Virðulegur forseti. Við áttum afar gott samtal, nefndarmenn í allsherjarnefnd, um frumvarp hv. þm. Valgerðar Bjarnadóttur um viðveru ráðherra í þinginu. Ég held að það sé fullkomlega tímabært að taka þá umræðu. Við erum í sífellu að fást við valdmörk löggjafarvaldsins og framkvæmdarvaldsins og ég held að á hvaða tíma sem er, hvort sem menn eru að fikta í stjórnlagaþingi, stjórnarskránni eða nokkru slíku, sé hollt fyrir okkur að ræða þá hluti, enda er það svo að í þeim tímaramma sem við erum að leggja hér upp eru nokkur ár, a.m.k. þrjú, í það að við getum tekið í gildi nýja stjórnarskrá, ef vel gengur. Ég sé því ekki hvernig það mál hv. þingmanns flækist í sjálfu sér nokkuð fyrir þeirri vinnu sem hér fer fram.