Virðulegi forseti. Ég held að ekki megi lesa það úr orðum mínum að ég leggi til að málið klárist ekki á þessu þingi og gangi yfir á næsta þing. Ég hvet til þess að við nýtum þann tíma sem við höfum til að skoða málið vandlega í nefnd. Ég nefndi ágallana sem mér finnst vera á málsmeðferðinni, að þeir sem lagt er til að verði ákærðir hafi ekki haft andmælarétt og að nefndin hafi ekki farið í sjálfstæða rannsókn í málinu. Mér finnst lágmark að þeir sem lagt er til að séu ákærðir eigi a.m.k. kost á því. Þeir geti þá valið að koma með andmælarétt inn í nefndina sem ég tel auðvitað sjálfsagt að þeir hefðu átt að hafa, ekki síst þegar þingmannanefndin víkur frá niðurstöðu rannsóknarnefndarinnar.