Virðulegi forseti. Það hefði verið nær að hv. þm. Ósk Vilhjálmsdóttir hefði spurt hv. þm. Mörð Árnason, sem er sérstakur íslenskusérfræðingur, um merkingar á orðum. Þar sem ég er kennaramenntaður ætla ég þó að leyfa mér að svara því líka.

Brjóstvit er grundvöllur lífs Íslendinga. Brjóstvit byggist á reynslu og verksviti. Svo koma genin enda segir fjórðungur til fósturs. Það er alveg undarlegt að heyra spurt um svona á Alþingi Íslendinga. Ég útskýrði líka það sem ég kallaði kerfishleðslu. Það er bara of mikil opinber yfirbygging, of mikil afskiptasemi. Ekki bara afskiptasemi, heldur of mikil. Maður dælir ekki 20 lítrum af olíu í smurtank á bíl sem þarf 1 lítra af olíu. Ef hv. þingmaður skilur það betur get ég alveg eins sagt það.

Þegar það er sagt að ekki eigi að vinna með brjóstvitinu á Íslandi — með hverju eiga Íslendingar þá að vinna? Ég nefndi fyrst og fremst sem dæmi að Íslendingar væru áhlaupafólk og vildu ganga til verka strax. Þá sem eru þannig í stakk búnir að þeir vilja það og hafa áhuga á því og þrek til þess á auðvitað að nýta eins og hægt er með eðlilegum fyrirvörum, en brjóstvitið er lykillinn að lífi íslensku þjóðarinnar.