fóður, sem
hann afhendir, sé öruggt. Af þessum sökum er eðlilegt að stjórnandi fóðurfyrirtækis beri
frumábyrgð á öryggi fóðurs. Um d-lið (7. gr. d).
Ákvæðið er að mestu sambærilegt að efni við 8. gr. c sem lagt er til að verði lögfest í
lögum um matvæli og kveðið er á um í 5. gr. þessa frumvarps. Um athugasemdir vísast til
athugasemda við 5. gr. frumvarpsins. Um e-lið (7. gr. e).
Miklu skiptir að hægt sé að rekja feril fóðurs eins og matvæla. Í þessu skyni gerir matvælalöggjöf Evrópusambandsins ráð fyrir víðtæku kerfi rekjanleika í fóðurfyrirtækjum til
þess að hægt sé að afturkalla vörur á markvissan og nákvæman hátt eða veita neytendum eða
eftirlitsmönnum upplýsingar og komast þannig hjá óþarfa röskun þegar upp koma vandamál
í tengslum við öryggi fóðurs. Ákvæðið kveður á um grunnreglu reglugerðar (EB) nr. 178/
2002 sem þar kemur fram í 18. gr. um rekjanleika fóðurs, dýra sem gefa af sér afurðir til
manneldis og efna sem notuð eru í matvæli. Stjórnandi eins og hann er skilgreindur þarf að
hafa vitneskju um birgja og aðra þá sem útvega hráefni til fóðurframleiðslu eða vinnslu.
Þessa vitneskju þarf stjórnandinn að hafa tiltæka ef eftirlitsaðilar óska þessara upplýsinga.
Fóðurfyrirtæki, að innflytjanda meðtöldum, getur þurft að staðfesta frá hvaða fyrirtæki það
hefur fengið tiltekið fóður, dýr eða efni sem sett eru í fóður til að tryggja rekjanleika á öllum
stigum ef rannsókn fer fram. Um f-lið (7. gr. f).
Lagt er til að varúðarregla 7. gr. reglugerðar (EB) 178/2002 verði lögfest eins og gert var
í 18. gr. þessa frumvarps um matvæli. Rétt þykir að kveðið sé á um það í lögum hvenær
heimilt er að grípa til varúðarráðstafana án þess að fyrirliggjandi séu óyggjandi gögn um að
viðkomandi vara muni hafa í för með sér heilsuspillandi áhrif. Skilyrði fyrir beitingu reglunnar er þó að slík áhrif séu möguleg. Í sumum tilvikum er vafi um heilsuspillandi áhrif fóðurs en þó hætta á heilsutjóni vegna þeirra. Ákvæðið heimilar ráðherra að framkvæma nauðsynlegar ráðstafanir í slíkum tilvikum. Ákvæðið tilgreinir ekki heimilar ráðstafanir heldur
er kveðið á um að þær skuli vera í réttu hlutfalli við markmið þeirra og ekki hamla viðskiptum meira en nauðsynlegt er. Ráðstafanirnar skulu endurskoðaðar innan eðlilegs tíma
enda er um tímabundnar ákvarðanir að ræða. Ákvæði þetta þarf að túlka í samræmi við þá
meginreglu matvælalöggjafar EB að markaðshindrandi aðgerðir eða aðgerðir sem leiða til
ójafnra samkeppnisskilyrða eru ekki leyfðar nema í sérstökum undantekingatilvikum. Varúðarreglan byggist á því að við þessar sérstöku aðstæður sem verða til þegar ekki er hægt að
eyða vísindalegri óvissu en hætta er á að matvæli valdi heilsutjóni geti verið nauðsynlegt að
gera ráðstafanir til að fyrirbyggja hugsanlega heilsufarsvá fyrir þjóðfélagsþegnana. Um g-lið (7. gr. g).
Ákvæðið kveður á um hagsmunavernd neytenda matvæla og er samsvarandi 8. gr. reglugerðar (EB) nr. 178/2002. 2. mgr. ákvæðisins er samsvarandi 16. gr. reglugerðar (EB) nr.
178/2002. Um h-lið (7. gr. h).
Ákvæðið er efnislega samhljóða 17. gr. frumvarpsins sem bætir nýju ákvæði við matvælalögin, 27. gr. b. Á sama hátt og gildir um landbúnaðar- og sjávarafurðir frá ríkjum utan
EES-svæðisins ber að fara með fóður og fóðurvörur um landamærastöðvar enda er fóðrið
innflutt frá ríkjum utan EES-svæðisins.
