Rétt til að kalla sig náms- og starfsráðgjafa og starfa sem slíkur hefur sá einn sem til þess
hefur leyfi menntamálaráðherra, sbr. 2. mgr.
Leyfi skv. 1. mgr. skal veita umsækjanda sem lokið hefur námi í náms- og starfsráðgjöf
frá háskóla sem hlotið hefur viðurkenningu menntamálaráðherra samkvæmt lögum nr.
63/2006.
2. gr. Matsnefnd.
Leiki vafi á hvort umsækjandi um leyfi til þess að nota starfsheitið náms- og starfsráðgjafi
fullnægi þeim skilyrðum sem kveðið er á um í lögum þessum skal leita umsagnar matsnefndar sem menntamálaráðherra skipar til fjögurra ára í senn.
Matsnefnd skal skipuð þremur fulltrúum, einum frá félagi náms- og starfsráðgjafa, einum
tilnefndum af samstarfsnefnd um háskólastigið og einum án tilnefningar og skal hann vera
formaður nefndarinnar. Jafnmarga varamenn skal skipa á sama hátt.
Nánar skal kveðið á um starfshætti matsnefndar í reglugerð.
3. gr. Réttindi sem aflað er í ríki innan EES eða í aðildarríki EFTA.
Menntamálaráðherra skal staðfesta leyfi til að nota starfsheitið náms- og starfsráðgjafi
samkvæmt umsókn ríkisborgara frá ríki innan Evrópska efnahagssvæðisins eða Færeyjum ef
viðkomandi leggur fram vottorð um viðurkennd réttindi í ríki innan svæðisins eða Færeyjum
í samræmi við skilyrði tilskipunar 89/48/EBE, sbr. lög nr. 83/1993, um viðurkenningu á
menntun og prófskírteinum, með áorðnum breytingum.
Samkvæmt umsókn frá ríkisborgara aðildarríkis stofnsamnings Fríverslunarsamtaka
Evrópu skal ráðherra staðfesta leyfi til að nota starfsheitið náms- og starfsráðgjafi með sömu
skilyrðum og tilgreind eru í 1. mgr., enda leggi viðkomandi fram vottorð um viðurkennd réttindi í aðildarríki samtakanna.
4. gr. Leyfisveiting.
Menntamálaráðherra er heimilt að veita þeim sem eru í starfi þegar lög þessi öðlast gildi
leyfi það sem um ræðir í 1. mgr. 1. gr. enda þótt þeir uppfylli ekki skilyrði 2. mgr. 1. gr. Áður
en leyfi er veitt skal leita umsagnar matsnefndar.
5. gr. Þagnarskylda.
Náms- og starfsráðgjafa er skylt að gæta þagmælsku um atriði sem hann fær vitneskju um
í starfi sínu og leynt skulu fara samkvæmt lögum eða eðli málsins. Þagnarskyldan helst þótt
viðkomandi láti af starfi.
6. gr. Skyldur náms- og starfsráðgjafa.
Náms- og starfsráðgjafa ber að þekkja skyldur sínar samkvæmt lögum, viðhalda þekkingu
sinni og tileinka sér nýjungar er varða fagið.
Náms- og starfsráðgjafar bera ábyrgð á þeirri ráðgjöf sem þeir veita.
7. gr. Reglugerðarheimild.
Ráðherra getur sett nánari ákvæði í reglugerð um framkvæmd laga þessara, m.a. reglur um
skilyrði fyrir veitingu leyfis og hvernig staðið er að veitingu og afturköllun leyfis.
8. gr. Gildistaka.
Lög þessi öðlast þegar gildi.
9. gr. Breytingar á öðrum lögum.
Við gildistöku laga þessara verða eftirfarandi breytingar á öðrum lögum:
1.
Lög um grunnskóla, nr. 91/2008:
a.
2. mgr. 11. gr. orðast svo:
Um skilyrði þess að hljóta ráðningu sem skólastjóri, kennari eða náms- og starfsráðgjafi í grunnskóla fer samkvæmt gildandi lögum þar um.
b.
3. mgr. 13. gr. orðast svo:
Nemendur eiga rétt á að njóta náms- og starfsráðgjafar í grunnskóla af aðilum sem
uppfylla skilyrði laga um náms- og starfsráðgjafa.
2.
Lög um framhaldsskóla, nr. 92/2008:
a.
3. mgr. 8. gr. orðast svo:
Um skilyrði þess að vera ráðinn skólameistari, kennari eða náms- og starfsráðgjafi
við framhaldsskóla fer eftir ákvæðum gildandi laga um menntun og ráðningu kennara
og skólastjórnenda við leikskóla, grunnskóla og framhaldsskóla og laga um náms-
og starfsráðgjafa.
b.
Orðin ,,náms- og starfsráðgjafa“ í 1. málsl. 5. mgr. 8. gr. falla brott.
c.
1. mgr. 37. gr. orðast svo:
Nemendur eiga rétt á að njóta náms- og starfsráðgjafar í framhaldsskóla af aðilum
sem uppfylla skilyrði laga um náms- og starfsráðgjafa.
Greinargerð.
