Hæstv. forseti. Já, ef ráðherra gerist sekur um háttsemi sem varðar við refsiákvæði sem hægt er að heimfæra upp á hann með skýrum hætti þá á að sjálfsögðu að láta reyna á það og rétt að láta reyna á það. Til dæmis ef ráðherra segir þinginu ósatt og neitar að framfylgja ákveðnum lögum eins og gerðist t.d. í danska fordæminu um Erik Ninn-Hansen sem við vísum oft til.

En ég vara þingheim við því að taka ákvarðanir á grundvelli „ef ekki núna þá hvenær“-raka. Við verðum að átta okkur á því að við höfum mikið vald í höndunum. Við horfum til einstaklinga sem eiga að njóta mannréttinda. Það eru engin rök að halda því fram í þessari pontu að það verði bara að ákæra — af því bara. Ég vonast til að menn ætli ekki að sannfæra sjálfa sig í þá áttina.