Um 68. gr.
Hér er lagt til að lögfest verði í lögum nr. 22/1994 sambærilegt ákvæði um gjaldtöku fyrir
eftirlit og gert er ráð fyrir að verði lögfest m.a. í 25. gr. laga nr. 93/1995, um matvæli. Um
skýringu á ákvæðinu vísast að öðru leyti til 15. gr. þessa frumvarps.
Um 69. gr.
Ákvæðið varðar gjaldtöku vegna starfsleyfa og sérstakrar þjónustu sem hagsmunaaðilar
leita eftir, svo sem vegna útgáfu vottorða, staðfestinga eða afgreiðslu umsókna. Efnislega
sambærilegt ákvæði er í 26. gr. laga nr. 93/1995, um matvæli.
Um 70. gr.
Greinin þarfnast ekki skýringa.
Um 71. gr.
Með ákvæðinu er lagt til að lögfest verði sambærileg ákvæði um þvingunarúrræði og eru
í lögum nr. 7/1998. Þannig verða þvingunarúrræði vegna fóðureftirlits þau sömu og þvingunarúrræði vegna matvælaeftirlits, sbr. lög um matvæli. Einnig felst í ákvæðinu að verið er
að samræma viðurlagaákvæðin ákvæðum um viðurlög sem fram koma í þeim reglugerðum
Evrópuþingsins og ráðsins sem stefnt er að því að mynda grundvöll fyrir innleiðingu á með
frumvarpi þessu. Þá er það nýmæli að lagt er til að eftirlitsaðili geti ákveðið að eftirlitsskyldir
aðilar skuli greiða allan kostnað vegna þvingunarrúræða sem framkvæmd eru samkvæmt lögum þessum og má innheimta slíkan kostnað með fjárnámi án undanfarandi dóms eða sáttar.
Það er jafnframt nýmæli að stjórnanda fyrirtækis er skylt að veita aðstoð við framkvæmd
eftirlitsins. Þykir þetta eðlileg krafa þar sem um umfangsmiklar aðgerðir er að ræða.
Um skýringar við greinina vísast að öðru leyti til athugasemda við 26.–30. gr. í frumvarpi
til laga nr. 7/1998, um hollustuhætti og mengunarvarnir, sbr. Alþingistíðindi, A-deild, 122.
löggafarþing 1997–98, þskj. 197, 194. mál.
Þá er lagt til að lögfest verði sambærilegt ákvæði og í 31. gr. laga nr. 93/1995, um matvæli. Brot gegn ákvæðum laganna geta haft í för með sér mikla hættu og valdið heilsutjóni
á mönnum og dýrum, svo og skaðað ýmsa aðra hagsmuni. Er því talið nauðsynlegt að efla
varnaðaráhrif laganna með því að leggja til þyngri viðurlög við brotum á þeim. Með ákvæðinu er lagt til að tekið verði upp ákvæði um tiltekin viðurlög við brotum á lögunum og að um
meðferð þeirra fari samkvæmt lögum um meðferð opinberra mála. Jafnframt er með þessu ákvæði leitast við að samræma ákvæði laganna þeim ákvæðum um viðurlög sem fram koma
í þeim EB-reglugerðum sem verið er að leggja grundvöll að innleiðingu á með frumvarpi
þessu, sbr. almennar athugasemdir hér að framan.
Um 72. gr.
Greinin þarfnast ekki skýringa.
Um 73. gr.
Ákvæðið fjallar um heimild Alþingis fyrir ríkisstjórnina til staðfestingar á þeim ákvörðunum sameiginlegu EES-nefndarinnar sem hér eru til umfjöllunar. Sameignlega EES-nefndin
tók umræddar ákvarðanir með fyrirvara um samþykki Alþingis. Eðlilegt þykir að hafa sérstakt ákvæði í frumvarpinu sem kveður á um samþykki Alþingis hvað þessar ákvarðanir
varðar.
Um 74. gr.
