Herra forseti. Eins og ég skil þetta mál hefur það verið skilanefnda gömlu bankanna að fara í mál vegna aðgerða fjármálaeftirlitsins en stjórnvöld áttu þann kost að láta reyna á stjórnvaldsaðgerðirnar, beitingu hryðjuverkalaganna og kyrrsetninguna. Niðurstaðan varð að gera það ekki. Engu að síður hefur setningu hryðjuverkalaganna verið haldið til haga í samningaferlinu öllu eins og ítrekuð skrifleg gögn staðfesta. Það var notað og gert allan tímann eins og bréf milli samninganefndanna staðfesta, bæði frá því í mars, í maí (Gripið fram í.) og á fleiri tímum þannig að ég hygg að skjalfest gögn sýni að reynt var að vinna fullkomlega eðlilega úr þessu og nota allt sem mátti verða íslenskum málstað til góðs í þessum samningaviðræðum. Ásakanir um annað verða menn þá að rökstyðja með einhverjum öðrum hætti en hér hefur verið gert til að taka mark á því. Annars er það einfaldlega áburður á menn um að þeir hafi ekki reynt að sinna sínum störfum. (Gripið fram í: Í hvaða umboði …?) (Gripið fram í: Mega … kynna sér gögn?)