Aðrar útgáfur af skjalinu: PDF - Word Perfect. Ferill 184. máls.
135. löggjafarþing 2007–2008.
Þskj. 1047  —  184. mál.




Breytingartillögur



við frv. til l. um breyt. á almennum hegningarlögum nr. 19 12. febrúar 1940, með síðari breytingum (upptaka, hryðjuverk, skipulögð brotastarfsemi, mansal og peningaþvætti).

Frá minni hluta allsherjarnefndar (AtlG).



     1.      Við 3. gr. B-liður falli brott.
     2.      4. gr. falli brott.
     3.      5. gr. falli brott.
     4.      Á eftir 6. gr., er verði 4. gr., komi tvær nýjar greinar, svohljóðandi:
                  a.      (5. gr.)
                     1. mgr. 194. gr. laganna orðast svo:
                     Hver sem gerist sekur um nauðgun skal sæta fangelsi ekki skemur en 2 ár og allt að 16 árum.
                  b.      (6. gr.)
                     Við 206. gr. laganna bætist ný málsgrein sem verður 1. mgr., svohljóðandi:
                     Hver sem lætur af hendi eða heitir greiðslu eða öðrum ávinningi fyrir vændi skal sæta sektum eða fangelsi allt að 1 ári.
     5.      Við 7. gr. Greinin orðist svo:
             227. gr. a laganna orðast svo:
             Með mansali er í lögum þessum átt við að fólk sé fengið, flutt, framselt, hýst eða við því tekið, með valdi eða hótun um valdbeitingu eða með annars konar nauðung, með mannráni, svikum, blekkingu, valdníðslu eða misnotkun á varnarleysi þess, eða ef látið er af hendi fé eða tekið við því eða öðrum gæðum til þess að fá fram samþykki við því að einn einstaklingur öðlist vald yfir öðrum einstaklingi í hagnýtingarskyni. Hagnýting tekur, í það minnsta, til:
                  a.      hvers konar kynferðislegrar hagnýtingar, svo sem vændis, nauðungarvinnu eða nauðungarþjónustu,
                  b.      þrælahalds eða athæfis sem svipar til þrælahalds,
                  c.      ánauðar eða
                  d.      brottnáms líffæra.
             Tilkvaðning, flutningur, framsal, hýsing eða viðtaka á barni í hagnýtingarskyni telst vera mansal, jafnvel þótt ekki sé beitt neinum þeim aðferðum sem lýst er í 1. mgr. Orðið „barn“ merkir einstakling undir átján ára aldri.
             Hverjum þeim sem gerist sekur um mansal skal refsa fyrir það með allt að 8 ára fangelsi.
             Sömu refsingu skal sá sæta sem tekur við greiðslu eða öðrum ávinningi af mansali.
     6.      Við bætist ný grein, svohljóðandi:
             Við gildistöku laga þessa verða eftirfarandi breytingar á öðrum lögum:
             1.      Eftirfarandi breytingar verða á lögum um útlendinga, nr. 96/2002:
                      a.      Á eftir 11. gr. laganna koma tvær nýjar greinar ásamt fyrirsögnum, svohljóðandi:
                             a. (11. gr. a.)
    Fórnarlambavernd.
                             Í fórnarlambavernd felst að einstaklingur sem er fórnarlamb mansals og hefur verið vistaður ólöglega á Íslandi skuli njóta nafnleyndar, leyndar á dvalarstað og annarra nauðsynlegra öryggisráðstafana gegn ógnun frá þeim aðilum sem standa að mansalinu. Þá skal honum gefinn kostur á sérstöku tímabundnu dvalar- og atvinnuleyfi hér á landi gegn því að hann aðstoði yfirvöld eftir því sem kostur er við að hafa uppi á þeim sem stunda mansal og veiti lögreglu og dómstólum upplýsingar, svo sem með skýrslum og vitnisburði.
                             Þó að stjórnandi rannsóknar treysti fórnarlambi mansals ekki til að vitna eða telur að það geti ekki vitnað gegn hinum brotlegu, t.d. vegna andlegs eða líkamlegs ástands, skerðir það ekki réttinn til þeirrar aðstoðar sem lögin gera ráð fyrir.
                             Dvalar- og atvinnuleyfi skv. 1. mgr. er veitt til átján mánaða. Það er hægt að framlengja um jafnlangan tíma.
                             Heimilt er að afturkalla dvalar- og atvinnuleyfi samkvæmt þessari grein ef einstaklingur sem nýtur verndar sem fórnarlamb hefur á virkan hátt, viljugur og að eigin frumkvæði tekið aftur upp samband við þann sem grunaður er um mansal.
                             Þeir sem þiggja fórnarlambavernd eiga rétt á félagslegum stuðningi samkvæmt áætlun sem unnin er í hverju tilfelli þar sem m.a. er tilgreindur sá stuðningur sem veita skal og hversu lengi hann skuli vara. Þeim skal jafnframt standa til boða félagsleg, sálræn og lögfræðileg aðstoð, læknishjálp og þjónusta túlka, sem og starfsþjálfun og aðstoð við atvinnuleit. Þá skal þeim standa til boða aðstoð við að sækja um búsetuleyfi skv. 15. gr. og 15. gr. a þegar fórnarlambaverndinni lýkur.
                             Fórnarlamb mansals, sem gefinn er kostur á fórnarlambavernd, hefur 30 daga umþóttunartíma til að þiggja verndina. Á umþóttunartímanum skal fórnarlamb njóta aðstoðar skv. 5. mgr. og hafa bráðabirgðadvalarleyfi hér á landi.
                             Dómsmálaráðherra setur reglugerð um áætlun um félagslegan stuðning og önnur úrræði skv. 5. mgr.