Tilteknar ákvarðanir sameiginlegu EES-nefndarinnar sem hér eru til umfjöllunar heimila
íslenskum yfirvöldum að fresta innleiðingu á tilteknum efnisákvæðum ákvarðananna. Þannig
fela ákvarðanir nr. 133, 135, 136 og 137 í sér sérstakt 18 mánuða aðlögunartímabil sem nota
á m.a. til að innleiða efnisákvæði sem varða búfjárafurðir. Ákvörðun nr. 134/2007 sem varðar innleiðingu reglugerðar EB nr. 178/2002 tekur gildi 27. apríl 2007. Sama gildir um efnisákvæði gerða sem fjalla um sjávarafurðir, unnin matvæli og fóður. Þau taka gildi 27. apríl
2008, þ.e. 6 mánuðum eftir dagsetningu ákvörðunar sameiginlegu EES-nefndarinnar frá 27.
október 2007. Greinin þarfnast að öðru leyti ekki skýringa.
Fylgiskjal.
Fjármálaráðuneyti,
fjárlagaskrifstofa:
Umsögn um frumvarp til laga um breytingar á ýmsum lögum vegna
endurskoðunar á undanþágum frá I. kafla I. viðauka við EES-samninginn og
innleiðingar á reglugerð Evrópuþingsins og ráðsins (EB) nr. 178/2002
frá 28. janúar 2002 auk afleiddra gerða.
Í október 2007 heimilaði ríkisstjórnin með fyrirvara um samþykki Alþingis staðfestingu
á sex ákvörðunum sameiginlegu EES-nefndarinnar sem fela í sér breytingar á viðauka og
bókunum við EES-samninginn. Frumvarp þetta byggist á þeirri samþykkt. Með frumvarpinu
er verið að taka inn í íslenska löggjöf gerðir Evrópusambandsins um matvæli og fóður. Það
felur annars vegar í sér endurskoðun á undanþágu Íslands frá I. kafla í viðauka I við EES-
samninginn og hins vegar upptöku löggjafar Evrópusambandsins um matvæli og fóður inn
í EES-samninginn. Verði frumvarp þetta að lögum munu sömu reglur gilda um fæðuöryggi
við framleiðslu, eftirlit og dreifingu matvæla á Íslandi og gilda á innri markaði EES-svæðisins. Jafnframt mun samþykkt frumvarpsins þýða að ný löggjöf um matvæli tekur gildi á
Íslandi.
Markmið frumvarpsins eru meðal annars að auka frelsi til innflutnings landbúnaðarafurða
á grundvelli heilbrigðiskrafna, efla fæðuöryggi og tryggja þannig hnökralaus viðskipti með
örugg matvæli á innri markaðinum og gera opinbert fóðureftirlit víðtækara en áður. Í frumvarpinu er gert ráð fyrir að störf héraðsdýralækna, sem sinna bæði opinberu eftirliti og
almennri dýralæknaþjónustu, verði lögð niður en þess í stað komi stærri opinber eftirlitssvæði þar sem Matvælastofnun hefur umdæmisskrifstofur. Í frumvarpinu er kveðið á um að
starfsmönnunum skuli boðin störf hjá Matvælastofnun og að ekki þurfi að auglýsa þau störf
skv. 7. gr. laga nr. 70/1996, um réttindi og skyldur starfsmanna ríkisins.
Í fjárlögum 2007 var 70 m.kr. fjárveiting veitt vegna upptöku Íslands á gerðum í I. kafla
I. viðauka við EES samninginn, um viðskipti með dýraafurðir. Sú fjárveiting skiptist þannig
að 15 m.kr. voru vegna skimunar eftir búfjársjúkdómum í lifandi dýrum, 10 m.kr. vegna
eftirlits með lifandi dýrum til varnar því að búfjársjúkdómar berist í menn, 25 m.kr. vegna
reksturs Súnu-miðstöðvar með tveimur starfsmönnum, 10 m.kr. vegna uppsetningar og reksturs tveggja landamærastöðva til eftirlits með innflutningi og 10 m.kr. vegna þátttökukostnaðar við rekstur samningsins.
Við undirbúning þessa frumvarps hafa Matvælastofnun og sjávarútvegs- og landbúnaðarráðuneytið unnið kostnaðaráætlun um ný og breytt verkefni á þessu sviði. Helstu breytingarnar eru eftirfarandi: Í fyrsta lagi er komið í veg fyrir hagsmunaárekstra eftirlitsaðila og
eftirlitsþola. Flestir héraðsdýralæknar sinna í dag bæði opinberu eftirliti og almennri dýralæknaþjónustu við framleiðendur. Samkvæmt frumvarpinu verður að aðskilja þá starfsemi.
