Virðulegi forseti. Sú samstaða sem er búið að ræða hér um í þessum samningum og þessu frumvarpi er ekki til staðar, það sýnir nú þegar atkvæðagreiðslan hér í dag. Hér er verið að ríkisvæða einkaskuldir, hér er um dæma- og fordæmalaust mál að ræða. Um málið ríkir gríðarleg lagaóvissa og engin trygging er fyrir því að fyrirvararnir haldi fyrir breskum dómstólum. Þjóðin á að njóta vafans í þessu máli.

Það eitt að ákvæði er um það í fyrirvörunum að fullveldisréttur þjóðarinnar, friðhelgi og óskoruð yfirráð Íslands yfir náttúruauðlindum sínum sé þar inni er viðurkenning á því að þetta var ekki í samningunum og þessi réttur var fyrir borð borinn. Þetta eru neyðarsamningar sem hér liggja fyrir. Ég segi nei.