                             b. (11. gr. b.)
     Nefnd um fórnarlambavernd.
                             Dómsmálaráðherra skal skipa fimm manna nefnd um fórnarlambavernd vegna framkvæmdar laga þessara. Skal einn nefndarmaður tilnefndur af Útlendingastofnun, einn af Vinnumálastofnun og einn af ríkislögreglustjóra. Tveir nefndarmenn skulu skipaðir án tilnefningar og ber ráðherra að líta til reynslu og þekkingar frjálsra félagasamtaka sem starfa með fórnarlömbum mansals við þær tilnefningar. Ráðherra skipar formann úr hópi nefndarmanna. Varamenn skulu skipaðir á sama hátt og aðalmenn. Starfsmaður dómsmálaráðuneytis skal vera ritari og starfsmaður nefndarinnar og annast aðstoð við fórnarlömb mansals og þiggjendur fórnarlambaverndar.
                             Nefndin skal hafa eftirtalin verkefni:
                              a.      að kanna hvort grunur um mansal er á rökum reistur,
                              b.      að taka ákvörðun um veitingu dvalar- og atvinnuleyfis skv. 1. mgr. 11. gr. a til þeirra sem þiggja boð um fórnarlambavernd að uppfylltu skilyrði a-liðar,
                              c.      að taka ákvörðun um endurnýjun dvalar- og atvinnuleyfis skv. 3. mgr. 11. gr. a.
                                 Nefndin skal hafa aðgang að gögnum lögreglu sem eru henni nauðsynleg til þess að sinna verkefnum sínum.
                                 Nefndarmenn og starfsmaður eru bundnir þagnarskyldu í störfum sínum og einnig eftir að störfum lýkur.
                                 Ákvarðanir nefndarinnar eru kæranlegar til ráðherra.
                                 Ráðherra kveður í reglugerð nánar á um starfssvið og starfshætti nefndarinnar.
                                 Útlendingastofnun gefur út dvalarleyfi vegna fórnarlambaverndar samkvæmt ákvörðun nefndarinnar og Vinnumálastofnun gefur út atvinnuleyfi, svo sem kveðið er á um í lögum um atvinnuréttindi útlendinga, nr. 97/2002.
                      b.      Á eftir 15. gr. laganna kemur ný grein, 15. gr. a, svohljóðandi:
                             Ef þeir sem hafa þegið fórnarlambavernd sækja um búsetuleyfi skal samvinna þeirra við yfirvöld metin þeim til tekna við úrlausn þess hvort ný leyfi fást veitt. Við slíka leyfisveitingu skal taka tillit til kringumstæðna þegar sakaferill er metinn. Þá skal félagsleg aðstoð sem einstaklingar þiggja vegna fórnarlambaverndar ekki hafa áhrif á rétt þeirra til búsetuleyfis.
             2.      Við 5. gr. laga um atvinnuréttindi útlendinga, nr. 97/2002, bætist ný málsgrein, svohljóðandi:
                         Vinnumálastofnun gefur út atvinnuleyfi samkvæmt ákvörðun nefndar um fórnarlambavernd, sbr. lög um útlendinga.