Virðulegi forseti. Það er túlkun hv. þingmanns að í orðum mínum áðan og ræðu hafi falist vantraust á þingmannanefndina. Ég sagði að ég virti þau sjónarmið sem hún hefði komist að niðurstöðu um en ég áskil mér auðvitað rétt eins og hver annar þingmaður í salnum að hafa sjálfstæða skoðun á málinu og byggja þar m.a. á stjórnarskránni. Ég þakkaði þingmannanefndinni fyrir vel unnin störf og sagðist virða hennar sjónarmið en áskil mér líka rétt til að mín sjónarmið séu virt í þessu sambandi.

Það að reglurnar hafi verið settar fyrir ári síðan eða hvenær það var breytir engu um afstöðu mína til landsdóms og þess hve miklir gallar eru á honum og málsmeðferðinni eins og ég lýsti áðan.