ríkisábyrgð á lántöku tryggingarsjóðs innstæðueigenda og fjárfesta.
Virðulegi forseti. Ég endurtek að það liggur fyrir að einhverjir hafa haldið því fram að innstæðutryggingareglukerfið hafi með einhverjum hætti verið meingallað. Það má sjálfsagt takast á um það árum saman. En hvað gerðist? Jú, banki fór á hausinn og innstæðurnar voru tryggðar eins og til var ætlast þannig að ég fæ ekki alveg séð hvað brást. Ég get hins vegar sagt ykkur hvað brást í hinu evrópska regluverki. Það var að þegar íslenskur banki sigldi til Hollands á vormánuðum 2008 með vonlausan efnahag í miklum lausafjárvandræðum og í raun að hruni kominn þá tókst Hollendingum ekki að stöðva hann þrátt fyrir að vilji þeirra stæði til þess. Það er galli í hinu evrópska regluverki.