Frú forseti. Ég vek líka athygli á því að hv. þm. Ögmundur Jónasson er ekki enn kominn á mælendaskrá. Hann ætlaði að vera viðstaddur umræðuna, móta sér afstöðu í samræmi við það hvernig þingið væri búið að vinna málið. Ég vek sérstaklega athygli á því.

Ég vek líka enn og aftur athygli á fjarveru ráðherra. Þessi fjarvera ráðherra, forsætisráðherra fyrst og fremst, er hrópandi og mér finnst hún styðja þær fullyrðingar okkar í stjórnarandstöðunni að það sé bara formsatriði hvernig málið er afgreitt, að við ættum bara að stikla þetta og síðan ætti að halda áfram eins og ekkert hefði í skorist. Ég hvet forseta þingsins til að gera það sem ég bað hann um að gera áðan, senda forsætisráðherra bréf í tæka tíð þannig að hún geti skipulagt sig og mætt hingað á þingfund þegar við tölum næst um Icesave. Það er ekki líðandi að forsætisráðherra landsins tali ekki í Icesave, tjái sig ekki, og virði að auki þingið algerlega að vettugi.