Hæstv. forseti. Ég tek undir með hv. þingmanni að það er sláandi að um þessar tölur sé að tefla þegar maður horfir á tekjuskattshlutfall og tekjuskattur hversu margra Íslendinga fer í að greiða eingöngu vaxtagreiðslurnar. Það er t.d. ákvæði í þeim lögum sem voru samþykkt á þinginu í sumar sem átti að taka á þessu í fyrirvörum Alþingis.

Þess vegna langar mig að nýta seinna andsvar mitt til þess að fá fram hjá hv. þingmanni hvernig umræðurnar voru um þetta í fjárlaganefnd. Hvernig var því eiginlega komið í gegnum nefndina að ekki væri fjallað á ítarlegri hátt um þessa afstöðu sem kemur að einhverju leyti fram í hinum fjölmörgu minnihlutaálitunum í efnahags- og skattanefnd? Ég er mikil áhugamanneskja um góða og öfluga stjórnsýsluhætti og ekki síst hjá þingnefndum Alþingis (Forseti hringir.) og við hv. þm. Þór Saari höfum margoft rætt um vinnubrögð Alþingis í þessum stól.