Þetta kallar á breytingar á umdæmisskrifstofum og aukinn kostnað því samfara. Við þessa
breytingu er gert ráð fyrir að umdæmisskrifstofur verði sex talsins, en þær eru nú 14. Jafnframt er gert ráð fyrir að kostnaður af rekstri þeirra falli að fullu á Matvælastofnun en stofnunin greiðir nú hlutdeild í 11 skrifstofum af 14. Einnig er gert ráð fyrir að héraðsdýralæknar
verði starfsmenn Matvælastofnunar sem sinni eingöngu opinberum eftirlitsstörfum en með
því verða héraðsdýralæknar að hætta einkarekstri. Ekki er gert ráð fyrir að dýralæknum sem
starfa fyrir stofnunina fækki við þessar breytingar. Í öðru lagi er gert er ráð fyrir að Ísland
þurfi að sækja um viðbótartryggingu vegna salmonellusmits í innfluttum dýraafurðum (svo
sem kjöti og eggjum). Til að geta gert það þarf að sýna fram á að salmonella sé fátíð í umræddum afurðum á Íslandi og til þess þarf stofnunin að fá samþykkta eftirlitsáætlun og
framkvæma umfangsmiklar rannsóknir byggða á sýnatökum. Jafnframt er gert ráð fyrir gerð
gæðahandabókar, vinnu við eftirlits- og sýnatökuáætlanir og gerð innri úttektar á starfsemi
Matvælastofnunar, Heilbrigðiseftirlits sveitarfélaga og skoðunarstofa. Í þriðja lagi er nú gert
ráð fyrir að taka inn í íslenska löggjöf reglur er varða aðskotaefni og lyfjaleifar. Í fjórða lagi
er gert ráð fyrir aukinni vinnu við Evrópugerðir og löggjöf vegna á funda fastanefnda og
vinnuhópa ESB um fæðukeðjuna og dýraheilbrigði, funda með EFTA og tíðari eftirlitsferða
Eftirlitsstofnunar EFTA (ESA) til Íslands. Reiknað er með að viðbótarkostnaður vegna þessara þátta verði um 12 m.kr. á árinu 2008 og 22,8 m.kr. á ári eftir það.
Verði frumvarpið óbreytt að lögum er gert ráð fyrir að kostnaður Matvælastofnunar vegna
þess verði 42,1 m.kr. árið 2008, 71,5 m.kr. árið 2009 og 83,7 m.kr. árið 2010. Þar af er tímabundinn stofnkostnaður 8,8 m.kr. árið 2008 og 3 m.kr. árið 2009 eða samtals 11,8 m.kr. Frá
og með árinu 2010 er þannig gert ráð fyrir að útgjöld stofnunarinnar aukist varanlega um
83,7 m.kr. Við þá fjárhæð bætist 70 m.kr. fjárveiting sem veitt var í fjárlögum 2007 vegna
kostnaðar við upptöku Íslands á gerðum í I. kafla I. viðauka við EES-samninginn, um viðskipti með dýraafurðir. Samtals munu því útgjöld Matvælastofnunar vegna þessara lagabreytinga verða 153,7 m.kr. á ári þegar þær eru að fullu komnar fram. Gert er ráð fyrir að stöðugildum Matvælastofnunar muni fjölga um 6,5 til viðbótar við tvö stöðugildi sem áður hafði
verið gert ráð fyrir. Auk þess er gert er ráð fyrir að útgjöld aðalskrifstofu sjávarútvegs- og landbúnaðarráðuneytis vegna þessara áforma muni aukast um 15 m.kr. á árinu 2008 og 20
m.kr. á ári þar á eftir. Er sá kostnaður vegna ráðningar tveggja sérfræðinga, hagsmunagæslu
erlendis, birtingar á gerðum og kynningar innan lands á reglunum. Heildarkostnaður ríkissjóðs vegna frumvarpsins verður því 57,1 m.kr. árið 2008, 91,5 m.kr. árið 2009 og 103,7
m.kr. árið 2010 til viðbótar við 70 m.kr. framlag til þessa verkefna sem veitt var í fjárlögum
2007. Ekki er gert ráð fyrir þeim útgjöldum í fjárveitingum gildandi fjárlaga.
Hér er myndað efni sem sést aðeins í pdf-skjalinu.