Markmið frumvarpsins er að lögvernda starfsheitið náms- og starfsráðgjafi. Með lögverndun þess er verið að tryggja ákveðin gæði þjónustu, sinna hagsmunum ráðþega og að mikilvæg
sér- og fagþekking skili sér inn í menntakerfið, út á vinnumarkaðinn og til almennings. Sá
sem leitar aðstoðar náms- og starfsráðgjafa getur í skjóli lögverndunar verið þess fullviss að sá sem þjónustuna veitir hafi tilskilda menntun og fagþekkingu. Hér er fyrst og fremst verið
að huga að heill nemenda og þeirra er njóta þjónustu náms- og starfsráðgjafa jafnframt því
að tryggja fagleg vinnubrögð stéttarinnar, auk þess sem náms- og starfsráðgjafar og fagið
sjálft getur stuðlað að öflugri tengingu milli skóla og atvinnulífs.
Náms- og starfsráðgjafar starfa m.a. í skólum, í fyrirtækjum og á atvinnumiðlunum. Starf
þeirra er breytilegt eftir því hvar þeir starfa en byggist þó að grunni til á því sameiginlega
markmiði að stuðla að velferð einstaklinga með hagsmuni þeirra að leiðarljósi. Markmið
náms- og starfsráðgjafar er að efla vitund einstaklinga um viðhorf sín, áhuga og hæfileika
þannig að þeir fái notið sín í námi og starfi. Náms- og starfsráðgjöf hefur fest sig í sessi í
menntakerfinu frá því að nám í námsráðgjöf hófst árið 1991 við félagsvísindadeild Háskóla
Íslands. Fagleg þekking og vinnubrögð liggja að baki náms- og starfsráðgjöf og starfsheitið
náms- og starfsráðgjafi vísar til þess að sá hinn sami veitir faglega ráðgjöf á grundvelli sértækrar menntunar sinnar. Meginverkefni náms- og starfsráðgjafa í grunn- og framhaldsskólum er að aðstoða nemendur við náms- og starfsval og veita ráðgjöf meðan á námi stendur.
Náms- og starfsrágjafi er trúnaðarmaður og talsmaður nemandans. Mikilvægt er að allir nemendur hafi aðgang að þjónustu ráðgjafa í sínum skóla. Það er mikilvægt að sérþekking náms-
og starfsráðgjafa skili sér að fullu inn í grunn- og framhaldsskóla landsins og því nauðsynlegt
að breyta lögum um grunn- og framhaldsskóla samhliða frumvarpi þessu á þann veg að einungis sé heimilt að ráða til starfa í skólum landsins náms- og starfsráðgjafa sem uppfylla skilyrði laganna.
Með frumvarpinu er því lagt til að ákvæði um náms- og starfsráðgjafa verði tekin upp í
löggjöf um grunnskóla og framhaldsskóla. Á þann hátt er tryggt að einungis þeir sem uppfylla lagaskilyrði eigi kost á að sinna náms- og starfsráðgjöf í grunn- og framhaldsskólum
landsins. Löggjöfin um grunnskóla og framhaldsskóla í núverandi mynd ber þess merki að
starfsheitið náms- og starfsráðgjafi hefur ekki verið lögverndað og því ótryggt að fagleg
náms- og starfsráðgjöf sé til staðar í skólum landsins. Með þessari breytingu er verið að
tryggja ákveðin gæði þjónustu, sinna hagsmunum þeirra sem þjónustuna þiggja og tryggja
að sér- og fagþekking skili sér inn í menntakerfið. Sá sem leitar aðstoðar náms- og starfsráðgjafa getur í skjóli lögverndunar verið þess fullviss að sá sem þjónustuna veitir hafi tilskilda menntun og fagþekkingu. Hér er fyrst og fremst verið að vinna að hag nemenda og
þeirra er njóta þjónustu náms- og starfsráðgjafa jafnframt því að tryggja fagleg vinnubrögð
stéttarinnar.
Með frumvarpinu þessu er ekki ætlunin að breyta réttarstöðu þeirra sem eru starfandi við
gildistöku laganna en uppfylla ekki lagaskilyrði til að nota starfsheitið náms- og starfsráðgjafi. Þannig er gert ráð fyrir að þeir geti óskað eftir staðfestingu menntamálaráðherra á
leyfi um rétt til að bera starfsheitið náms- og starfsráðgjafi.
Með frumvarpinu er einnig verið að gæta þeirra skuldbindinga sem Ísland hefur tekið á
sig með þátttöku í samningnum um Evrópska efnahagssvæðið. Þannig er gert ráð fyrir að
réttur til starfsheitis geti stofnast á tvennan máta, við útgáfu leyfis af hálfu ráðherra eða við
staðfestingu ráðherra á sams konar leyfi sem gefið hefur verið út erlendis.
Þá er lagt til að ein matsnefnd verði starfrækt fyrir starfsheiti náms- og starfsráðgjafa.
Þannig sé á einum stað fjallað um umsóknir sem vafi er um. Með þeim hætti verður stjórnsýslan í tengslum við veitingu leyfis skilvirkari. Hlutverk matsnefndar er að úrskurða um rétt
aðila til að nota starfsheitið þegar um vafatilvik er að ræða. Þá skal leitað eftir samráði matsnefndar við staðfestingu á leyfi samkvæmt umsóknum ríkisborgara innan Evrópska efnahagssvæðisins eða Færeyja eða ríkisborgara aðildarríkis stofnsamnings Fríverslunarsamtaka
Evrópu. Lagt er til að nefndin veiti umsögn um leyfisveitingu en að lokaákvörðun verði tekin
af menntamálaráðherra.