stjórn fiskveiða.
Frú forseti. Ég kem hér upp í seinni ræðu minni um frumvarp til laga um breytingu á lögum um stjórn fiskveiða og þó að ég sé ekki farinn að fjalla efnislega um málið sé ég að ég hef þegar (Gripið fram í.) fengið fjórar beiðnir úr salnum um andsvör sem sýnir að hv. þingmenn eru ekki af baki dottnir þó að langt sé liðið á þessa umræðu. (Gripið fram í.)
Umræðan sem hér fer fram, sem stjórnarliðar hafa að mestu leyti leitt hjá sér, er um undirstöðuatvinnugrein þjóðarinnar sem snertir 30 þúsund einstaklinga beint eða óbeint sem hafa atvinnu af sjávarútvegi og hafa stjórnarliðar sýnt fádæma fálæti gagnvart svo mikilvægri umræðu. Í þessari umræðu hefur komið fram að frumvarpið sem við ræðum hér og reyndar bæði frumvörpin eru í raun svo vanbúin og svo óundirbúin að það er ekki meiri hluti á bak við þær breytingar sem hér hafa verið ræddar.
Ég vil nefna nokkur atriði sem ég fór yfir í fyrri ræðu minni. Það er ágreiningur um skiptingu veiðigjaldsins. Það er ágreiningur um með hvaða hætti sveitarfélög eiga að koma að úthlutun veiðiheimilda. Það er ágreiningur um hlutföll í því hvernig pottarnir eiga að stækka.
Ég þakka þingmönnum Samfylkingarinnar, hv. þm. Kristjáni L. Möller og hv. þm. Magnúsi Orra Schram, fyrir að koma hér upp í mikilli hreinskilni og lýsa yfir andstöðu sinni og miklum fyrirvörum við þau frumvörp sem við ræðum nú. Það er í raun alveg ótrúlegt að þingflokkur Samfylkingarinnar skuli hafa hleypt málinu út úr þingflokki sínum til umræðu á vettvangi Alþingis Íslendinga þegar málið er jafnvanreifað og raun ber vitni. Hvenær ætlar ríkisstjórnin að læra þau vinnubrögð að það sé betra að koma inn í sali Alþingis með vandlega undirbúin mál? Það hefur komið fram að ekkert samráð var haft um samningu þessa frumvarps við launafólk í sjávarútvegi, við smábátasjómenn, við LÍÚ og aðra aðila. Í raun og veru hafa allir sem hafa tjáð sig um þessi mál — hvort sem það eru stjórnarliðar, þeir fáu sem hafa tekið þátt í umræðunum, eða aðrir — lýst yfir mörgum fyrirvörum hvað þetta varðar. Stjórnarandstaðan, sem hefur hvergi hefur verið hleypt að samningu þessa máls og fékk fyrst að sjá þetta frumvarp í fjölmiðlum, a.m.k. þorri stjórnarandstöðunnar, hefur lýst andstöðu sinni. Það hefur komið í ljós að það er enginn meiri hluti á bak við þetta mál.
Hvernig í ósköpunum dettur þá ríkisstjórninni í hug að leggja málið fram með þessum hætti? Af hverju reyna menn ekki að læra af reynslunni og vinna málin betur í samvinnu stjórnar og stjórnarandstöðu og í samvinnu við hagsmunaaðila í greininni? Í hverju málinu á fætur öðru virðast svona handarbakavinnubrögð eiga sér stað og ríkisstjórnin virðist ekkert læra, því miður.
Því miður er það svo að við fáum afskaplega lítinn tíma til að ræða þetta umfangsmikla mál og það er mjög erfitt að komast í gegnum greinar þess og það sögðu útvegsmenn að austan og forsvarsmenn sveitarfélaga í mínu kjördæmi, aðilar sem þekkja vel til sjávarútvegsins. Einn frammámaðurinn sagðist hafa lesið þetta frumvarp 30, 40, 50 sinnum og hann skildi ekki fyllilega innihald þess vegna þess hversu illa það væri úr garði gert. Þannig að allt er þetta á sömu bókina lært.
Ég hefði haldið, fyrst hv. stjórnarliðar vilja ekki nýta lýðræðislegan rétt sinn til að ræða um málefni sem snertir grundvallaratvinnuveg þjóðarinnar, að við í stjórnarandstöðunni mættum kannski fá einhvern hluta af þeim kvóta sem hv. stjórnarliðar hafa til að tjá sig hér um þessi mál, því að þögn þeirra er æpandi þegar kemur að svo mikilvægu máli sem hér er rætt.
Því miður er tími minn búinn. En það er nokkur synd að vera að ræða þetta mál undir miðnætti vegna þess að ég veit að margir einstaklingar og atvinnurekendur vítt og breitt um landið vilja fylgjast með umræðunni. Hún hefur staðið núna í tvo daga frá morgni til kvölds. Ég vona að sem flestir séu að fylgjast með hvaða áhuga og áherslur stjórnmálaflokkar hafa þegar kemur að þessari (Forseti hringir.) undirstöðuatvinnugrein, því að ég tel að hv. stjórnarliðar hafi í þessari umræðu ekki sýnt þessu máli (Forseti hringir.) þá virðingu sem það á skilið.