ríkisábyrgð á lántöku Tryggingarsjóðs innstæðueigenda og fjárfesta.
Undir þennan samning rita fulltrúar bresku ríkisstjórnarinnar, hollensku ríkisstjórnarinnar, annan samninginn, og fulltrúar stjórnar innlánstryggingarsjóðs og fulltrúi fjármálaráðherra. Þeir geta ekkert skuldbundið Alþingi Íslendinga. (Gripið fram í: Rétt, hárrétt.) Þessir einstaklingar í krafti sinna embætta geta ekki skuldbundið ríkissjóð Íslands. (Gripið fram í.) Til þess höfum við nefnilega stjórnarskrá sem Bretar hafa reyndar ekki. Það er nefnilega það athyglisverða í þessu að það er Alþingi Íslendinga sem hér og nú er að veita ríkisábyrgð og hún getur verið takmörkuð eins og okkur dettur í hug. (Gripið fram í.) Nei, en þá kemur nefnilega upp sú spurning hvort samningsaðilar telja þá ríkisábyrgð næga. Það er nefnilega þeirra val, ekki íslensku heldur þeirra erlendu, hvort þeir fallist á að þessi takmarkaða ríkisábyrgð sé nægileg til þess að þeir sætti sig við hann. Þetta er breyting á samningnum. Það sem menn eru að tala hér út og suður um hvort samningurinn sé óbreyttur eins og hæstv. ríkisstjórn heldur fram eða ekki gengur út á það hvort Bretar og Hollendingar muni samþykkja þessar breytingar.
Ég hugsa að ef Íslendingar stæðu sig vel í því að markaðssetja þessa hugmynd úti um alla Evrópu þannig að Bretar og Hollendingar misstu sitt bakland í Evrópusambandinu, þá stæðum við miklu betur að vígi gagnvart því að þeir mundu samþykkja þessar breytingar á ríkisábyrgðinni. Að sjálfsögðu er þetta ekki sama ríkisábyrgðin og samningurinn gerir kröfu um, það er alveg á hreinu. Sérhver breyting á þeirri ríkisábyrgð eða takmörkun er breyting á samningnum og menn geta rift honum þess vegna ef þeim sýnist svo og ef (Forseti hringir.) þeir kæra sig um. (VigH: … í samningnum.)